अयोध्यामा मोदी आउने भएपछि सीमामा ‘हाई अलर्ट’- समाचार - कान्तिपुर समाचार

अयोध्यामा मोदी आउने भएपछि सीमामा ‘हाई अलर्ट’

मनोज पौडेल

कपिलवस्तु — भारतीय प्रधानमन्त्री नरेन्द्र मोदी अयोध्या आउने भएपछि रूपन्देही र कपिलवस्तुसँग सीमा जोडिएका भारतीय क्षेत्रमा उच्च सुरक्षा सतर्कता अपनाइएको छ ।

बाबरी मस्जिदका लागि अन्यत्रै जग्गा उपलब्ध गराउने गरी लामो समयदेखिको स्वामित्व विवादलाई अदालतले सल्ट्याइदिएपछि अयोध्यामा राम मन्दिर बन्दै छ । उक्त मन्दिरको शिलान्यासका लागि आगामी साउन २१ मा मोदी अयोध्या आउँदै छन् । उनी आउने भएपछि अवाञ्छित र आतंकी घुसपैठ नहोस् भनेर सीमामा उच्च सुरक्षा सतर्कता अपनाइएको हो ।

कपिलवस्तु र रूपन्देहीको सीमासँग जोडिएका भारतको सिद्धार्थनगर र महाराजगन्ज जिल्लामा सुरक्षा निकायलाई ‘हाई अलर्ट’ मा राखिएको छ । यी क्षेत्रबाट अयोध्या पुग्‍न सहज र नजिक भएकाले सुरक्षा निकायलाई सक्रिय बनाइएको हो । नेपाल–भारत सीमानाकामा एसएसबीका तालिम प्राप्त कुकुर परिचालन गरी जाँच थालिएको छ । दसगजामा निगरानी बढाइएको छ । सादा पोसाकका प्रहरीका अलावा एसएसबी, उत्तर प्रदेश प्रहरी, रेल्वे प्रहरी र सीमामा क्रियाशील गुप्तचर एजेन्सीसमेत सक्रिय रूपमा खटिएका छन् । भारतीय सीमावर्ती बजारमा साविकको भन्दा बढी गस्ती गर्न थालिएको छ । सीमा क्षेत्रसँग जोडिएका सडक, गल्ली र चोकमा आकस्मिक जाँच भइरहेको छ ।


एक भारतीय सुरक्षा अधिकारीले संवेदनशील अवस्था रहेको भन्दै सुरक्षा रणनीति बनाइरहेको बताए । उत्तर प्रदेशको गोरखपुर जोनका अतिरिक्त प्रहरी महानिर्देशक दावा शेर्पा सुरक्षा सतर्कता अपनाउन निर्देशन दिँदै सीमावर्ती सहर सुनौली, सोहरतगढ र बढनी पुगेका छन् । त्यहाँ उनले नेपाली सुरक्षा अधिकारीसँग समन्वय गरेर सीमा क्षेत्रको सुरक्षा व्यवस्था सुदृढ बनाउन भारतीय सुरक्षा अधिकारीलाई निर्देशन दिएका छन् । उनले बढनीमा नेपाली र भारतीय सुरक्षा अधिकारीसँग संयुक्त समन्वय बैठक गरेर सुरक्षा व्यवस्था कसिलो बनाउनसमेत अनुरोध गरेका छन् ।

भारतको महाराजगन्ज जिल्लासँग जोडिएका सीमाका ३२ स्थानमा सुरक्षा निगरानी कम रहेको पहिचान गरी थप प्रहरी परिचालन गरिएको छ । कोरोना भाइरस संक्रमणका कारण सीमा क्षेत्र सिल भए पनि थप सुरक्षा सतर्कता अपनाइएको एसएसबीको ५० औं बटालियनका असिस्टेन्ट कमान्डेन्ट गौरवकुमार सिंहले बताए । भारतको महाराजगन्जसँग ७५ किलोमिटर र सिद्धार्थनगर जिल्लासँग नेपालको ८१ किलोमिटर सीमा जोडिएको छ ।

प्रकाशित : श्रावण १९, २०७७ २०:२०
प्रतिक्रिया
पठाउनुहोस्

मायादेवी मन्दिर खुला गर्न माग

मनोज पौडेल

लुम्बिनी — मुलुककै प्रमुख पर्यटकीय गन्तव्य लुम्बिनीस्थित मायादेवी मन्दिर खुला गर्न माग गरिएको छ । होटल तथा पर्यटन व्यवसायी, बौद्ध महिला तथा युवा समूह र आमा समूहलगायत १० बढी सामाजिक संघ संस्थाहरुले ज्ञापनपत्र दिएका छन् । 

लुम्बिनी विकास कोष उपाध्यक्ष अवधेशकुमार त्रिपाठीमार्फत पर्यटनमन्त्री योगेश भट्राईलाई ज्ञापनपत्र बुझाएका हुन् । लुम्बिनी होटल संघ महासचिव लिलामणि शर्मा नेतृत्वमा गएको टोलीले कोष कार्यकक्षमा ज्ञापनपत्र दिएको हो । ०७६/७७ मा गरिएको आर्थिक सर्वेक्षणमा मुलुकमा सर्वाधिक भ्रमण गरिएको ठाउँमा लुम्बिनी परेको छ । लुम्बिनी भ्रमण गर्नेमा ७९ प्रतिशत नेपाली, ११ प्रतिशत भारतीय र १० प्रतिशत तेस्रो मुलुकका छन् ।

कोरोना भाइरस संक्रमणको जोखिमका कारण मुलुकमा लकडाउन सुरु भएसँगै गत चैत्र ११ गतेबाट मायादेवी मन्दिरमा आवतजावत बन्द छ । अहिले बन्दाबन्दी हटिसकेको अवस्था छ । दिनानुदिन सहज बन्दै गएकाले सरकारको जनस्वास्थ्य तथा सुरक्षा मापदण्डलाई ध्यानमा राख्दै मन्दिरमा आवतजावत गर्न दिन माग गरेको लुम्बिनी होटल संघ अध्यक्ष मिथुनमान श्रेष्ठले बताए ।

‘लुम्बिनीको आधार र गरिमा भनेकै मायादेवी मन्दिर हो,’ ज्ञापनपत्रमा भनिएको छ, ‘मन्दिर खुल्ला नहुँदा स्थानीयले समेत भगवान बुद्धप्रति आस्था प्रकट गर्न पाएका छैनन् ।’ लुम्बिनी र छिमेकी जिल्लाका बासिन्दा पूजाआजा गर्न बञ्चित छन् । विश्वकै आस्थाको धरोहर लामो समय बन्द हुँदा सबै शान्तिकामीको आस्था गम्भीर चोट पुगेको छ’ ज्ञापनपत्रमा भनिएको छ, ‘अनेक दुःख कष्ट सहँदै लुम्बिनी पुगेकाहरु पनि बुद्ध जन्मेको ठाउँमा आस्था र श्रद्धा व्यक्त गर्नै नपाइ त्यसै फर्किनु परिरहेको छ ।’ स्थानीयले राखेको मागबारे मन्त्रालयलाई जानकारी गराएको लुम्बिनी विकास कोष सदस्य सचिव ज्ञानीन राईले बताए ।

कोभिड–१९ को महामारीका कारण ४ महिनादेखि बुद्ध जन्मस्थलको मन्दिर बन्द छ । मन्दिर बन्द हुँदा नियमित पूजा पाठको काम समेत अवरुद्ध छ । भिक्षु, भिक्षुणी तथा उपासक उपासिकाहरुले मन्दिरमा पूजा गर्नबाट बञ्चित छन् । कतिपय मुख्य गेट बाहिरै पूजाआजा गरेर फर्किन्छन् । ‘मायादेवी लुम्बिनीवासीको मात्रै नभइ सबैको आस्थाको धरोहर भएकाले लामो समयसम्म बन्द हुँदा हामीलाई गम्भीर चोट पुर्‍याएको छ,’ लुम्बिनी पर्यटन व्यवसायी संघ सचिव पिन्टु बनियाले भने, ‘विश्वकै आस्था र श्रद्धाको केन्द्र भएकाले यहाँ नियमित पाठ पूजा हुनुपर्छ । सुरक्षा सतर्कता अपनाएर मायादेवी मन्दिर आंशिक भएपनि खुल्ला गर्नुपर्छ ।’

लुम्बिनी होटल संघ, लुम्बिनी पर्यटन व्यवसायी संघ र मायादेवी आमा समूहले ज्ञापनपत्र बुझाएका हुन् । त्यस्तै बौद्ध युवा समूह, सिद्धार्थ होटल संघ, लुम्बिनी बौद्ध महिला समिति र होटल तथा रेष्टुरेन्ट व्यवसायीं संघ लगायतले ज्ञापनपत्र बुझाएका हुन् ।

प्रकाशित : श्रावण १३, २०७७ १५:१५
पूरा पढ्नुहोस्
प्रतिक्रिया
पठाउनुहोस्
×