एसिडपीडित ४ जनाले पाए रोजगारी- समाचार - कान्तिपुर समाचार
कान्तिपुर वेबसाईट
AdvertisementAdvertisement

एसिडपीडित ४ जनाले पाए रोजगारी

तीन युवतीलाई कुमारी बैंक र एकजना पुरुषलाई महान्यायाधिवक्ता कार्यालयको चालकमा नियुक्त
मातृका दाहाल

काठमाडौँ — एसिड आक्रमणका ३ जना युवतीले कुमारी बैंकमा रोजगारी पाएका छन् भने आक्रमणबाट घाइते एक पुरुषलाई पनि महान्यायाधिवक्ताको कार्यालयले चालकमा करार नियुक्ति दिएको छ । कुमारी बैंकले एसिड पीडित दुईजना युवतीलाई उपत्यका र एकजनालाई हेटौंडामा स्थायी रोजगारीको व्यवस्था गरेको हो ।

एसिड अपराध विरूद्ध क्रियाशिल उज्जवलविक्रम थापाका अनुसार हेटौंडाकी विन्दबासिनी कंसाकार तथा काठमाडौंमा बस्दै आएका जेनी खड्का र संगीता मगरलाई कुमारी बैंकले रोजगारी दिएको हो ।

यसैगरी महान्यायाधिवत्ता अग्नी खरेलले आफ्नै श्रीमतीबाट एसिड आक्रमणमा परेका नुवाकोटका रामराजा थापालाई असोज १ गतेबाटै पारिश्रमिक गण्ना हुने गरी करारमा चालक नियुक्ति गरेका छन् ।

बैंकले तीनैजनालाई ‘मार्केटिङ अफिसर’को रुपमा बैंकले रोजगारी दिलाएको एसिड अपराधविरुद्ध न्याय, पुुनस्थापना र कडा कानुनका लागि क्रियाशील सामाजिक अभियान्ता उज्ज्वलबिक्रम थापाले जानकारी दिए । थापाका अनुसार बैंकले आजै तीनैजनालाई रोजगारी दिने सम्वन्धी पत्रमा हस्ताक्षर गर्न लागेको हो । असोज १ गतेबाटै गणना हुने गरी उनीहरुले रोजगारी पाएका हुन् । बैंकमा सुरुमा एक महिनाको करार र त्यसपछि आवश्यक कानुनी प्रक्रिया पूरा गरेर स्थायी नियुक्ति दिइने छ ।

हेटौंडाकी कंसाकारमाथि २०७० वैशाख ९ गते पसलमा बसिरहेको बेला भारत महाराजगञ्ज (अमरपूर्वन–६ का राज भन्ने दिलिपराज केशरीले एसिड आक्रमण गरेका थिए । २०७१ फागुन १० गते एसएलसी परीक्षाका लागि ट्युसन पढ्न निस्किएकी संगीता मगरलाई बसन्तपुरमा रामेछाप फुलासीका जीवन बिकले एसिड छ्यापेका थिए ।

२०७६ जेठ २ गते कालोपुलमा काभ्रे फुलबारीकी जेनी खड्कामाथि सोही ठाउँका विष्णुबहादुर भुजेलले एसिड प्रहार गरेका थिए ।

२०७६ फागुन २६ गते विदुर नगरपालिका–१३ घर भई बालाजु बस्दै आएका २७ वर्षीय रामराजा थापालाई उनकै श्रीमती प्रतिमा थापाले एसिड प्रहार गरेकी थिइन् । अभियान्ता थापाले एसिड आक्रमणबाट पीडित बनेकालाई राजगारी प्राप्त हुनुले अब एसिड पीडित जोसुकै दयाको पत्र नभई यो अपराधीविरुद्ध लड्ने विशिष्ठ नागरिकको हैसित प्राप्त भएको बताए । पीडितका लागि रोजगारी जीवनभर रि–सेटलमेन्टको सबैभन्दा ठूलो अवसर भएको उनको भनाई छ ।

सरकारले पनि एसिड आक्रमण गर्नेविरुद्ध बिहीबार नै अध्यादेशमार्फत् अधिकतम २० वर्षसम्म कैद र १० लाख रुपैयाँसम्म जरिवाना तथा उपचार खर्च निःशुल्क हुने गरी मन्त्रिपरिषदबाट कानुन पारित गरेको छ । अध्यादेश राष्ट्रपतिबाट जारी हुन बाँकी छ । पछिल्लो ७ वर्षमा मात्रै देशभर डेढ दर्जनमाथि एसिड आक्रमण भएको थियो ।

प्रकाशित : आश्विन ११, २०७७ १०:०१
प्रतिक्रिया
पठाउनुहोस्

प्रधानमन्त्री ओली र दाहालबीच बालुवाटारमा छलफल

प्रधानमन्त्री निकट स्राेतले मन्त्री हेरफेरबारे पार्टी कमिटी (सचिवालय)ले निर्णय गरेकोले साेही अनुसार तयारी भइरहेको बतायाे ।
कान्तिपुर संवाददाता

काठमाडौँ — प्रधानमन्त्री केपी ओली र नेकपा अध्यक्ष पुष्पकमल दाहालबीच बालुवाटारमा बिहान छलफल भइरहेको छ । छलफलकाे विषय के हाे भन्नेबारे दुवै निकट स्रोतले थाहा नभएको बतायाे ।

एक मन्त्रीका अनुसार मन्त्रिपरिषद् बैठक १२ बजे बाेलाइएकाे छ । प्रधानमन्त्री निकट स्राेतले मन्त्री हेरफेरबारे पार्टी कमिटी (सचिवालय)ले निर्णय गरेकोले साेही अनुसार तयारी भइरहेको बतायाे ।

प्रधानमन्त्री र अध्यक्ष दाहालले मन्त्रिपरिषद् पुनर्गठनकाे मापदण्डबारे छलफल यसअघिकै भेटबाट सुरु भएको जानकारी दियाे । अध्यक्ष दाहालकाे सचिवालयले भने कसलाई मन्त्री बनाउने वा हटाउने भन्ने सूची तयार भइनसकेको जानकारी दियाे ।

प्रकाशित : आश्विन ११, २०७७ ०९:४३
पूरा पढ्नुहोस्
प्रतिक्रिया
पठाउनुहोस्
×