होटल र आन्तरिक उडान असोज १ गतेदेखि खुल्ने- समाचार - कान्तिपुर समाचार

होटल र आन्तरिक उडान असोज १ गतेदेखि खुल्ने

कान्तिपुर संवाददाता

काठमाडौँ — सरकारले होटल तथा रेष्टुरेन्टहरु असोज १ गतेदेखि खुला गर्न दिने निर्णय गरेको छ । सोमबार बसेको मन्त्रिपरिषद् बैठकले असोज १ गतेदेखि होटल तथा रेष्टुरेन्ट खुला गर्ने निर्णय गरेको हो । 

स्वास्थ्य सुरक्षाका मापदण्ड अपनाएर होटलहरुलाई खुला गर्न दिने निर्णय भएको परराष्ट्रमन्त्री प्रदीप ज्ञवालीले बताए ।

यस्तै, असोज १ गतेदेखि आन्तरिक उडान खुला गर्ने निर्णय पनि सरकारले गरेको मन्त्री ज्ञवालीले बताएका छन् ।

सरकारले लामो दूरीको यातायातका साधन असोज १ गतेदेखि नै खुला गर्ने पनि निर्णय गरेको छ । यातायात तथा हवाइ उडानमा स्वास्थ्य सुरक्षा अपनाउन भनिएको छ ।

हवाइ उडानमा ५० प्रतिशत मात्रै यात्रु बोक्न पाइने, प्रत्येक १ सिटमा १ जना मात्रै राख्न पाइने, स्यानिटाइर र मास्कको अनिवार्य प्रयोग गर्नुपर्ने छ । भाडाको दर पर्यटन मन्त्रालयले तोकेअनुसार हुने निर्णय मन्त्रिपरिषद्‌ले गरेको छ ।

आन्तरिक उडान र लामो दुरीका सवारीसँगै असोज १ बाट नै होटल, रेष्टुरेण्ट, ट्रेकिङ तथा ट्राभल व्यवसाय पनि सञ्चालन गर्न सकिने मन्त्री ज्ञवालीले बताए ।

प्रकाशित : भाद्र ३०, २०७७ १९:०३
प्रतिक्रिया
पठाउनुहोस्

एसिड पीडितको आजीवन उपचार खर्च सरकारले व्यहोर्ने

४ वटा अस्पताललाई डेडिकेटेड तोकियो
कान्तिपुर संवाददाता

काठमाडौँ — सरकारले एसिड आक्रमणको कसुर सजाय र सुनवाई सम्बन्धि विशेष व्यवस्था गर्दै पीडितहरुको आजीवन उपचार खर्च आफैं व्यहोर्ने भएको छ ।

सोमबार बसेको मन्त्रिपरिषद् बैठकले पीडितको निःशुल्क उपचार र स्वास्थ्य क्षतिसँग सम्बन्धित प्रयोग गर्नुपर्ने आजीवन औषधि खर्च सरकारले व्यहोर्ने निर्णय गरेको परराष्ट्रमन्त्री प्रदीप ज्ञवालीले बताएका छन् ।

बैठकले एसिड आक्रमणमा परेका पीडितहरुको तत्काल सम्भव हुने अस्पतालमा उपचार गराउने र थप उपचारका प्राथिमकताका साथ रिफर गर्नुपर्ने निर्णय गरेको छ । एसिड आक्रमणमा परेका पीडितहरुको उपचारका लागि शिक्षण अस्पताल, वीर अस्पताल,पाटन अस्पताल र कीर्तिपुर अस्पताललाई डेडिकेटेड अस्पताल सरकारले तोकेको हो । यसको संयोजन र सहजीकरण स्वास्थ्य मन्त्रालयले गर्ने उनले बताए ।

बैठकले एसिड आक्रमण सम्बन्धीको प्रचलित कानूनलाई संशोधन गर्न, उत्पादन,आयात, बिक्री वितरण सम्बन्धी नयाँ ऐन तर्जुमा गर्ने निर्णय पनि गरेको छ । कानुन आयोगलाई मस्यौदा तयार गर्नका लागि १५ दिनको म्याद दिइएको उनले बताए ।

यस्तै, प्रत्येक वर्षको भदौ २५ गते एसिड आक्रमण विरुद्धको जागरण दिवस मनाउने निर्णय पनि बैठकले गरेको छ ।

पीडितहरुको निःशुल्क शिक्षाको व्यवस्था गर्ने निर्णय पनि सरकारले गरेको छ । यसको जिम्मा शिक्षा मन्त्रालयललाई दिइएको छ ।

यस्तै, पीडितहरुको क्षमता र सीप विकास,रोजगारी,अनुदान उपलब्ध गराउन सम्बन्धित मन्त्रालयहरुलाई तोकिएको छ ।

मुख्य सचिवको संयोजक्‍तवमा विभिन्न‍ मन्त्रालयका सचिव रहने गरि समन्वय गर्नका लागि बैठकले समिति गठन गर्ने निर्णय पनि गरेको मन्त्री ज्ञवालीले मंगलबारको पत्रकार सम्मेलनमा बताएका छन् ।

यो पनि पढ्नुहोस्ः

एसिड छ्याप्‍नेलाई २० वर्ष कैद !

प्रकाशित : भाद्र ३०, २०७७ १८:४५
पूरा पढ्नुहोस्
प्रतिक्रिया
पठाउनुहोस्
×