सरकार आफ्नो भू-भागलाई पनि नेपालकै हो भन्‍न हिच्किचायो : नेता सिंह - समाचार - कान्तिपुर समाचार
कान्तिपुर वेबसाईट
AdvertisementAdvertisement

सरकार आफ्नो भू-भागलाई पनि नेपालकै हो भन्‍न हिच्किचायो : नेता सिंह 

प्रधानमन्त्री ओलीले मन्त्रिपरिषद् पुनर्गठन गर्ने बाहेकको काम देखाउन सकेनन्
कान्तिपुर संवाददाता

काठमाडौँ — प्रमुख प्रतिपक्षी दल कांग्रेसका नेता प्रकाशमान सिंहले सरकारले मुलुकको सार्वभौमिकताको रक्षा गर्न नसकेको आरोप लगाएका छन् । काठमाडौंमा आयोजित एक कार्यक्रममा उनले नेपालको भू-भागलाई पनि आफ्नो हो भन्न नसकेको बताएका हुन् । 

हुम्लामा चीनले नेपाली भूमि मिचेको भन्दै शनिबार काठमाडौंमा आयोजित कार्यक्रममा नेता सिंहले भने, 'नेपालको भौगोलिक अखण्डताको विषयलाई लिएर सरकार आफ्नो भू-भागलाई पनि नेपालकै हो भनेर भन्न हिच्किचाएको छ ।'

सरकारका प्रवक्ता प्रदीपकुमार ज्ञवालीले सरकारी टोलीले स्थलगत निरीक्षण प्रतिवेदन नबुझाउँदै चीनले भूमि नमिचेको भन्ने अभिव्यक्ति दिएकोप्रति नेता सिंहले आपत्ति जनाए । 'हुम्लामा सरकारी टीम स्थलगत अवस्था बुझ्नका लागि गएको छ । तर प्रतिवेदन आउनुअगाडि नै सरकारका प्रवक्ताले केही भएको छैन भनर अपरिपक्व कुरा गरेका थिए,' उनले भने ।

नेपालको भू-भाग वर्तमान सरकारले संरक्षण र सुरक्षा गर्न सक्ने हो कि होइन भन्ने कुरा जनतामा पर्न गएको सिंहको भनाइ थियो ।

हुम्लामा चीनले नेपाली भूमि मिचेको प्रतिपक्षी कांग्रेसले बताउँदै आएको छ । चीन र नेपाल सरकारले भने दुई देशबीच कुनै पनि सीमा समस्या नरहेको बताउँदै आएका छन् । कर्णाली प्रदेशमा प्रतिपक्षी दल कांग्रेसका नेता जीवनबहादुर शाहीले भने चीनले नेपाली भूमिमा स्थायी संरचना बनाएको दाबी गरेका छन् । कांग्रेसले शाहीको प्रतिवेदनको आधारमा नै सरकारमाथि दबाब बनाइरहेको हो ।

त्यस्तै, नेता सिंहले प्रधानमन्त्री केपी शर्मा ओलीले स्थायी सरकारको प्रत्याभूति दिन नसकेको बताएका छन् । जनताले दिएको अत्यधिक जनमतका बाबजुद प्रधानमन्त्रीले यो अवधिमा ११ पटक मन्त्रिपरिषद् पुनर्गठनमा मात्रै बिताएको नेता सिंहको दाबी थियो । 'जनताले अत्यधिक म्यान्डेट दिए पनि ३१ महिनामा ११ पटक मन्त्रिपरिषद् पुनर्गठन गर्नुभन्दा केही पनि काम देखाउन सकेको देखिएन । कुर्सीमात्र जोगाउने काममा सरकार लागेको छ,' उनले भने ।

ओम्नी, सेक्युरिटी प्रिन्टिङ प्रेस, यति लगायतका प्रकरणमा सरकार प्रमुख ओलीको भ्रष्टाचारप्रतिको धारणा प्रस्ट पारेको नेता सिंहले बताए । 'सुशासन दिने ठाउँमा कुशासन दिने, भ्रष्टाचारमुक्त काम गर्ने ठाउँमा महामारीमा औषधि र स्वास्थ्य सामग्री खरिदमा घोटाला गरेको देख्दा नै सरकार कति असंवेदनशील रहेको छ भन्ने देखिन्छ,' उनले भने ।

बलात्कार, हत्या र हिंसाका घटना बढ्दै गरेकाले पनि सरकार कानुनको शासन कायम गर्न चुकेको नेता सिंहको भनाइ थियो ।

प्रकाशित : कार्तिक १, २०७७ १५:२२
प्रतिक्रिया
पठाउनुहोस्

बागलुङको कालिका मन्दिर सुनसान

प्रकाश बराल

बागलुङ — गृह मन्त्रालयको निर्देशन भन्दै जिल्ला प्रशासन कार्यालय बागलुङले मठमन्दिरमा निशेधाज्ञा लगाएपछि घटस्थापनाको दिन बागलुङ कालिका मन्दिर सुनसान भएको छ ।

कोरोना संक्रमण समुदाय स्तरमा पुगेको भन्दै प्रशासनले शनिबारदेखि लागू हुने गरी दसैंको अष्टमीसम्म मठमन्दिरमा निशेधाज्ञा लगाएको छ । अन्यत्र भने निशेधाज्ञा लगाइएको छैन । बजार क्षेत्रमा नियमित सवारी, पसल र व्यवसाय सञ्चालनमा छ ।

लकडाउन खुकुलो भएपछि मन्दिरमा दैनिक पूजापाठ सञ्चालनमा थियो । दसैंकालागि सरसफाइ, पूजा व्यस्थापन र दूरी कायम गरेर पूजा गराउने तयारी गरिसकेपछि निशेधाज्ञा लगाइएको हो । प्रशासनले शुक्रबार बेलुकी जारी गरेको निशेधाज्ञा कालिका मन्दिरलाई लक्षित गरिएको एक पूजारीले बताए ।

मन्दिरमा सयौं मानिसले पूजा गर्थे भने दर्जनौं बली चढाइन्थ्यो । मन्दिरमा छिमेकी जिल्ला र चितवन, पोखरा लगायतका स्थानबाट समेत भक्तजन आउथे । घण्टौं लाइन बसेर मात्र पूजा गर्न सकिने अवस्था भएको स्थानमा पहिलो पटक सुनसान देखेको बागलुङ उद्योग वाणिज्य संघका सदस्य गणेश लम्सालले बताए ।

बागलुङ कालिका भगवती गुठी व्यवस्थापन समितिसँग सामान्य सोधपुछ पनि नगरी मन्दिर लक्षित निशेधाज्ञा लगाइएको अध्यक्ष राजु खड्काले बताए । ‘हिजो तयारी गरेर गयौं, बिहान मन्दिर आउँदा गेटमा बार लगाइएको छ, प्रहरी र सशस्त्र लगाएर रोकिएको छ,’ खड्काले भने, ‘सयौं मानिस गेटमा आएर ल्याएको फूल प्रसाद चढाएर फर्केका छन् ।’ मन्दिर आसपासका पसल समेत बन्द गराइएको उनले बताए ।


मन्दिरमा पूजाका लागि आएकी पर्वतको पाङकी यमुना सुवेदीले मन्दिरको गेटमै रोकिएपछि फूल प्रसाद छाडेर फर्केको बताइन् । ‘वर्षौंदेखि मन्दिरमा दर्शनका लागि आउने गरेकी थिएँ,’ उनले भनिन्, ‘पहिलो पटक मन्दिर जान नपाएर फर्कन बाध्य भएँ ।’ शुक्रबारसम्म नियमित भक्तजन गएकोमा शनिबारबाटै बन्द गर्दा अस्थामा चोट लागेको उनले टिप्पणी गरिन् ।

दसैं र चैते दसैंमा बागलुङ कालिका मन्दिरमा सयौं भक्तजन आउने गर्छन् । अघिल्लो वर्षको दसैंमा ६ लाख वटा नरिवल चढेको समितिले रेकर्ड राखेको थियो । ‘सबैले चढाएनन्, कोही दोहोरिएर आए होला, तर १५ दिनमा ६ लाख भक्तजन आएको अनुमान गरेका थियौं,’ खड्काले भने, ‘भेटी व्यवस्थाबाट संरचना सुधार पनि गरिएको छ ।’ मन्दिर आसपासमा झण्डै १० करोडको संरचना बनाइएको उनले बताए । अधिकांश लगानी भेटीबाटै भएको हो ।

मन्दिरमा नियमित पूजा, घटस्थापना र जमरा राख्‍ने काम भने गरिने पूजारी गोपीनाथ उपाध्यायले बताए । ‘पाँचसय वर्षदेखि गरिएको संस्कार त हामीले छाड्ने कुरा भएन,’ उपाध्यायले भने, ‘आम मानिसको आस्था मर्न नदिनका लागि सबैको प्रतिनिधित्व गरेर पूजा गरेका छौं ।’ गेटमा चढाइएका फूल प्रसादपनि मन्दिरमा ल्याउने व्यवस्था गरिएको उनले बताए ।

प्रकाशित : कार्तिक १, २०७७ १५:११
पूरा पढ्नुहोस्
प्रतिक्रिया
पठाउनुहोस्
×