बलात्कारका घटना मिलापत्र र छोपछाप पार्ने कुरा सह्य हुन सक्दैनन् : प्रधानमन्त्री- समाचार - कान्तिपुर समाचार
कान्तिपुर वेबसाईट
AdvertisementAdvertisement

बलात्कारका घटना मिलापत्र र छोपछाप पार्ने कुरा सह्य हुन सक्दैनन् : प्रधानमन्त्री

बलात्कारीलाई दण्ड दिने कडा कानुन ल्याउने प्रधानमन्त्रीको भनाइ
कान्तिपुर संवाददाता

काठमाडौँ — प्रधानमन्त्री केपी शर्मा ओलीले बलात्कारका घटना मिलापत्र गराउने र छोपछाप पार्ने कुरा सह्य नहुने बताएका छन् । नेपाल प्रहरीको ६५औँ स्थापना दिवसका अवसरमा आयोजित कार्यक्रमलाई सम्बोधन गर्दे उनले बलात्कारका घटनामा कुनै पनि प्रलोभनमा नपर्न पनि प्रहरीलाई आग्रह गरेका छन् । 

मुलुकका विभिन्न ठाउँमा बलात्कारका घटनामा स्थानीय, पञ्चायतहरू मिलेर मिलापत्र गराउने कुरा सार्वजनिक भइरहेका बेला प्रधानमन्त्री ओलीले त्यस्ता कार्य कुनै पनि हालतमा सह्य नहुने र अनुचित बताएका हुन् ।

'बलात्कारजस्ता घटनाहरू मिलापत्रका नाममा छोपछाप पार्ने कुराहरू सैह्य र उचित हुन सक्दैनन्,' प्रधानमन्त्री ओलीले भने, ' प्रहरीलाई सामाजिक दबाब आउन सक्छ । भनसुनहरू आउन सक्छन् । विभिन्न खालका प्रभावहरूको प्रयोग हुनसक्छ । यस्ता कुराबाट टाढा रहनुपर्छ । कानुन कार्यान्वयनका साथै दिगो शान्ति सुशासन कायम गर्नेतिर प्रहरी लाग्नुपर्छ ।'

मुलुकमा कानुनी राजको स्थापना हुनुपर्नेमा जोड दिँदै प्रधानमन्त्री ओलीले त्यसका लागि प्रहरीको भूमिका महत्त्वपूर्ण हुने बताए ।

तेजाब आक्रमणविरुद्ध कडा कानुन ल्याएको स्मरण गराउँदै प्रधानमन्त्रीले बलात्कार जस्ता घटनामा पनि त्यस्तो कानुन ल्याउने बताए । 'बलात्कार जस्ता घटनाहरू कुनै हालतमा मानवोचित छैनन्, हुन सक्दैनन् । अत्यन्त निन्दनीय मानवताविरोधी कार्य हुन् । त्यसविरुद्ध निकट भविष्यमा अझ कडा कानुन ल्याउने सोचिरहेका छौं,' उनले भने ।

बलात्कारजस्ता घटनाविरुद्ध नागरिक समाज पनि अगाडि आउनुपर्ने प्रधानमन्त्रीको भनाइ थियो ।

गृहमन्त्रालयले जारी गरेको पछिल्लो तथ्यांकअनुसार नेपालमा दैनिक ७ वटा बलात्कारका घटना प्रहरी प्रशासनमा दर्ता हुने गरेका छन् । त्यसमा ठूलो संख्यामा बालिकाहरू रहेको पनि तथ्यांकमा उल्लेख छ ।

बलात्कारीलाई मृत्युदण्ड दिने कानुन निर्माण गर्नुपर्ने माग उठिरहेका बेला प्रधानमन्त्री ओलीले कडा कानुन निर्माण गर्नेबारे जानकारी दिएका हुन् । महिला सांसद र अधिकारकर्मीहरूले कम्तीमा बालिकाका बलात्कारीलाई मृत्युदण्ड दिनेजस्ता कडा कानुन निर्माण गर्नुपर्ने भन्दै माग गर्दै आएका छन् ।

सम्बन्धित समाचारः

प्रकाशित : आश्विन ३०, २०७७ १३:४२
प्रतिक्रिया
पठाउनुहोस्

घान्द्रुकबासीको निर्णय– टीका थाप्न बाहिर नजाने, अरूलाई पनि आउन नदिने

लालप्रसाद शर्मा

पोखरा — गत चैतमा सरकारले लकडाउन गरेदेखि नै बाहिरी व्यक्तिलाई गाउँ प्रवेशमा रोक लगाएका घान्द्रुकबासीले दसैंतिहारजस्ता चाडपर्व घरमै मात्र मनाउने निर्णय गरेका छन् । घान्द्रुक पर्यटन समितिको बिहीबारको बैठकले आफूहरू टीका थाप्न बाहिर नजाने र बाहिरबाट पनि कसैलाई नआउन भनेको हो ।

‘हामी मावली, ससुराली पनि टीका थाप्न नजाने,’ समितिका अध्यक्ष किसम गुरुङले भने, ‘भान्जाभान्जी, छोरीज्वाइँ कसैलाई पनि नआउन भनिएको छ ।’ बिरामी र अन्य अत्यावश्यक कामबाहेक पोखरासमेत नजाने बैठकको निर्णय छ । अध्यक्ष गुरुङका अनुसार समितिको निर्णयलाई घान्द्रुकका सबै टोलमा पुगेर जानकारी गराउने अभियान थालिसकिएको छ । बिहीबारमात्रै दुई टोलमा यो अभियान सकिएको छ । ‘घान्द्रुकमा अहिलेसम्म कोरोना छैन,’ उनले भने, ‘बाहिरी व्यक्ति (आफन्त र इष्टमित्रसमेत) लाई प्रवेश दिइयो भने फैलने डर भयो । त्यसैले रोक लगाउन यस्तो निर्णय गरेका हौं ।’

स्थानीय व्यवसायी कृष्ण गुरुङका अनुसार दसैंका बेला आफन्तलाई पनि नबोलाउने निर्णय भएको छ । ‘आफन्तबाट पनि कोरोना गाउँमा भित्रिन सक्ने अवस्था रह्यो,’ उनले भने, ‘यसअघिको गाउँमा कसैलाई पनि प्रवेश गर्न नदिने निर्णयलाई निरन्तरता दिएर यस्तो अभियानमा लागेका हौं ।’ साबिकको घान्द्रुक गाविस अहिले अन्नपूर्ण गाउँपालिकाको १० र ११ नम्बर वडामा पर्छ ।

कोरोना संक्रमण कम नभएको भन्दै असोज पहिलो दिनदेखि नै होटल नखोल्ने निर्णय पर्यटन व्यवसायीले गरेका थिए । उक्त निर्णयलाई बिहीबारको बैठकले पनि अनिश्चित कालसम्मलाई निरन्तरता दिएको छ । कोरोनाको महामारी नसकिएको र तत्काल होटल र होमस्टे सञ्चालन गर्दा गाउँमा कोरोना भित्रन सक्ने सम्भावना देखिएको समिति अध्यक्ष गुरुङले बताए । पैसाभन्दा पनि ज्यान ठूलो भएकाले सबै व्यवसायीको ठहरपछि होटल सञ्चालनमा नल्याउने निर्णय गरिएको उनको भनाइ छ । भोलि कोरोना कम भएको महसुस भएमात्रै होटल, रेस्टुरेन्ट खोल्ने उनले जनाए ।

पदयात्रा पर्यटनका लागि उपयुक्त अन्नपूर्ण आधार शिविर, घोरेपानी–पुनहिल पुग्न घान्द्रुक हुँदै जानुपर्छ । स्याउलीबजारदेखि मुख्य गाउँ घान्द्रुकसम्मका पाँच दर्जन होटल र केही होमस्टे सञ्चालनमा थिए । गाउँ प्रवेश गर्ने नाका सादीखोलामा स्थानीय युवा क्लबका सदस्य राखेर दैनिक निगरानी हुने गरेको छ । बाहिरबाट जानेलाई ती युवाले रोकिदिन्छन् । ‘दैनिक ३/४ युवा सीमामा खटिन्छन्,’ व्यवसायी कृष्ण गुरुङले भने, ‘यो अरू केही नभएर कोरोनाबाट गाउँ जोगाउने उद्देश्य मात्र हो ।’

प्रकाशित : आश्विन ३०, २०७७ १३:३७
पूरा पढ्नुहोस्
प्रतिक्रिया
पठाउनुहोस्
×