पाल्पा पहिरो : एकै परिवारका ५ जनाको शव भेटियो- समाचार - कान्तिपुर समाचार
कान्तिपुर वेबसाईट
AdvertisementAdvertisement

पाल्पा पहिरो : एकै परिवारका ५ जनाको शव भेटियो

कान्तिपुर संवाददाता

पाल्पा — रम्भा गाउँपालिका–२, फोक्सिङकोटमा पहिरोमा परी बेपत्ता भएका पाँचै जनाको शव पुरिएको अवस्थामा शुक्रबार भेटिएको छ । तीन बालबालिकाको शव दिउँसो र दुई जनाको भने शुक्रबार बेलुका फेला परेको हो ।

बिहीबार बिहान पहिरोले घर पुरिँदा एकै परिवारका पाँच बेपत्ता थिए । पहिरोमा पुरिएर मृत्यु हुनेमा ६० वर्षीय हुमबहादुर गाहा, उनकी पत्नी ५० वर्षीया धनीसरा गाहा, छोरी १७ वर्षीया कृष्णामाया गाहा, हुमबहादुरका नातिनीहरू ८ वर्षीया लक्ष्मी गाहा र १४ वर्षीया खुमीसरा आलेको शव फेला परेको प्रहरी कार्यालयका सूचना अधिकारी मदन गिरीले बताए । हुमबहादुर र धनीसराको शव बेलुका अबेरमात्र निकालिएको हो । उनले भने, ‘पहिरो ठूलो भएकाले पन्छाउन धेरै समस्या भएको हो ।’

सडक अवरुद्ध भएकाले पहिरोमा पुरिएकाको उद्धार गर्न टोली अलि ढिला पुगेको थियो । ताँहुबाट दुई घण्टा हिँडेर टोली घटनास्थल फोक्सिङकोट पुगेपछि शुक्रबार बिहानै खोजी कार्य सुरु भएको थियो । पहिरोमा पुरिएकाको सेना, प्रहरी बल, स्थानीय बासिन्दाले खोजी गरेका हुन् । पाँचै जनाको शव पोस्टमार्टमका लागि ताँहुसम्म ल्याइएको प्रमुख जिल्ला अधिकारी रमेश न्यौपानेले बताए । ताँहुको प्राथमिक स्वास्थ्य केन्द्रमा शव पोस्टमार्टम गर्न तानसेनबाट चिकित्सक पुगेका छन् ।

प्रदेश सांसद नारायणप्रसाद आचार्यले पहिरो खसेको स्थानमा प्राविधिक लगेर बस्तीका विषयमा अध्ययन गरिने बताए । उनले पीडित परिवारका लागि रेडक्रम सोसाइटीमार्फत कम्बल, त्रिपाललगायत सामग्री लगेर छाडेको बताए । ‘बस्तीकै अध्ययन गर्ने भनेर प्राविधिक लगिएको थियो,’ उनले भने, ‘सडकको पहिरो पन्छाउन नसकेर पुग्न सकिएन ।’ बेलौजामा तीन घर पहिरोमा पुरिएका छन् भने १७ घर जोखिममा छन् । खतरामा परेका बस्तीका बासिन्दालाई विद्यालय, स्वास्थ्यचौकी र छिमेकीको घरमा सारिएको छ । रम्भा गाउँपालिकाले पहिरोमा पुरिएर मृत्यु हुनेलाई प्रतिव्यक्ति ५० हजार रुपैयाँ राहत दिने निर्णय गरेको छ । यस्तै विस्थापित परिवारको खाने, बस्ने व्यवस्था मिलाउने गाउँपालिका अध्यक्ष विष्णुप्रसाद भण्डारीले बताए ।

प्रकाशित : आश्विन ९, २०७७ २२:२९
प्रतिक्रिया
पठाउनुहोस्

वृद्धा हत्याको आरोपमा एक पक्राउ

सम्झना रसाइली

तनहुँ — जिल्लाको शुक्लागण्डकी नगरपालिका–७ कुम्लेखोलाका ६७ वर्षीया तेजकुमारी ढकालको हत्याको अभियोगमा प्रहरीले शुक्रबार एक पुरुषलाई पक्राउ गरेको छ । पक्राउ पर्नेमा गोरखा भीमसेन थापा गाउँपालिका–१ बसेनीका ४६ वर्षीय शिव गौतम रहेको जिल्ला प्रहरी कार्यालयले जनाएको छ ।

ढकालको हत्या भएको अवस्थामा शुक्रबार बिहान घरभित्रै शव फेला परेको थियो । घटनामा संलग्न रही फरार रहेका शिवलाई व्यास नगरपालिका–२ स्थित सहिदगेटमा हुलिया परिवर्तन गरी हिँडिरहेको अवस्थामा पक्राउ गरिएको जिल्ला प्रहरी कार्यालयका प्रहरी नायब उपरीक्षक युवराज तिमिल्सिनाले बताए ।

ढकालको शव आफ्नै घरभित्र भुइँमा दुवै हात खुट्टा र घाँटीमा कपडाले बाँधेको अवस्थामा मृत फेला परेको प्रहरीले बताएको छ । उनको शरीरका विभिन्न भागमा धारिलो हतियार प्रहार गरिएको छ । ढकालको श्रीमान र बुहारी सोही वडाको स्वाँरामा बस्दै आएका छन् । जेठो छोराको घर पनि नजिकै छ । ‘बिहान ७ बजे ज्वाईंले ती वृद्धाको घरको पिढीँमा दूध राखेर अन्यत्र दूध पुर्‍याउन गएका रहेछन्’, उनले भने, ‘फर्केर आउँदा पनि दूध पिढीँमै र घरको ढोका खुल्ला देखेपछि भित्र पसेर हेर्दा वृद्धाको शव देखेपछि प्रहरीलाई खबर गरेका रहेछन् ।’

घटनास्थलमा कुकुरसमेत परिचालित गरी सूक्ष्म रुपमा अनुसन्धान गर्दा हत्यामा संलग्न रही फरार रहेका व्यक्तिलाई दमौली बजारबाट पक्राउ गर्न सफल भएको र थप अनुसन्धान जारी रहेको प्रहरी नायब उपरीक्षक तिमिल्सिनाले बताए ।

प्रकाशित : आश्विन ९, २०७७ २१:१८
पूरा पढ्नुहोस्
प्रतिक्रिया
पठाउनुहोस्
×