कोरोनाका लागि २० प्रतिशत बेड नछुट्याउने अस्पतालको पीसीआर अनुमति खारेज :  स्वास्थ्य मन्त्रालय- समाचार - कान्तिपुर समाचार

कोरोनाका लागि २० प्रतिशत बेड नछुट्याउने अस्पतालको पीसीआर अनुमति खारेज :  स्वास्थ्य मन्त्रालय

कान्तिपुर संवाददाता

काठमाडौँ — कोरोना संक्रमितका उपचारका लागि निजी अस्पतालहरुले २० प्रतिशत बेड नछुट्याए पीसीआर परीक्षणका लागि दिइएको अनुमति खारेज गरिने भएको छ । 

स्वास्थ्य तथा जनसंख्या मन्त्रालयमा बुधबार आयोजित कोभिड १९ नियमित प्रेस ब्रिफिङमा प्रवक्ता डा जागेश्वर गौतमले मेडिकल कलेजले एक तिहाइ बेड कोरोनाको उपचारका लागि छुट्याए उनीहरुले पीसीआर परीक्षणका लागि अनुमति पाउने पनि जानकारी गराए ।

केही समयअघि मन्त्रालयले कोभिड उपचारका लागि हरेक अस्पतालले २० प्रतिशत बेड र मेडिकल कलेजले एक तिहाइ आइसोलेसन बेड छुट्याउन निर्देशन दिएको थियो ।

प्रवक्ता गौतमले निजी अस्पतालहरुले कोरोना संक्रमितको उपचार गर्दिनँ भन्न नपाउने बताए । उनले भने, ‘आउने एक दुई वर्षमा कुनै पनि उपचार गर्ने अस्पतालले कोभिड बाहेकको मात्र उपचार गर्ने सम्भव छैन । जचाउन आउने ननकोभिड बिरामी पनि कोभिड संक्रमित हुन सक्छन् । त्यतिबेला अस्पतालले तुरुन्त रिफर गर्न सम्भावना कम हुन्छ । ’

डा गौतमका अनुसार अब सरकारी अस्पताल भरिभराउ हुने सम्भवाना छ । निजीले उपचार गर्दिनँ भन्न मिल्दैन । यो उनीहरुको जिम्मेवारी तथा बाध्यता हो । संक्रमण फैलिन्छ भन्ने कुरा छ तर अब अस्पताल नै बन्द गर्ने त ? उनले हब अस्पताल पनि भर्दा कोरोनाको बिरामी आफैं उपचार गर्नुपर्ने बताए ।

प्रकाशित : भाद्र ३, २०७७ १७:०७
प्रतिक्रिया
पठाउनुहोस्

प्रदेश १ मा एक सय २३ संक्रमित थपिए

देवनारायण साह

मोरङ — प्रदेश १ मा बुधबार १ सय २३ जना कोरोना संक्रमित थपिएका छन् ।

मोरङमा ६७, सुनसरीमा ३७, झापामा १६, पाँचथरमा १ र २ जना भारतका रहेको सामाजिक विकास मन्त्रालयले जनाएको छ । योसँगै प्रदेशमा कोरोना संक्रमितको संख्या २ हजार ३ सय ५५ पुगेको छ ।

ती मध्ये १ हजार १ सय ३५ जना संक्रमित निको भएर डिस्चार्ज भएका छन् । यस प्रदेशमा कोरोना संक्रमणले मृत्यु हुनेको संख्या १३ पुगेको छ । हाल सम्म ७२ हजार ४६ जनाको पीसीआर परीक्षण गरिएको सामाजिक विकास मन्त्रालयले जनाएको छ ।

यसैबीच प्रदेश १ को राजधानी विराटनगरमा बुधबार ५२ जना संक्रमित थपिएका छन् । योसँगै महानगरमा संक्रमितको संख्या ७ सय ४३ पुगेको छ । जसमा ८ जनाको मृत्यु भइसकेको छ भने ७६ जना निको भएर घर फर्केका छन् ।

प्रकाशित : भाद्र ३, २०७७ १६:५४
पूरा पढ्नुहोस्
प्रतिक्रिया
पठाउनुहोस्
×