चौरजहारीमा मारिएका युवाका परिवारलाई १० लाख दिने सरकारको निर्णय- समाचार - कान्तिपुर समाचार

चौरजहारीमा मारिएका युवाका परिवारलाई १० लाख दिने सरकारको निर्णय

कान्तिपुर संवाददाता

काठमाडौँ — पश्चिम रुकुमको चौरजहारी नगरपालिका-८ मा जेठ १० गते भएको घटनामा मृत्यु भएका ६ जना युवाको परिवारलाई १०-१० लाख रुपैयाँ आर्थिक सहायता दिने सरकारले निर्णय गरेको छ । सोमबार बसेको मन्त्रिपरिषद्का निर्णय मंगलबार सार्वजनिक गर्दै सरकारका प्रवक्ता अर्थ तथा सूचना र प्रविधि मन्त्री युवराज खतिवडाले यस्तो जानकारी दिएका हुन् ।

दलित युवाले कथित उपल्लो जातिकी केटी भगाउन खोजेको भन्दै गाउँलेले गरेको आक्रमणमा परि जाजरकोटको भेरी नगरपालिकाका नवराज विक लगायतका युवाको ज्यान गएको थियो । उनीहरुको शव केही दिनको अन्तरमा भेरीमा भेटिएको थियो । यो घटनामा नवराज विक, गणेश बुढामगर, सन्दिप विक, लोकेन्द्र सुनार, टीकाराम सुनार र गोविन्द शाहीले ज्यान गुमाएका थिए ।

यस्तै सरकारले घटनाका घाइते १२ जनालाई उपचारमा लागेको खर्च बराबरको रकम उपलब्ध गराउने पनि निर्णय गरेको छ ।

प्रकाशित : श्रावण २७, २०७७ १७:५२
प्रतिक्रिया
पठाउनुहोस्

भक्तपुरमा केमिकल कारखानामा आगलागी

कान्तिपुर संवाददाता

भक्तपुर — मध्यपुर थिमि नगरपालिका-६ निकोसेरास्थित युनाइटेड केमिकल प्रालिमा आगलागी भएको छ । सेनिटाइजर, साबुन, हार्डपिक, गिल्सरिन बनाउँदै आएको कारखानामा मंगलबार दिउँसो आगलागी भएको प्रहरीले जनाएको छ । 

आगलागीबाट कारखानाको टहरा पूर्णरुपमा क्षति भएको छ । जुद्ध बारुद यन्त्र भक्तपुर, नेपाल प्रहरी, सशस्त्र प्रहरीको सहयोगमा आगो निभाइएको हो ।

आगलागीबाट ७० लाख रुपैयाँ बराबरको क्षति भएको प्रालिका सञ्‍चालक अर्जुन श्रेष्ठले बताए ।



तस्बिर : अंगद ढकाल, कान्तिपुर ।






प्रकाशित : श्रावण २७, २०७७ १७:५०
पूरा पढ्नुहोस्
प्रतिक्रिया
पठाउनुहोस्
×