अभिनेत्री र पत्रकारबीच पेशागत मर्यादामा रहने समझदारी- समाचार - कान्तिपुर समाचार

अभिनेत्री र पत्रकारबीच पेशागत मर्यादामा रहने समझदारी

कान्तिपुर संवाददाता

काठमाडौँ — अभिनेत्री पूजा शर्मा र संचारकर्मी प्रकाश सुवेदीबीच आगामी दिनमा आपसी सद्भाव बिगर्न नदिने सम्बन्धमा पेशागत मर्यादामा रहने सम्झौता भएको छ । एपीवान टेलिभिजनबाट साउन २२ गते प्रसारित कार्यक्रममा सुवदीले प्रयोग गरेको शब्दले मानहानी भएको भन्दै पूजाले चलचित्र सम्बन्धी संघसंस्थामा उजुरी दिएकी थिइन् ।

सुवेदीले उनको नाम नलिइकन 'दाह्रा आएकी हिरोइन' भन्ने टिप्पणी गरेका थिए । विवाद टुङ्गिएको कलाकार संघका अध्यक्ष रवीन्द्र खड्काले बताए । बुधबार टिभीका अधिकारीको रोहवरमा पूजा र सुवेदीबीच सहमति भएको हो । विरोध हुनथालेपछि र शर्माले उजुरी दिएपछि सुवेदीले माफी मागेका थिए ।

पछिल्लो समय चलचित्रसँग सम्बन्धित सात संस्थाले सुवेदीको कार्यक्रममा सहभागी नहुन आव्हान गर्दै संयुक्त विज्ञप्ति नकालेका थिए । विज्ञप्तिको विवादपछि नै आफूहरुले सहमति गराइदिएको अध्यक्ष खड्का बताउँछन् । उनले भने, 'बहिस्कार गरेको हल्ला फैलियो । हामीले बहिस्कार गरेका पनि थिएनौं । कलाकार र पत्रकारबीच नराम्रो होला भनेर सहमतिमा गयौं । उहाँले बारम्बार माफी माग्नुभयो । आइन्दा यस्तो गल्ती नगर्ने भनेर सहमति भएको छ ।'

प्रकाशित : भाद्र ४, २०७७ १६:१०
प्रतिक्रिया
पठाउनुहोस्

काठमाडौंमा लुटपाट गर्न धनुषामा योजना

कान्तिपुर संवाददाता

काठमाडौँ — राजधानीका विभिन्न स्थानमा डकैती र लुटपाट गर्न आपराधिक गिरोहले धनुषामा बसेर योजना बनाउने गरेको खुलेको छ ।

काठमाडौं माछापोखरीबाट हतियार र गोलीसहित पक्राउ परेका दुई आरोपितको बयानका आधारमा धनुषाबाट अपराध योजना बनाउने शम्भु कार्कीलाई केहीबेर अघि महानगरीय अपराध महाशाखाको सूचनाका आधारमा इलाका प्रहरी कार्यालय ढल्केबाट खटिएको प्रहरी टोलीले कार्कीलाई जिल्लाको धारापानी भन्ने स्थानबाट पक्राउ गरेको हो ।

बिहीबार महाशाखाले अमेरिकन २ थान पेस्तोल, म्याग्जिन र १० राउन्ड गोलीसहित नुवाकोट शिखरबेसीका २७ वर्षीय विकेश पण्डित र लिपुका २८ वर्षीय अमर तामाङलाई पक्राउ गरेको थियो ।

तामाङ डाँका मुद्दामा ६ वर्ष २ महिना जेल बसेर गएको फागुनमा मात्रै छुटेका थिए । छुटे लगत्तै उनी पुनः अपराध धन्दामा सक्रिय भएको खुलेको छ । तामाङलगायत समूहलाई अपराधमा परिचालन गर्ने मुख्य योजनाकार नै धनुषाका शम्भु कार्की थिए ।

उनी काठमाडौंमा तामाङको समूहलाई हतियार उपलब्ध गराउने मुख्य व्यक्ति पनि हुन् । सिन्धुलीको साविक टाँडी–५ घर भएका उनी पछि धनुषामा बस्दै आएका थिए । महाशाखाका अनुसार उनलाई काठमाडौं ल्याउने तयारी भइरहेको छ ।

प्रकाशित : भाद्र ४, २०७७ १६:०३
पूरा पढ्नुहोस्
प्रतिक्रिया
पठाउनुहोस्
×