उपत्यकाभित्र ३ दर्जन बढी सेवा र व्यापार सञ्चालनमा रोक- समाचार - कान्तिपुर समाचार

उपत्यकाभित्र ३ दर्जन बढी सेवा र व्यापार सञ्चालनमा रोक

जात्रा, भेला र विरोध जुलुस गर्न पनि नपाइने
मातृका दाहाल

काठमाडौँ — राजधानीका तीन जिल्लामा ३ दर्जन भन्दा बढी सेवा र व्यापार/व्यवसाय सञ्चालन गर्न रोक लगाइएको छ । काठमाडौं, भक्तपुर र ललितपुरको संयुक्त जिल्ला सुरक्षा समिति बैठकले कोरोना संक्रमण नियन्त्रण गर्न अर्को आदेश नभएसम्म यी क्षेत्रसँग सम्बन्धित व्यापार व्यवसाय र सेवा सञ्चालन गर्न नपाइने निर्णय गरेको हो ।

काठमाडौंका प्र्रमुख जिल्ला अधिकारी (प्रजिअ) जनकराज दाहालले खुल्ला स्थानमा मानिस भेला/जम्मा हुन, भीडभाड गर्न, सभा/जुलुस गर्न, जात्रा महोत्सव सञ्चालन, दैनिक नित्यपूजा बाहेक सम्पूर्ण धार्मिक गतिविधि, स्वास्थ्य मापदण्डविपरितका गतिविधि, धार्मिक तथा सांस्कृतिक कार्य सम्बन्धी जमघट लगायतलाई निषेध गरिएको बताए ।

त्यस्तै सबै प्रकारका सभा/गोष्ठी, तालिम, सेमिनार, हल/पार्टी प्यालेस, मनोरञ्जनस्थल, शैलुन, ब्युटीपार्लर, स्पा, स्वीमिङपुल, जीमखाना, समूहमा खेलिने खेलकुद, पुस्तकालय सञ्चालनमा पनि रोक लगाइएको दाहालले बताए । संयुक्त सुरक्षा बैठकले संग्रहालय, चिडियाखाना, फुटपाथ/खुल्ला ठाउँ र ठेलागाडा तथा साइकलबाट सञ्चालित व्यापार/व्यवसाय, कवाडी संकलन, स्वास्थ्य मापदण्ड विपरित श्रमिक/कामदार ओसारपसार तथा टेकवेबाहेक होटल/रेस्टुरामा पनि जमघट गर्न प्रतिबन्ध लगाएको छ ।

निर्णय कार्यान्वयन भए नभएको अनुगमन गर्न आवश्यकता अनुसार प्रशासनको टोली अनुगमनमा खटिने पनि प्रजिअ दाहालले बताए । उपत्यकाका तीनवटै प्रशासनले यसअघि साउन २५ गतेदेखि भदौ ८ गतेसम्म अत्यावश्यक बाहेकका सबै सेवा स्थगन गरिसकेको छ ।

प्रकाशित : श्रावण ३०, २०७७ १८:२२
प्रतिक्रिया
पठाउनुहोस्

रुपन्देहीको भैरहवामा शनिबारदेखि लकडाउन

सन्जु पौडेल

तिलोत्तमा — सिद्धार्थनगर क्षेत्रभित्र कोरोना भाइरसको संक्रमण फैलिँदै गएपछि सिद्धार्थनगर नगरपालिकाले भैरहवामा भदौ ५ गतेसम्म लकडाउन गर्ने निर्णय गरेको छ । नगरपालिकाको कोरोना भाइरस उपचार, रोकथाम, नियन्त्रण समितिले साउन ३१ गते राति १२ बजेदेखि भदौ ५ गतेसम्म सम्पूर्ण नगर क्षेत्रलाई लकडाउन गर्ने निर्णय गरेको हो ।

लकडाउनको अवधिमा स्वास्थ्य सेवा, दमकल, सरसफाई तथा अन्य अत्यावश्यक सेवा संचालन हुने नगरप्रमुख हरि प्रसाद अधिकारीले बताए ।

नगरपालिकाका अनुसार स्वास्थ्य सम्बन्धी सबै कार्य, दमकल, विद्युत्, सरसफाई, खानेपानी र अत्यावश्यक सेवा सञ्चालन गर्ने जनप्रतिनिधि, कर्मचारीले प्रयोग गर्ने सवारीसाधन साथमा परिचयपत्र हुनुपर्नेछ । त्यस्तै खाद्यान्न, तरकारी, फलफूल, दूध तथा दुधजन्य पदार्थको बिक्रीवितरण आवश्यक दूरी कायम गरी बिहान ६ देखि ९ बजेसम्म र साँझ ५ देखि ७ बजेसम्म सञ्चालन गरिने नगरपालिकाले जनाएको छ ।

बैंक, वित्तीय संस्था, सहकारी संस्थाले कमभन्दा कम कर्मचारीमार्फत विद्युतीय माध्यमबाट मात्र सेवा सञ्चालन गर्ने र काउण्टर सर्भिस बन्द हुने नगरप्रमुख अधिकारीले बताए ।

लकडाउनको अवधिमा सिद्धार्थ राजमार्ग हुँदै जाने सवारीसाधन नगर क्षेत्रभित्र रोक्न नपाइने र खाद्यजन्य पदार्थको लोड र अनलोड गर्ने ढुवानीका साधनले सुरक्षा अपनाई सुरक्षाकर्मीको रोहवरमा बेलुकी ७ देखि ११ बजेसम्म मात्र गर्ने पाउनेछन् ।

सिद्धार्थनगर क्षेत्र भित्रका नापी, मालपोत, आन्तरिक राजस्व कार्यालय र अन्य सरकारी कार्यालय सम्बन्धित कार्यालय प्रमुखले अत्यावश्यक सेवाका लागि मात्र आवश्यक कर्मचारी मात्र उपस्थित हुने गरी आवश्यक व्यवस्थापन मिलाइने नगरप्रमुख अधिकारीले जानकारी दिए ।

लकडाउन अवधि सुरु हुनु अघि नै सिद्धार्थनगरमा आउनुपर्ने व्यक्तिहरु आइसक्न र सिद्धार्थनगर छोड्ने व्यक्तिले छोडिसक्न नगरपालिकाले आग्रह गरेको छ ।

प्रकाशित : श्रावण ३०, २०७७ १८:१८
पूरा पढ्नुहोस्
प्रतिक्रिया
पठाउनुहोस्
×