सुदूरपश्चिमाञ्चल विश्वविद्यालयले सुरु गर्‍यो अनलाइन परीक्षा- समाचार - कान्तिपुर समाचार
कान्तिपुर वेबसाईट
AdvertisementAdvertisement

सुदूरपश्चिमाञ्चल विश्वविद्यालयले सुरु गर्‍यो अनलाइन परीक्षा

भवानी भट्ट

कञ्चनपुर — सुदूरपश्चिमाञ्चल विशवविद्यालयले अनलाइन प्रणालीबाट परीक्षा सुरु गरेको छ । पहिलो चरणमा शुक्रबार सिभिल इन्जिनियरिङ र कृषि विज्ञानका पहिलो र तेस्रो सेमेस्टरको परीक्षा सुरु भएको हो ।

विश्वविद्यालयका परीक्षा नियन्त्रक देवसिंह नाथका अनुसार पहिलो दिन इन्जिनियरिङका ८८ जना र कृषि विज्ञानका ९५ गरि १ सय ८३ विद्यार्थीले अनलाइनबाटै परीक्षा दिएका छन् । ‘दुवै संकायका सबै विद्यार्थी परीक्षामा सहभागी भएका छन्,’ परीक्षा नियन्त्रक नाथले भने, ‘सुदूरपश्चिमाञ्चल विश्वविद्यालयका लागि यो ऐतिहासिक दिन हो ।’

समय तालिका अनुसार परीक्षाका समय बिहान ९ देखि २ बजेसम्म तोकिएको छ । निर्धारित समयमा सबै विद्यार्थीले प्रश्नपत्र डाउनलोड गर्नेदेखि उत्तर लेखेर उत्तर पुस्तिकासमेत अपलोड गर्न सफल भएको परीक्षा नियन्त्रक नाथले बताए । उनका अनुसार प्रश्नपत्र विश्वविद्यालयले सबै विद्यार्थीको इमेलमा पठाएपछि विद्यार्थीले उक्त प्रश्नपत्र डाउनलोड गरेर उत्तर लेखेपश्चात उत्तरपुस्तिका स्क्यान गरी विश्वविद्यालयको इमेलमा अपलोड गरेका छन् ।

‘हामीले लामो समयदेखि रोकिएका पठनपाठनलाई अनलाइनबाटै सञ्चालन गरेका छाैं,’ विश्वविद्यालयका उपकुलपति अम्मराज जोशीले भने, ‘पठनपाठन पूरा भएका कक्षाहरुको परीक्षा गर्ने निर्णयमा पुगेका हौं ।’ उनले यसका लागि विगत एक/डेढ महिनादेखि तयारी गरिएको जानकारी दिए ।

शुक्रबारदेखि सुरु भएका परीक्षा असोज २४ मा सम्पन्न हुनेछन् । इन्जिनियरिङ र कृषि विज्ञानसँगै, मानविकी, शिक्षा र विज्ञान संकायका परीक्षा पनि असोज २४ भित्रै सम्पन्न हुनेछन् । ‘विभिन्न संकायका गरि ८ हजार २८० विद्यार्थी सम्मिलित हुनेछन्,’ परीक्षा नियन्त्रण्क नाथले भने, ‘बाँकी रहेका अन्य संकायको परीक्षा तालिका त्यसपछि प्रकाशन गरिनेछ ।’ सुदूरपश्चिमाञ्चल विश्वविद्यालयमा केन्द्रीय क्याम्पससहित १४ वटा आंगिक क्याम्पसमा १२ हजार बढी विद्यार्थी अध्ययनरत छन् ।

विश्वविद्यालयले अनलाइन परीक्षा सञ्चालनका लागि सबै विद्यार्थीको ट्रेसिङदेखि इन्टरनेटसम्म पहुँचका लागि सुदूरपश्चिम प्रदेशका सबै स्थानीय तह, जिल्ला समन्वय समिति, जिल्ला प्रशासन कार्यालय र सुदूरपश्चिम प्रदेश सरकारलाई समेत सहयोगका लागि आग्रह गरेको थियो । अनलाइन परीक्षा पूर्व विद्यार्थीहरुलाई अभ्यास पनि गराएको थियो ।

प्रकाशित : आश्विन ९, २०७७ २०:००
प्रतिक्रिया
पठाउनुहोस्

युवा वैज्ञानिक फोरमको स्थापना

कान्तिपुर संवाददाता

काठमाडौँ — नेपाल विज्ञान तथा प्रविधि प्रज्ञा प्रतिष्ठान (नाष्ट)ले विज्ञान-प्रविधिको विकास र प्रवर्द्धन गर्ने उद्देश्यले युवा वैज्ञानिक फोरम(वाईएसएफएन)को स्थापना गरेको छ ।

स्वदेश तथा विदेशमा रहेका नेपाली अनुसन्धानकर्ताहरुबीच समन्वय र सहकार्य विस्तार गर्दै विज्ञान क्षेत्रको विकास गर्ने उद्देश्यले फोरमको स्थापना गरिएको नाष्टले जनाएको छ ।

नाष्टले नेपाल स्वास्थ्य अनुसन्धान परिषद्का वैज्ञानिक मेघनाध धिमाल संयोजकत्वमा ७ सदस्सीय तदर्थ समिति गठन गरेको छ । समितिको सदस्यहरुमा त्रिवि रसायनशास्त्र विभागका सह-प्राध्यापक एवं अनुसन्धाकर्ता अच्युत अधिकारी, विश्व विद्यालय अनुदान आयोगको अनुसन्धान विभाग प्रमुख प्रमोद पौडेल, क्याटिलिस्ट टेक्नोलीजीको प्रमुख एवं जडिबटी अनुसन्धानकर्ता प्रतिभा पाण्डे, फ्रेस वाटर इकोलोजिस्ट एवं काठमाडौं विश्वविद्यालयकी उपप्राध्यापक रामदेवी तचामो साह, इसिमोडका जलवायु विज्ञ सन्तोष नेपाल र माइक्रोबाइलोजिस्ट एवं अनुसन्धानकर्ता योगेन्द्र साह रहेका छन् । समितिका सबै सदस्यहरुले विद्यावारिधि गरेका छन् ।

फोरमले अनुसन्धानको क्षेत्रमा नयाँ युवा वैज्ञानिकहरुलाई सल्लाह सुझाव र प्लेटफर्म निर्माणका लागि मद्दत गर्ने, क्षेत्रगत अनुसन्धानमा सामेल गराउने लगायत छन् । फोरमलाई ७ वटै प्रदेशमा विस्तार गर्ने योजना रहेको संयोजक मेघनाध धिमालले बताए । फोरममा विज्ञानको मात्रै नभएर अनुसन्धान गर्ने सबै युवाहरु आबद्ध हुने पाउने धिमालले बताए ।

यो संस्था सरकारी संयन्त्रद्वारा गठित एक मात्र युवा वैज्ञानिक फोरम रहेको नाष्टले जनाएको छ । फोरमलाई विश्व युवा वैज्ञानिक प्रतिष्ठानको नेपाल च्याप्टरको पनि मान्यता पाएको फोरमकी सदस्य प्रतिभा पाण्डेले बताइन् ।

शुक्रबार शिक्षा विज्ञान तथा प्रविधि मन्त्री गिरिराजमणि पोखरेलले फोरमको औपचारिक उद्घाटन गर्दै शुभकामना दिएका थिए । नाष्टका उपकूलपति सुनिल बाबु श्रेष्ठले युवा वैज्ञानिक फोरमबाट युवा अनुसन्धानकर्ताहरुको अद्यवाधिक तथ्यांक संकलन गर्ने,युवा अनुसन्धानहरुलाई प्रोत्साहन गर्ने किसिमका कार्यक्रमहरु ल्याउन सुझाव दिएका छन् ।

प्रकाशित : आश्विन ९, २०७७ १९:४०
पूरा पढ्नुहोस्
प्रतिक्रिया
पठाउनुहोस्
×