वामदेवलाई राष्ट्रियसभामा सिफारिस गर्न ओली तयार

फागुन १४ मा बसेको सचिवालयको बैठकले गौतमलाई राष्ट्रिय सभामा पठाउने औपचारिक निर्णय गरेको थियो । तर, बैठक सकिएको केही बेरपछि नै प्रधानमन्त्रीले उक्त निर्णय नमान्ने बताएका थिए । त्यसयता त्यो निर्णय कार्यान्वयन हुन सकेको थिएन ।

ओलीले अर्थमन्त्री युवराज खतिवडालाई नै निरन्तरता दिन खोजेका थिए । तर, गौतम आफैँले राष्ट्रियसभामा जाने चाहना व्यक्त गरेपछि ओली दबाबमा परेका थिए ।

यस्तै, राष्ट्रिय सभाका कुनै एक मनोनित सदस्यलाई फिर्ता बोलाएर खतिवडालाई निरन्तरता दिने भन्ने बिषयबारे संचारकर्मीले सोधेको प्रश्नमा प्रवक्ता श्रेष्ठले त्यसबारे प्रधानमन्त्रीले केही नभनेको बताए ।

बैठकमा कार्यदल प्रतिवेदनमा छलफल गरी ठोस कार्ययोजना बनाई प्रस्ताव प्रस्तुत गरिने पनि प्रवक्ता श्रेष्ठले बताए । उनले स्थायी कमिटी बैठक उपयुक्त समयमा छिटोभन्दा छिटो बोलाइने जानकारी दिए ।

‘कार्यदलबाट प्रस्तुत प्रतिवेदनका महत्त्वपूर्ण सुझावलाई आधार बनाएर साथै आज सचिवालय बैठकमा व्यक्त विचारलाई ध्यान दिई अध्यक्ष कमरेडहरुले पार्टी, सरकारका सन्दर्भमा र स्थायी कमिटीको चालु बैठकमा प्रस्तुत कार्यसूचीका सम्बन्धमा निर्णय गर्न आवश्यक प्रस्ताव तयार गर्न गृहकार्य गर्नुहुनेछ,’ प्रवक्ता श्रेष्ठले भने, 'उपयुक्त समयमा स्थायी कमिटी बैठक राखिने छ । स्थायी कमिटी बैठकमामा समेत छलफल हुनेछ । त्यहाँ भएको छलफल र सुझावलाई ध्यान दिई अध्यक्ष कमरेडले नयाँ ठोस कार्ययोजनासहितको निर्णय प्रस्तावलाई अन्तिम मस्यौदाको रुप दिई सचिवालयमा प्रस्तुत गर्नुहुनेछ ।’

श्रेष्ठका अनुसार उक्त मस्यौदा सचिवालयबाट स्थायी कमिटी बैठकमा निर्णयार्थ पेश गरिने छ ।

बैठकले बागलुङ जिल्लाको ढोरपाटनमा बाढीबाट हुन गएको क्षतिप्रति दुख व्यक्त गरेको छ । साथै सरकालाई उद्धार, राहत र पुर्नस्थपनाको कामलाई तीव्रतापूर्वक व्यवस्थितरुपमा अगाडि बढाउन आग्रह गरेको छ । पार्टी कमिटीलाई उद्धार र राहतमा जुट्न निर्देशन गरेको पनि प्रवक्ता श्रेष्ठले बताए ।