कारागारमा कोभिड–१९ को संक्रमण फैलिएकोमा मानव अधिकार आयोगको चासो 

आयोगले त्यस सम्बन्धमा बुधबार कारागार व्यवस्थापन विभागसँग पनि जानकारी लिएको छ । देशका ७१ वटा कारागारहरुमा हाल २१ हजारभन्दा बढी कैदी–बन्दी रहेका छन् ।

देशका अधिकांश कारागारहरुमा क्षमताभन्दा अधिक संख्यामा विगत लामो समयदेखि कैदी–बन्दीहरु रहेको आयोगको यसअघिको अनुगमनहरुबाट पाइएको आयोगले जनाएको छ । ‘कोभिड–१९ को संक्रमण बढेसँगै कारागारहरुमा अत्यधिक संख्यामा रहेका कैदी–बन्दीहरुले असुरक्षित महसुस गरी स्वास्थ्य सुरक्षा र जीवन रक्षाको लागि आयोगसमक्ष अनुरोध गरेका छन् । कारागारको सुरक्षार्थ खटिएका सुरक्षाकर्मी र कर्मचारीहरुमा समेत त्रास सिर्जना भएको पाइएको छ । बिरामी भएका कैदी–बन्दीलाई उपचार गर्न लैजाादा तथा कारागारभित्र नयाँ कैदी–बन्दी भित्रिँदासमेत कोरोनाको जोखिम उच्च रहने देखिन्छ,’ विज्ञप्तिमा भनिएको छ ।

आयोगले क्षमताभन्दा अधिक संख्यामा कैदी–बन्दी रहेका कारागारहरुमा कोभिड–१९ को संक्रमणप्रति संवेदनशील भई कैदी–बन्दी, सुरक्षाकर्मी तथा कर्मचारीहरुको स्वास्थ्य सुरक्षामा उच्च सतर्कता अपनाउन पनि सरकारलाई आग्रह गरेको छ । ‘नयाँ कैदी–बन्दीको पीसीआर परीक्षण गरिए पनि पछि पनि संक्रमण हुन सक्ने संभावना रहेकोले कारागारमा पठाइने नयाँ कैदी–बन्दीलाई निश्चित अवधिका लागि अन्य कैदी–बन्दीहरुबाट छुट्टै राख्ने व्यवस्था गरी कारागारभित्र रहेका कैदी–बन्दीहरुको स्वास्थ्यसम्बन्धी हक र बाँच्न पाउने अधिकार संरक्षण गर्न, गराउन पनि आयोग नेपाल सरकारलाई आग्रह गर्दछ,’ विज्ञप्तिमा उल्लेख छ ।