कोभिड अस्थायी अस्पताल सञ्‍चालनका लागि स्थानीय तहलाई १० लाख- समाचार - कान्तिपुर समाचार

कोभिड अस्थायी अस्पताल सञ्‍चालनका लागि स्थानीय तहलाई १० लाख

कान्तिपुर संवाददाता

काठमाडौँ — स्वास्थ्य तथा जनसंख्या मन्त्रालयले स्थानीय तहमा अस्थायी कोभिड अस्पताल सञ्चालनका लागि १० लाख रुपैयाँ बजेट उप्लब्ध गराउने भएको छ । स्थानीय तहमा कोभिड १९ अस्थायी अस्पताल सञ्चालनसम्बन्धी मार्गदर्शन २०७७ जारी गर्दै स्वास्थ्य तथा जनसंख्या मन्त्रालयले ६ सय ४९ वटा स्थानीय तहलाई बजेट उपलब्ध गराउने जनाएको छ ।

हरेक स्थानीय तहलाई आइभि स्ट्यान्ड बेड रसाइड लकरसहितको बेडका लागि ५ लाख, औषधिका लागि ५० हजार र करारमा एक जना चिकित्सक, दुई जना स्टाफ नर्स र असिस्टेन्ट एक जनाका लागि ४ लाख ५० हजार छुट्याएको मार्गदर्शनमा उल्लेख छ । तत्काल बजेट नपुगेको खण्डमा सम्बन्धित स्थानीय तहले आफैं व्यवस्था गनुपर्ने मन्त्रालयले जनाएको छ ।

त्यसैगरी उपलब्ध गराइएको बजेटको परिधिभित्र रही जनशक्तिलगायत व्यवस्थापन सम्बन्धित स्थानीय तहबाटै नै गर्ने/गराउने र अस्पतालमा सहयोगी स्थानीय तह वा अन्तर्गत कार्यरत मध्येबाट खटाउन सम्भव नभएको अवस्थामा करारमा लिनुपर्ने बताइएको छ ।

चिकित्सक, स्वास्थ्यकर्मी र कर्मचारी करारमा लिनु नपर्ने भएमा सो प्रयोजनका लागि विनियोजित बजेटबाट सम्बन्धित स्थानीय तहको कार्यपालिकाको निर्णयले अस्पतालका लागि आवश्यक औजार, उपकरण खरिद गर्न सकिने मन्त्रालयले जनाएको छ ।

कोभिड अस्थायी अस्पताल पछि ५, १० र १५ शय्याको अस्पतालमा रुपान्तरण हुने भएकाले अस्थायी अस्पताल सोही स्थानमा सञ्चालन गर्नुपर्ने मार्गनिर्देशनमा उल्ल्लेख गरिएको छ ।


प्रकाशित : आश्विन १, २०७७ १९:०३
प्रतिक्रिया
पठाउनुहोस्

काठ चोरीको आरोपमा उदयपुरमा ३ युवक पक्राउ

डिल्लीराम खतिवडा

उदयपुर — अवैध रुपमा काठ चोरी तस्करी को आरोपमा पक्राउ परेका ३ युवकलाई बिहीबार डिभिजन वन कार्यालय गाईघाटमा बुझाइएको छ । बेलका नगरपालिका–९ स्थित माछापुच्छ्रे सामुदायिक वन उपभोक्ता समूहमा अवैध रुपमा काठ काटेको भन्दै बुधबार ती युवकलाई प्रहरीले पक्राउ गरेको हो ।

इलाका प्रहरी कार्यालय रामपुरठोक्सीलाबाट गएको प्रहरी टोलीले बेलका–४ गुरुङचौरीका ३५ वर्षीय अर्जुन राई, बेलका–९ कमलाबारीका ३० वर्षीय दीपेन्द्र राई र २२ वर्षीय राकेश राई पक्राउ गरेको प्रहरी उपरीक्षक भिमबहादुर दाहालले बताए । पक्राउ परेका युवकलाई प्रहरीले डिभिजन वन कार्यालयमा बुझाएको सूचना अधिकारी सहायक वन अधिकृत जागेश्वर साहले बताए ।

वन कार्यालयले हिरासतमा रहेका उनीहरुको विषयमा थप अनुसधान गरिरहेको सूचना अधिकारी साहले बताए ।

प्रकाशित : आश्विन १, २०७७ १८:५७
पूरा पढ्नुहोस्
प्रतिक्रिया
पठाउनुहोस्
×