चिकित्सक संघले आइतबार आकस्मिक र कोभिडबाहेकका सेवा बहिष्कार गर्ने

आइतबारसम्म पनि सत्याग्रह अन्त्य नभएको अवस्थमा यसभन्दा कडा आन्दोलन गर्ने संघले जारी गरेको विज्ञप्तिमा जनाइएको छ । संघले यसअघि शुक्रबार सेवा बहिष्कार गर्ने घोषणा गरेको थियो । तर, सरकारले वार्ता टोली गठन गरेर वार्ता सुरु भएपछि आन्दोलनको कार्यक्रम स्थगित गरेको थियो ।

शुक्रबार राति स्थगित भएको सरकार र केसी पक्षको वार्ता त्यसपछि सुरु हुन सकेको छैन । शिक्षा मन्त्री गिरिराजमणि पोखरेल सरकारी वार्ता टोलीका साथ प्रधानमन्त्री केपी शर्मा ओलीलाई भेट्न शनिबार दिउसो बालुवाटार पुगेका थिए । तर, उनको टोली त्यहाँबाट निस्किएपछि पनि वार्ता भएन । बरु सरकारी वार्ता टोलीले केसीलाई अनशन तोड्न आग्रह गर्दै विज्ञप्ति जारी गर्‍यो । केसी पक्षले भने सरकारले वार्ताका माध्यमबाट समस्या समाधान गर्न गम्भीरता नदेखाएको भन्दै केसीको जीवन रक्षाका लागि दबाब दिन सडक आन्दोलनको आह्वान गरेको छ ।