अयोध्यामा मोदी आउने भएपछि सीमामा ‘हाई अलर्ट’- समाचार - कान्तिपुर समाचार
कान्तिपुर वेबसाईट
AdvertisementAdvertisement

अयोध्यामा मोदी आउने भएपछि सीमामा ‘हाई अलर्ट’

मनोज पौडेल

कपिलवस्तु — भारतीय प्रधानमन्त्री नरेन्द्र मोदी अयोध्या आउने भएपछि रूपन्देही र कपिलवस्तुसँग सीमा जोडिएका भारतीय क्षेत्रमा उच्च सुरक्षा सतर्कता अपनाइएको छ ।

बाबरी मस्जिदका लागि अन्यत्रै जग्गा उपलब्ध गराउने गरी लामो समयदेखिको स्वामित्व विवादलाई अदालतले सल्ट्याइदिएपछि अयोध्यामा राम मन्दिर बन्दै छ । उक्त मन्दिरको शिलान्यासका लागि आगामी साउन २१ मा मोदी अयोध्या आउँदै छन् । उनी आउने भएपछि अवाञ्छित र आतंकी घुसपैठ नहोस् भनेर सीमामा उच्च सुरक्षा सतर्कता अपनाइएको हो ।

कपिलवस्तु र रूपन्देहीको सीमासँग जोडिएका भारतको सिद्धार्थनगर र महाराजगन्ज जिल्लामा सुरक्षा निकायलाई ‘हाई अलर्ट’ मा राखिएको छ । यी क्षेत्रबाट अयोध्या पुग्‍न सहज र नजिक भएकाले सुरक्षा निकायलाई सक्रिय बनाइएको हो । नेपाल–भारत सीमानाकामा एसएसबीका तालिम प्राप्त कुकुर परिचालन गरी जाँच थालिएको छ । दसगजामा निगरानी बढाइएको छ । सादा पोसाकका प्रहरीका अलावा एसएसबी, उत्तर प्रदेश प्रहरी, रेल्वे प्रहरी र सीमामा क्रियाशील गुप्तचर एजेन्सीसमेत सक्रिय रूपमा खटिएका छन् । भारतीय सीमावर्ती बजारमा साविकको भन्दा बढी गस्ती गर्न थालिएको छ । सीमा क्षेत्रसँग जोडिएका सडक, गल्ली र चोकमा आकस्मिक जाँच भइरहेको छ ।


एक भारतीय सुरक्षा अधिकारीले संवेदनशील अवस्था रहेको भन्दै सुरक्षा रणनीति बनाइरहेको बताए । उत्तर प्रदेशको गोरखपुर जोनका अतिरिक्त प्रहरी महानिर्देशक दावा शेर्पा सुरक्षा सतर्कता अपनाउन निर्देशन दिँदै सीमावर्ती सहर सुनौली, सोहरतगढ र बढनी पुगेका छन् । त्यहाँ उनले नेपाली सुरक्षा अधिकारीसँग समन्वय गरेर सीमा क्षेत्रको सुरक्षा व्यवस्था सुदृढ बनाउन भारतीय सुरक्षा अधिकारीलाई निर्देशन दिएका छन् । उनले बढनीमा नेपाली र भारतीय सुरक्षा अधिकारीसँग संयुक्त समन्वय बैठक गरेर सुरक्षा व्यवस्था कसिलो बनाउनसमेत अनुरोध गरेका छन् ।

भारतको महाराजगन्ज जिल्लासँग जोडिएका सीमाका ३२ स्थानमा सुरक्षा निगरानी कम रहेको पहिचान गरी थप प्रहरी परिचालन गरिएको छ । कोरोना भाइरस संक्रमणका कारण सीमा क्षेत्र सिल भए पनि थप सुरक्षा सतर्कता अपनाइएको एसएसबीको ५० औं बटालियनका असिस्टेन्ट कमान्डेन्ट गौरवकुमार सिंहले बताए । भारतको महाराजगन्जसँग ७५ किलोमिटर र सिद्धार्थनगर जिल्लासँग नेपालको ८१ किलोमिटर सीमा जोडिएको छ ।

प्रकाशित : श्रावण १९, २०७७ २०:२०
प्रतिक्रिया
पठाउनुहोस्

सत्याग्रहको सत्रौं दिनमा ईः अस्पताल भर्ना

कान्तिपुर संवाददाता

काठमाडौँ — सत्याग्रहको सत्रौं दिनमा इनफ इज इनफ अभियानका सत्याग्रही ईः अस्पताल भर्ना भएका छन् । सोमबार उनलाई ह्याम्स अस्पताल भर्ना गरिएको हो । अभियन्ता ई: कोरोना भाइरस (कोभिड-१९) रोकथामका लागि प्रभावकारी कदम चाल्नु पर्ने, पीसीआर परीक्षण बढाउनु पर्ने, सरकारले आफूहरुसँग गरेको पूर्वसहमति कार्यान्वयन हुनुपर्ने लगायत माग राखी सत्याग्रह बसेका हुन् ।

अनसनको १७ दिनसम्म पनि सरकारको तर्फबाट उनको माग सम्वोधन गर्ने काम र वार्ताका चासो नदेखाइएको विवेकशील नेपालीका अध्यक्ष मिलन पाण्डेले बताए ।

यसअघि अनसन बसेका अभियन्ताहरुसँग सरकारले असार २३ गते माग सम्वोधन गर्ने लिखित प्रतिबद्धता जनाएको थियो । तर ती माग पूरा गर्ने प्रयास नभएको भन्दै ईः लगायतका अभियन्ता फेरि अनसन बसेका थिए । यसअघि अनसन बस्दा उपचारका लागि अस्पताल भर्ना भएका ईः र पुकार बमलाई भेट्न प्रधानमन्त्री केपी शर्मा ओली अस्पताल पुगेका थिए ।

प्रकाशित : श्रावण १९, २०७७ १९:५४
पूरा पढ्नुहोस्
प्रतिक्रिया
पठाउनुहोस्
×