कोरोनाका कारण मृत्यु हुनेको संख्या ७६ पुग्यो- समाचार - कान्तिपुर समाचार

कोरोनाका कारण मृत्यु हुनेको संख्या ७६ पुग्यो

कान्तिपुर संवाददाता

काठमाडौँ — पर्सा र बाँकेमा मृत्यु भएका दुई जनामा कोरोना संक्रमण पुष्टि भएको छ । पोखरा स्वास्थ्य विज्ञान प्रतिष्ठानको आईसीयूमा उपचाररत पोखरा महानगरपालिका–१९ का ६२ वर्षीय संक्रमितको पनि शनिबार राति मृत्यु भएको छ । योसँगै देशभर हालसम्म कोरोनाका कारण मृत्यु हुनेको संख्या ७६ पुगेको छ ।

वीरगन्जमा शुक्रबार राति अस्पताल चहार्दा–चहार्दै मृत्यु भएकी २० वर्षीया युवतीमा कोरोना संक्रमण रहेको पाइएको हो । नारायणी अस्पतालको प्रयोगशालामा गरिएको परीक्षणमा उनको रिपोर्ट पोजिटिभ आएको थियो । यस्तै, कोहलपुरस्थित नेपालगन्ज मेडिकल कलेज शिक्षण अस्पतालमा उपचारका क्रममा आइतबार मृत्यु भएकी ७० वर्षीया महिलामा पनि कोरोना पुष्टि भएको छ । कोहलपुर–२ की ती महिला निमोनिया भएपछि शुक्रबारदेखि अस्पतालमा उपचाररत थिइन् । उनको शुक्रबार स्वाब संकलन गरिएको थियो । आइतबार दिउँसो आएको पीसीआर परीक्षण रिपोर्टमा उनमा संक्रमण पुष्टि भएको शिक्षण अस्पतालका सहायक निर्देशक डा. दिनेश श्रेष्ठले बताए ।

‘उहाँको आइतबार ११ बजे मृत्यु भयो,’ उनले भने, ‘दिउँसो मात्र रिपोर्ट आयो ।’ उनका अनुसार मृतक महिलाको सम्पर्कमा आएका चिकित्सक, नर्स र सफाइ कर्मचारी गरी ८० जनालाई क्वारेन्टाइनमा राखिएको छ । यसअघि बाँकेमा मात्रै कोरोनाबाट २ जनाको मृत्यु भइसकेको छ ।

उता, पोखरा स्वास्थ्य विज्ञान प्रतिष्ठानमा मृत्यु भएका पुरुषको कन्ट्याक्ट ट्रेसिङपछि गरिएको परीक्षणमा थप ६ जनामा कोरोना देखिएको पोखरा महानगर स्वास्थ्य महाशाखा प्रमुख हेमन्त शर्मा पौडेलले बताए । यसअघि नै मधुमेह रोगबाट पीडित उनी ज्वरो र रुघाखोकी लागेपछि आफैं अस्पताल गएका थिए । पौडेलका अनुसार उनको कुनै ‘ट्राभल हिस्ट्री’ थिएन । तर घरमै एक धार्मिक केन्द्र सञ्चालनमा ल्याई भजनकीर्तन गर्दै आएका थिए । उनको शव पोखरा–३२ मा व्यवस्थापन गरिएको छ । गण्डकी प्रदेशमा कोरोनाबाट मृत्यु हुनेको संख्या ५ पुगेको छ । यसअघि स्याङ्जाका २, बागलुङ र गोरखाका १/१ जनाको मृत्यु भएको थियो ।


प्रकाशित : श्रावण २५, २०७७ २२:१६
प्रतिक्रिया
पठाउनुहोस्

कोरोना रोकथाम अभियानमा सहयोग गर्न गृहमन्त्रालयको आग्रह

कान्तिपुर संवाददाता

काठमाडौँ — गृह मन्त्रालयले कोभिड-१९ संक्रमण रोकथाम तथा व्यवस्थापनको अभियानमा सहयोग गर्न अपील गरेको छ । मन्त्रालयले आइतबार विज्ञप्ति निकालेर जारी निर्देशनहरु र मापदण्डहरु पूर्ण पालना गर्दै कोरोना भाइरस संक्रमण रोकथाम तथा व्यवस्थापनमा साथ र सहयोगका लागि सबै पक्षसँग अपेक्षा राखिएको जनाएको हो ।

'जारी निर्देशनहरु र मापदण्डहरुको पूर्ण पालना गर्ने/गराउने कार्यमा आमनागरिकबाट सक्रिय र सकारात्मक सहयोगका लागि हार्दिक धन्यवाद व्यक्त गर्दै आगामी दिनमा पनि कोभिड-१९ संक्रमण रोकथाम तथा व्यवस्थापनको यस अभियानमा सबैबाट साथ र सहयोगको अपेक्षा गरिएको छ', विज्ञप्तिमा भनिएको छ ।

कोरोनाको बढ्दो संक्रमण नियन्त्रणका लागि जारी निर्देशनको कडाईपूर्वक कारबाही गर्ने कार्य निरन्तर जारी रहेको समेत मन्त्रालयले बताएको छ । यसअघि सरकारी विभिन्न निकायबाट जारी भएका निर्देशन, सुरक्षा मापदण्ड पालना नगर्ने करिब ४ लाख व्यक्ति र डेढ लाख यातायातका सधान कारबाही गरिएको छ । मन्त्रालयका अनुसार मास्क प्रयोग नगरी हिँड्ने करिब ३ लाख ९५ हजार जना व्यक्तिहरुलाई हालसम्म नियन्त्रणमा लिई सम्झाइबुझाई छाड्ने र कतिपयलाई जरिवानासमेत गरिएको छ । त्यस्तै अनुमतिबिना काठमाडौं उपत्यका प्रवेश गर्न खोज्‍ने करिब ७ हजार ६ सय सवारी साधन र करिब १९ हजार ४ सय यात्रुहरुलाई प्रवेश नाकाबाटै फिर्ता गरिएको छ ।

तोकिएको निर्देशनविपरीत सवारी चलाउने करिब १ लाख ३७ हजार दुई पाङ्‍ग्रे र चार पाङ्‍ग्रे सवारी साधनलाई होल्ड गरिएको समेत मन्त्रालयको विज्ञप्तिमा उल्लेख छ । पछिल्लो समय लागू गरिएको यातायातमा जोर बिजोर प्रणालीविपरीत सवारी चलाउने करिब ५ हजार ३ सय सवारी साधनलाई नियन्त्रण र होल्डिङमा राखी कारबाही गरिएको छ ।

प्रकाशित : श्रावण २५, २०७७ २२:०४
पूरा पढ्नुहोस्
प्रतिक्रिया
पठाउनुहोस्
×