आँट गरेर भाग्दा बेचिनबाट जोगिइन्- समाचार - कान्तिपुर समाचार
कान्तिपुर वेबसाईट
AdvertisementAdvertisement

आँट गरेर भाग्दा बेचिनबाट जोगिइन्

गिरोहको योजना असफल, तीन जना पक्राउ
जितेन्द्र साह

विराटनगर — आफूलाई बेच्न लगेको थाहा पाएपछि आँट गरेर एक १७ वर्षीया किशोरीले गुडिरहेको अटोरिक्साबाट हाम फालेर ज्यान जोगाएकी छन् । पूजामा सहभागी भएबापत ५ हजार रुपैयाँ दक्षिणा र नयाँ मोबाइल पाउने प्रलोभन देखाई उनलाई भारत लगेर बेच्न खोजिएको प्रहरीले जनाएको छ । सो योजनामा संलग्न एक युवतीसहित तीन जना पक्राउ परेका छन् ।

बलि दिन, मानव अंगको तस्करी वा देह व्यापारका सञ्जाललाई बेच्न लगेको कोणबाट उनीहरूमाथि अनुसन्धान भइरहेको प्रहरी उपरीक्षक सन्तोष खड्काले बताए । पक्राउ पर्नेमा सुनसरीको रामधुनी नगरपालिका–५ शान्ति टोलमा डेरा गरी बस्दै आएकी मोरङको लेटाङ नगरपालिका–३ ऐश्वर्य टोलकी २२ वर्षीया मनिका ढकाल, सप्तरीको विष्णुपुर गाउँपालिका–५ मझाउका २८ वर्षीय सुमितकुमार मण्डल र सप्तरीको तिलाठी कोइलाडी गाउँपालिका–१ तोपाका २० वर्षीय प्रदीपकुमार मण्डल छन् । तीनै जनाविरुद्ध मंगलबार मोरङ जिल्ला अदालतमा मानव बेचबिखन तथा ओसारपसार ऐन २०६४ अनुरूप म्याद थप गरी अनुसन्धान सुरु गरिएको छ । पीडितको जाहेरीअनुसार भारतसम्म संलग्नको खोजी जारी रहेको एसपी खड्काले बताए ।

नेपाल–भारत सीमास्थित विराटनगर–१७ इस्लामपुरबाट एक गैरसरकारी संस्था ‘साना हातहरू’ नेपालको सहयोगमा प्रहरीले उनीहरूलाई पक्राउ गरेको हो । घटनाको मुख्य योजनाकार सुमित भएको तथा उनैले साथी प्रदीपकुमार र फेसबुकमार्फत मित्र बनेकी मनिकालाई प्रयोग गरेको एसपी खड्काले बताए । सुमितले प्रहरीमा दिएको बयानअनुसार मानव बेचबिखनको यो अपराधमा भारत विहारको सहरसा जिल्लास्थित झिटकैयामा निर्माण ठेक्का व्यवसाय गर्ने उनका भिनाजु रन्धीर मण्डल र भिनाजुकै भाइ वीरेन्द्रको समेत संलग्नता रहेको छ । फारबिसगन्ज पुर्‍याएर ती किशोरीलाई भिनाजु र उनका भाइको जिम्मा लगाउने योजना रहे पनि बीचमै उनीहरूबीच मोबाइल सम्पर्क विच्छेद भएको सुमितले बयानमा भनेका छन् ।

फारबिसगन्ज पुगेपछि आफूलाई बेच्न लागेको पक्कापक्की भएपछि ती किशोरी रुँदै उक्त अटोबाट ओर्लेर नेपालतर्फ फर्कन लाग्दा सुमित र मनिका पनि सम्झाउँदै पछिपछि आएको प्रहरीले जनाएको छ । आमासँग सोधेर दुई घण्टाका लागि विराटनगर आए पनि साँझ भइसकेको हुनाले आफू त्यतिबेला निकै डर र चिन्तामा रहेको किशोरीले प्रहरीलाई बताएकी छन् । एक दिन विराटनगरमा बस्ने र अर्को दिन पुन: फारबिसगन्ज पुर्‍याउने योजनासहित सुमित र मनिकाले जबर्जस्ती एउटा टेम्पोमा ती किशोरीलाई चढाएका थिए । आफूहरूलाई लिन उनीहरूले विराटनगरमै रहेका सहयोगी प्रदीपकुमारलाई सीमामा बोलाएका थिए । तर, विराटनगर–जोगवनी सीमा नजिक आउने क्रममा नेपाल प्रहरीलाई देखेपछि घर पुगिन्छ भन्ने आफूमा आँट आएको र अटोरिक्साबाट हाम फालेर प्रहरी र साना हातहरू संस्थाको सम्पर्कमा पुगेको किशोरीले प्रहरीसँगको बयानमा भनेकी छन् ।


प्रकाशित : आश्विन ७, २०७७ १९:५४
प्रतिक्रिया
पठाउनुहोस्

नेपाल-चीनबीच सीमा समस्या छैन : परराष्ट्रमन्त्री ज्ञवाली 

'हुम्लामा सीमाभन्दा १ किलोमिटर टाढा चीनका संरचना'
कान्तिपुर संवाददाता

काठमाडौँ — नेपाल र चीनबीच सीमा समस्या नभएको परराष्ट्रमन्त्रीसमेत रहेका सरकारका प्रवक्ता प्रदीपकुमार ज्ञवालीले बताएका छन् । हुम्लामा नेपाली भूमि मिचेर चीनले भौतिक संरचना निर्माण गरेको भनेर आएका समाचारप्रति सरकारको ध्यानाकर्षण भएको भन्दै मन्त्री ज्ञवालीले त्यसमा सत्यता नभएको बताएका हुन् । 

मन्त्रिपरिषद्ले गरेका निर्णय सार्वजनिक गर्न बुधबार सिंहदरबारमा आयोजित पत्रकार सम्मेलनमा मन्त्री ज्ञवालीले भने, 'नेपालको हुम्ला जिल्लाको लिमी उपत्यकामा चीनले नेपालमा घर बनाएको भनेर समाचार सम्प्रेषण भएका छन् । यस विषयमा सरकारको गम्भीर ध्यानाकर्षण भएको छ । स्थलगत अध्ययनका लागि टोली गएको छ ।'

उक्त क्षेत्रमा चीनले सीमाभन्दा १ किलोमिटर टाढा चिनियाँ भूमिमा संरचना निर्माण गरेको पनि मन्त्री ज्ञवालीको भनाइ थियो । 'यस्तैखालका समाचार सम्प्रेषण २०७३ सालमा पनि भएको रहेछ । त्यतिबेला अन्तरमन्त्रालय छानबिन समिति खडा गरेर त्यसले स्थलगत अध्ययन गरेर आएको प्रतिवेदनमा एक किलोमिटर चिनियाँ भूभागमा संरचना बनाएको पाइएको रहेछ,' उनको भनाइ थियो ।

'नेपाल-चीन बीचमा सीमा समस्या छैनन् । कहिँकतै छन् भने त्यस्तो समाधान गर्ने संयन्त्र छन्,' मन्त्री ज्ञवालीको आग्रह थियो । दुई देशबीचको सीमाबारेका समाचारलाई पुष्ट्याइँ गरेर मात्रै सम्प्रेषण गर्न पनि उनको आग्रह थियो । सीमाका विषय संवेदनशील भएको कुरा बुझिदिनुपर्ने उनको भनाइ थियो ।

सीमा नजिकै चीनले संरचना निर्माण गरेको भनिएपछि निरीक्षणका लागि हुम्लाबाट सरकारी अधिकारी र सुरक्षा निकायका प्रतिनिधि गएको पनि मन्त्री ज्ञवालीले जानकारी दिए । उनले थप विषय उक्त टोली आएपछि पत्ता लाग्ने बताए ।

त्यस्तै, रसुवाको तातोपानी नाकामा रोकिएका नेपालका सामग्री आयातका लागि चिनियाँ प्रतिनिधिसँग कूटनीतिक संवादमार्फत समस्या समाधान गरिएको पनि मन्त्री ज्ञवालीले जानकारी दिएका छन् । उनले पहिलो खेपमा बुधबार बीसीजी लगायतका खोप नेपाल ल्याइएको बताए । आगामी दिनमा पनि निरन्तर कूटनीतिक माध्यमबाट चीनसँगको सम्बन्ध अगाडि बढाइने उनको भनाइ थियो ।

प्रकाशित : आश्विन ७, २०७७ १९:४५
पूरा पढ्नुहोस्
प्रतिक्रिया
पठाउनुहोस्
×