जडिबुटी खोज्‍न वनमै बास- समाचार - कान्तिपुर समाचार
कान्तिपुर वेबसाईट
AdvertisementAdvertisement

जडिबुटी खोज्‍न वनमै बास

राजबहादुर शाही

मुगु — मुगुमकार्मारोङ गाउँपालिकाका बासिन्दा जडिबुटी खोज्न जंगलमै बास बस्न थालेका छन् । कटुकी, भोल्तेलगायत जडिबुटी टिप्ने सिजन सुरु भएपछि स्थानीयबासी जंगलमै बास बस्न थालेका हुन् ।

मुगमकार्मारोङ–२ स्थित मुगुगाउँका करिब डेढ सय घरधुरीलाई अहिले जडिबुटी टिप्ने चटारो छ । अन्न उत्पादन न्यून हुने भएकाले गाउँका बासिन्दा जडिबुटी व्यवसायमै निर्भर छन् । ‘यो पटक यार्सा टिप्न नपाइएकाले पुरै गाउँ कटुकी र भोल्ते टिप्न जंगलमा उर्लिएको छ,’ स्थानीय छिरिङ लामाले भने, ‘भदौ तेस्रो सातादेखि सबैलाई जडिबुटी टिप्न भ्याइनभ्याइ छ ।’ असोज दोस्रो सातादेखि गाउँमा हिमपात हुने भएकाले सबै जडिबुटी टिप्न जुटेको उनले बताए ।

मुगमकार्मारोङको चितै, डोल्फू, किम्री, ताखा, खारी, दाउरा, मह, पूवा, पूलु, रिउस, माङम्रीलगायत १८ बस्तीका बासिन्दा अहिले वनमा जडिबुटी टिप्न व्यस्त छन् । बेसीतिरका किसानलाई भने कोदो, धान, चिनो, कागुनो, फापरलगायत अन्नबाली भित्र्याउने चटारो छ ।

बालबालिकादेखि बृद्धसम्म जडिबुटी टिप्न गएपछि गाउँहरु सुनसान बनेको पूलुगाउँका फोन्जुक तामाङले बताए । ‘हिमाली बस्ती बढी भिरालो भएकाले अन्नबाली फल्दैन,’ उनले भने, ‘त्यसैले जडिबुटीकै भरमा जीविकोपार्जन गर्न बाध्य छौं ।’

छायानाथरारा नगरपालिकाको सोभा, घट्टलेख, तल्ललेख, कम्फा, लुम्स, बालचौर र र्‍याङच्याकाटीका बासिन्दा पनि अहिले कटुकी र भोल्ते खोज्न वनतिर जान थालेका छन् । स्थानीय ज्ञानबहादुर सेजुवालका अनुसार वन क्षेत्रमै कटुकी प्रतिकिलो १६ सय ५० र भोल्ते ५ सय ५० रुपैयाँमा बिक्री हुने गरेको छ ।

डिभिजन वन कार्यालयले एक महिनाका लागि सामुदायिक वनमा जडिबुटी संकलन खुला गरिएको जनाएको छ । कार्यालयका सूचना अधिकारी वसन्तकुमार शाहीले व्यापारीहरु जडिबुटी किन्न वनमै गएकाले यसपालि राम्रो भाउ पाएको बताए ।

उनका अनुसार यस वर्ष ७७ जना व्यापारीले जडिबुटी किनबेचको अनुमति लिएका छन् । गत वर्ष कटुकी, अत्तिस, भोल्ते, धुपीपात, सतुवा, बनलसुनलगायत २० प्रकारको जडिबुटी जिल्लाबाहिर गएको उनले जानकारी दिए । कार्यालयका अनुसार गत वर्ष जडिबुटीबाट ३० लाख ८० हजार रुपैयाँ राजस्व संकलन भएको थियो ।

प्रकाशित : आश्विन १२, २०७७ १८:४४
प्रतिक्रिया
पठाउनुहोस्

‌ओस्कार अवार्डका लागि आवेदन खुला

कान्तिपुर संवाददाता

काठमाडौँ — ९३ औं ओस्कार अवार्डमा सहभागिताका लागि आवेदन खुला गरिएको छ । नेपालको अन्तर्राष्ट्रिय फिचर फिल्म छनोट समितिले ‌प्रतिस्पर्धामा सहभागि हुन नेपाली फिल्मकर्मीलाई फिल्मको आवदेन बुझाउन आह्रवान गरेको छ । समितले असोज १३ गतेदेखि असोजको २९ गतेभित्रमा आवेदन  बुझाउन आह्वान गरेको हो । 

यसअघि फ्रेब्रुअरीमा हुँदै आएको अवार्ड कोरोना महामारीका कारण दुई महिना पर धकेलिएको थियो । अब अवार्ड अप्रिल २५ का दिन आइतबार लसएञ्जल्सको डल्बी थिएटरमा सम्पन्न हुने बताइएको छ ।

महामारीकै कारण केही नियममा परिवर्तन पनि गरिएको छ । महामारीले गर्दा प्रदर्शन हुन नसकेका फिल्मले पनि ओस्कारमा सहभागिता जनाउन पाउनेछन् । यसअघि फिल्म हलमा रिलिज भएर हप्ता दिनसम्म चलेकै हुनुपर्ने नियम थियो । यसका लागि सम्बन्धित फिल्मले सरकारबाट मान्यता प्राप्त सिनेमा हलबाट फिल्म रिलिज रोकिएको पत्र नेपालको अस्कर कमिटीलाई बुझाउनु पर्नेछ । त्योसँगै यसरी रोकिएका फिल्म हलमा नलागी स्ट्रिमिङ साइटमा आएका छन् भने पनि तिनले सहभागिता जनाउन सक्नेछन् ।

प्रकाशित : आश्विन १२, २०७७ १८:१९
पूरा पढ्नुहोस्
प्रतिक्रिया
पठाउनुहोस्
×