मेलम्चीमा बन्दै गरेको कभर्ड हल पहिरोले पुरियो, ८ जना बेपत्ता- समाचार - कान्तिपुर समाचार
कान्तिपुर वेबसाईट
AdvertisementAdvertisement

मेलम्चीमा बन्दै गरेको कभर्ड हल पहिरोले पुरियो, ८ जना बेपत्ता

अनिश तिवारी

सिन्धुपाल्चोक — मेलम्ची नगरपालिका वडा नम्बर ११ मा निर्माणाधीन कभर्ड हल पहिरोले पुरिँदा ८ जना बेपत्ता भएका छन् । उनीहरु कभर्ड हल निर्माणमा खटिएका कामदार रहेको प्रहरीले जानकारी दिएको छ । बेपत्ता हुनेहरुमा केही स्थानीय र केही पर्साका मजदुर रहेको प्रहरीले बताएको छ ।

बन्दै गरेको कभर्ड हल सोमबार बिहान साढे ३ बजेतिर गैह्रीबजारको केही भाग भासिएर पुरिएको जिल्ला प्रहरी कार्यालय सिन्धुपाल्चोकका प्रवक्ता डीएसपी माधवप्रसाद काफ्लेले जानकारी दिए ।

घाइते ३५ वर्षीय भारतीय नागरिक बारु साहलाई उद्धार गरी थप उपचारका लागि मेलम्ची प्राथमिक स्वास्थ्य केन्द्र लगिएको उनले बताए । अहिले घटनास्थलमा सुरक्षाकर्मी र स्थानीय मिलेर बेपत्ताको खोजी गरिरहेको डीएसपी काफ्लेले जानकारी दिए ।

प्रकाशित : श्रावण १९, २०७७ ०७:३२
प्रतिक्रिया
पठाउनुहोस्

फुल्पिङकट्टी पहिरो : बेपत्ता सबैको शव फेला

अनिश तिवारी

सिन्धुपाल्चोक — अविरल वर्षात्‌का कारण खकुण्डोलमा पहिरोले पुरिएर बेपत्ता भएका भोटेकोसी गाउँपालिका ४ फुल्पिङकट्टीका ५ जनाकै शव फेला परेको छ । असार ३१ गते राति करिब साढे १ बजे झरेको पहिरोले फुल्पिङकट्टीकै दुई घर बगाउँदा स्थानीय गेन्जेन शेर्पाका आमा ८५ वर्षीया सुमबुट्टी, श्रीमती ४० वर्षीया सेमसङ्ग, बहिनी ३५ वर्षीया साङ्मुसहित छोरी १४ वर्षीया छिरिङवाङ्गु र १६ वर्षीया याङ्जी बेपत्ता भएका थिए । 

उनीहरुमध्ये बुधबार दिउँसो सुमबुट्टी र सेमसङ्गको शव भेटिएको जिल्ला प्रहरी नायब उपरीक्षक माधवप्रसाद काफ्लेले बताए ।

‘गएको बिहीबार र पहिरो झरेको दिन गरी ३ जनाको शव फेला परिसकेको थियो, अहिले बाँकी दुईको पनि शव पुरिएको अवस्थामा फेला परेको छ,’ उनले भने । सशस्त्र, नेपाली सेनासहित अन्य सुरक्षाकर्मी जनप्रतिनिधि, स्थानीयसँग मिलेर बेपत्ताको खोजी जारी थियो ।

पहिरोले स्थानीय पञ्चकन्या आधारभूत विद्यालयमा क्षति पुगेको छ भने ६० परिवार विस्थापित भएका छन् । स्थानीय नोर्साङ शेर्पाले भने- ‘तल भोटेकोसी बाढीको कटान, माथि पहिरो हामी कहाँ जाने ?,’

प्रकाशित : श्रावण १४, २०७७ १७:४३
पूरा पढ्नुहोस्
प्रतिक्रिया
पठाउनुहोस्
×