काठमाडौँ — स्वास्थ्य तथा जनसंख्या मन्त्रालयले बढ्दो कोरोना संक्रमणसँगै कोरोना संक्रमितको उपचारका लागि अस्पतालले भार धान्न नसक्ने जनाएको छ । 

मन्त्रालयले बुधबार आयोजना गरेको नियमित कोरोना प्रेस ब्रिफिङमा प्रवक्ता डा जागेश्वर गौतमले विशेषगरी काठमाडौं उपत्यकामा संक्रमितको उपचार व्यवस्थापनमा थप चुनौती बढ्दै गएकाले अस्पतालले भार थेग्‍न नसक्ने बताए । डा गौतमले भने,‘ कोरोना संक्रमणको वृद्धिसँगै कतिपय अस्पतालमा बेडको अभाव हुँदै गइरहेको छ । बिरामीहरुलाई पायक पर्ने ठाउँमा बेड उपलब्ध हुन सकेको छैन । यस महमारीको प्रकोपको बेला सबै सरकारी तथा निजी अस्पतालहरुले उपचारको व्यवस्था गर्न आवश्यक छ ।’

२४ घन्टाको अध्यावधिक विवरणअनुसार देशभर ३४ सय ३९ जनामा कोरोना भाइरस संक्रमण पुष्टि भएको थियो ।

संक्रमण तीव्र रुपमा बढ्दै जानुका कारण अस्वाभाविक रुपमा सार्वजनिक स्थानमा बढेको भिडभाड, नाक मुख छोपिने गरी मास्क नलगाउनु, एक अर्काबीच दुरी कायम नहुनु र हातको सफाईमा उचित ध्यान नपुर्‍याउनाले संक्रमण बढ्दै गएको डा गौतमको भनाइ छ ।

डा गौतमले नजिकिँदै गरेको चाडपर्वसँगै किनमेल गर्नेको भीड हेर्दा तीव्र रुपमा फैलिएको कोरोनालाई बिर्सेको हो कि भन्ने लागेको बताए । उनले कोरोना संक्रमण जनस्वास्थ्यको ठूलो समस्या भएको बताउँदै नियन्त्रण तथा रोकथामका लागि सबैको भूमिका रहने बताए ।

आवश्यक कामले घरबाहिर निस्कँदा मास्कको उचित प्रयोग, बेलाबेलामा साबुन पानी तथा स्यानिटाइजरको प्रयोग गर्न डा गौतमले अनुरोध गरे ।

यो पनि

• अहिलेसम्मकै उच्च संक्रमित, एकैदिन थपिए ३ हजार ४३९ कोरोना संक्रमित