डाक्टर केसीको माग सरकारले वार्तामार्फत सम्बोधन गर्नुपर्छ : पूर्वराष्ट्रपति यादव- समाचार - कान्तिपुर समाचार
कान्तिपुर वेबसाईट
AdvertisementAdvertisement

डाक्टर केसीको माग सरकारले वार्तामार्फत सम्बोधन गर्नुपर्छ : पूर्वराष्ट्रपति यादव

कान्तिपुर संवाददाता

काठमाडौँ — पूर्वराष्ट्रपति डाक्टर रामवरण यादवले अनशनरत डाक्टर गोविन्द केसीलाई भेटेका छन् । चिकित्सा क्षेत्रको सुधारलगायतका माग राख्दै १९ दिनदेखि अनशनरत वरिष्ठ चिकित्सक केसीलाई भेट्न पूर्वराष्ट्रपति यादव त्रिवि शिक्षण अस्पताल पुगेका थिए ।

पूर्वराष्ट्रपति यादवले डाक्टर केसीले सत्याग्रहमार्फत जनताको माग उठाएकाले सरकारले वार्तामाफत समस्या समाधान गर्नुपर्ने बताए ।

पूर्वराष्ट्रपति यादवले भने, ‘डाक्टर केसीले प्राणकै आहुति दिन तयार भई जनताको माग उठाउनु भएको छ । सरकारले पनि वार्तामार्फत नै यसको समस्या समाधानका लागि पहल गर्नुपर्छ ।’

पूर्वराष्ट्रपति यादवले सत्याग्राही केसी र महात्मा गान्धी जस्ता पुरुषकै कारण संसारमा अहिंसा र शान्तिको ज्योति बलेको उदाहरण दिए । केसीको मागलाई सम्बोधन गर्न सरकारसँग आग्रह गर्दै ऐक्यबद्धता जनाउन विगतमा पनि आएको र आज अहिंसा दिवसको संयोग परेको पनि यादवले सुनाए ।

डाक्टरको केसीको स्वास्थ्य संवेदनशीलतालाई ध्यान दिँदै पूर्वराष्ट्रपति यादवले राष्ट्रकै अमूल्य सम्पत्तिका रुपमा रहेका केसीको ज्यान बचाउन आग्रह गरे ।

केसीको हेरचाह गर्नेदेखि उपचार गर्ने सबैको प्रशंसा गर्दै सरकारलाई गम्भीर भएर सोच्न पनि पूर्वराष्ट्रपति यादवले आग्रह गरे ।

प्रकाशित : आश्विन १६, २०७७ ११:५३
प्रतिक्रिया
पठाउनुहोस्

अमेरिकी राष्ट्रपति ट्रम्प र प्रथम महिला मेलानियालाई कोरोना संक्रमण

एजेन्सी

वासिङ्टन — अमेरिकी राष्ट्रपति डोनाल्ड ट्रम्प र प्रथम महिला मेलानिया ट्रम्पलाई कोरोना संक्रमण देखिएको छ । शुक्रबार बिहान ट्वीट गर्दै राष्ट्रपति ट्रम्पले आफू र पत्नी मेलानियालाई कोरोना भएको जानकारी दिएका हुन् । 

कोरोना देखिएपछि आफूहरु क्वारेन्टाइनमा बस्ने पनि उनले जानकारी दिएका छन् ।

बिहीबार बेलुका राष्ट्रपति ट्रम्प र प्रथम महिलामा कोरोना संक्रमण पुष्टि भएको राष्ट्रपति ट्रम्पका फिजिसियन डाक्टर सिन कोन्लेले जानकारी दिएका छन् । उनका अनुसार दुवै जनाको स्वास्थ्य अवस्था समान्य रहेको छ । डाक्टर कोन्लेले राष्ट्रपति ट्रम्प र प्रथम महिला ह्वाइट हाउसमै क्वारेन्टाइनमा बस्ने पनि जानकारी दिए ।

ह्वाइट हाउसमा रहेको चिकित्सकको विशेष टोलीको प्रत्यक्ष निगरानीमा राष्ट्रपति र प्रथम महिला रहने पनि उनले बताए ।

राष्ट्रपति ट्रम्पले बिहीबार बेलुका नै आफ्ना नजिकका सहयोगीलाई कोरोना भएपछि क्वारेन्टाइनमा बस्ने योजना सुनाएका थिए ।

राष्ट्रपति ट्रम्पको क्वारेन्टाइन बसाइ कति लामो हुन्छ भन्नेबारेमा भने केही जानकारी दिइएको छैन । अमेरिकाको सेन्टर फर डिजिज कन्ट्रोल एन्ड प्रिभेन्सन (सीडीसी)को गाइडलाइनअनुसार कोरोना पुष्टि भएका व्यक्तिले अनिवार्य १४ दिन क्वारेन्टाइनमा बस्नुपर्ने हुन्छ । कोरोना भाइरसको 'इन्क्युबेसन' अवधि दुई हप्तासम्म हुने भन्दै १४ दिनको क्वारेन्टाइन अवधि तोकिएको हो ।

पछिल्लो समय राष्ट्रपति ट्रम्प चुनावी अभियानका क्रममा अमेरिकाका विभिन्न राज्य पुगेका थिए । बुधबार मात्रै उनले राष्ट्रपतीय निर्वाचनका लागि प्रतिद्वन्द्वी जो बाइडेनसँग चुनावी बहसमा सहभागी भएका थिए । अमेरिकामा आगामी नोभेम्बर ३ मा राष्ट्रपतीय चुनाव हुँदैछ ।

कोरोना संक्रमण पुष्टि भएपछि अक्टोबर १५ का लागि तय भएको दोस्रो 'प्रेजिडेन्सियल डिबेट' कसरी सञ्चालन हुन्छ भन्ने सबैको चासो रहेको छ ।

अमेरिका कोरोना महामारीबाट सबैभन्दा प्रभावित मुलुक हो । जोन्स होप्किन्स विश्वविद्यालयको तथ्यांकअनुसार शुक्रबार बिहानसम्म अमेरिकामा कोरोना संक्रमितको संख्या ७२ लाख ७७ हजार नाघेको छ । त्यस्तै अमेरिकामा कोरोनाबाट करिब २ लाख ८ हजार जनाको मृत्यु भएको छ । त्यस्तै कोरोना पुष्टि भएकामध्ये २८ लाख ६० हजारभन्दा बढी निको भएका छन् ।

प्रकाशित : आश्विन १६, २०७७ ११:१७
पूरा पढ्नुहोस्
प्रतिक्रिया
पठाउनुहोस्
x
×