राष्ट्रिय सभा मातहतका विषयगत नयाँ समिति गठन, सभापतिको निर्वाचन हुने

कान्तिपुर संवाददाता

काठमाडौँ — संघीय संसद् राष्ट्रिय सभा मातहतका संसदीय समिति गठन भएका छन् । राष्ट्रिय सभाका समितिमा सांसदहरूको दुई वर्षे कार्यावधि शुक्रबार पूरा भएपछि नयाँ गठन गरिएको हो । राष्ट्रिय सभाअन्तर्गत चार विषयगत समिति रहेका छन् । 

राष्ट्रिय सभा अध्यक्ष गणेशप्रसाद तिमिल्सिनाले शनिबार संसदीय समिति गठन गरेका हुन् । राष्ट्रिय सभामा प्रतिनिधित्व गर्ने संसदीय दलबाट प्राप्त नामावलीअनुसार सांसदहरूलाई विषयगत समितिमा राखिएको राष्ट्रिय सभा सचिवालयले जानकारी दिएको छ ।

कार्यव्यवस्था परामर्श समितिको सल्लाहमा संसद अधिवेशन नरहेको अवस्थामा अध्यक्षबाट आदेश जारी भई समितिमा रहने सदस्यको मनोनयन गरिएको हो । योसँगै राष्ट्रिय सभाका संसदीय समितिको नेतृत्वबारे निर्वाचन हुने भएको छ । संसद सचिवालयका अनुसार अब बस्ने राष्ट्रिय सभा मातहतका संसदीय समितिको अध्यक्षता समितिका ज्येष्ठ सदस्यले गर्नेछन् । त्यसपछि सभापतिको निर्वाचन हुनेछ ।

चार समितिमध्ये दुई समितिको नेतृत्वमा नेकपाका सांसद थिए । एउटा समितिको सभापति कांग्रेस सांसद थिइन् भने एक समितिको सभापति राष्ट्रपतिद्वारा मनोनीत सांसदले गरिरहेका थिए । राष्ट्रिय सरोकार तथा समन्वय समितिको सभापति नेकपाकी दिलकुमारी रावल र विधायन व्यवस्थापन समितिको सभापति पनि नेकपाकै पर्शुराम मेघी गुरुङ थिए । दीगो विकास तथा सुशासन समिति सभापति कांग्रेसकी तारादेवी भट्ट थिइन् । प्रत्यायोजित व्यवस्थापन तथा सरकारी आश्वासन समिति सभापति राष्ट्रपतिद्वारा मनोनीत सांसद रामनारायण बिडारी थिए ।

अध्यक्ष तिमिल्सिनाले दीगो विकास तथा सुशासन समितिमा कविता बोगटी, गंगाकुमारी बेल्वासे, चक्रप्रसाद स्नेही, जगप्रसाद शर्मा, तारादेवी भट्ट, दीनानाथ शर्मा र नन्द्रा चपाई रहेको राष्ट्रिय सभाका सचिव राजेन्द्र फुयालले जारी गरेको सूचनामा उल्लेख छ । त्यस्तै, समितिमा महेशकुमार महरा, मायाप्रसाद शर्मा, रमेशजंग रायमाझी, विमला घिमिरे, शारदादेवी भट्ट र सिगबहादुर विश्वकर्मालाई राखिएको छ ।

विधायन व्यवस्थापन समितिमा खीमकुमार विक, जीतेन्द्रनारायण देव, जीवन बुढा, ठगेन्द्रप्रकाश पुरी, तारामान स्वाँर, देवेन्द्र दाहाल, पर्शुराम मेघी गुरुङ र प्रकाश पन्थ रहेका छन् । सोही समितिमा प्रमिला कुमारी, बेदुराम भुसाल, भगवती न्यौपाने, भैरवसुन्दर श्रेष्ठ, मृगेन्द्रकुमारसिंह यादव, राधेश्याम पासवान र विमला राई पौडेल रहेका छन् ।

प्रत्यायोजित व्यवस्थापन तथा सरकारी आश्वासन समितिमा अगमप्रसाद बान्तवा राई, गोपाल भट्टराई, चन्द्रबहादुर खड्का, तुलसाकुमारी दाहाल, नरपति लुवार, नैनकला ओझा र राधेश्याम अधिकारी रहेका छन् । रामनारायण बिडारी, बीना पोखरेल, शान्तिकुमारी अधिकारी जिसी, शेरबहादुर कुँवर, सुमित्रा बिसी र हरिराम चौधरीलाई पनि उक्त समितिमा जिम्मेवारी दिइएको छ ।

राष्ट्रिय सरोकार तथा समन्वय सिमितिमा अनिता देवकोटा, इन्दिरादेवी गौतम, इन्दु कडरिया, उदया शर्मा, कोमल वली, खिमलाल भट्टराई, गोपीबहादुर सार्की र दीपा गुरुङलाई मनोनयन गरिएको छ । दिलकुमारी रावल, नारायणकाजी श्रेष्ठ, रामचन्द्र राई, रामलखन चमार, शेखरकुमार सिंह र सुमनराज प्याकुरेलको पनि सोही समितिमा रहेका छन् ।

प्रकाशित : श्रावण १७, २०७७ १८:२७
प्रतिक्रिया
पठाउनुहोस्

राजकुमारको परिवारलाई १० लाख दिने सहमति

रमेशकुमार पौडेल

चितवन — चितवन राष्ट्रिय निकुञ्‍ज सुरक्षार्थ खटिएका सैनिकले नियन्त्रणमा लिई कुटपिट गरेको साता दिनपछि मृत्यु भएका राप्ती नगरपालिका–२ पिप्ले मिलनटोलका राजकुमार चेपाङका परिवारलाई १० लाख रुपैयाँ राहत उपलब्ध गराइने लिखित प्रतिबद्धता जनाइएको छ ।

जिल्ला प्रशासन कार्यालयमा शुक्रबार साँझ भएको छलफलमा मृतकका परिवारलाई निकुञ्‍जले ७ लाख र राप्ती नगरपालिकाले ३ लाख रुपैयाँ दिने सहमति जनाएका हुन् । सहमतिपछि राजकुमारका बुवा विष्णुलाल उनको शव बुझ्न शनिबार काठमाडौं गएका छन् ।

मृतकका परिवारलाई राहत उपलब्ध गराउने मिति भने सहमतिपत्रमा उल्लेख छैन । ‘त्यसैले शव बुझ्न जाने कि नजाने भन्ने थियो । तर जनप्रतिनिधिहरुका साथै प्रशासककै रोहबरमा भएको सहमति पालना हुन्छ भन्ने विश्वासले बुझ्ने भइयो,’ विष्णुलालले भने ।

राप्ती नगर प्रमुख प्रभा बराल, उपप्रमुख इमानसिंह लामा, नेकपा जिल्ला अध्यक्ष यमबहादुर परियार, कांग्रेस जिल्ला सभापति जितनारायण श्रेष्ठ, राप्ती–२ का वडाध्यक्ष श्यामसुन्दर उप्रेती, राप्ती–१२ का वडाध्यक्ष अर्जुन चेपाङको रोहबरमा सहमति भएको हो । प्रमुख जिल्ला अधिकारी नारायणप्रसाद भट्टराई निकुञ्‍जका प्रमुख संरक्षण अधिकृत नारायण रुपाखेती र निकुञ्‍ज सुरक्षार्थ तैनाथ बटुक दल गणका गणपति प्रमुख सेनानी अरुण श्रेष्ठसमेत सहभागी बैठकले उक्त निर्णय गरेको हो ।

रुपाखेतीको विभागमा सरुवा भइसकेको छ । उनको ठाउँमा अणनाथ बराल आउने भएका छन् । बरालले जिम्मेवारी सम्हालिसकेका छैनन् । राहत उपलब्ध गराउने मिति उल्लेख नगर्नु र सरुवा भएका निकुञ्‍ज प्रमुखको उपस्थितिमा निर्णय भएका कारण परिवारले सहमति कार्यन्वयनमा आशंका प्रकट गरेका थिए । तर सबैले सम्झाएपछि उनीहरु शव बुझेर दाहसंस्कार गर्न राजी भएका हुन् ।

राजकुमारसहित मिलनटोलका ५ युवक र २ महिला गत साउन १ मा निकुञ्‍जको सिमाना राप्ती नदी तरेर निकुञ्‍जभित्र रहेको ज्युँडी खोला गएका थिए । खोलामा घोँगी र जंगलमा अमिलो टिप्ने योजना उनीहरुको थियो । उनीहरुलाई निकुञ्‍ज सुरक्षाका लागि खटिएका एक सैनिकले ज्युँडी खोलाबाट पक्राउ गरेका थिए । त्यसपछि कुटपिट गर्दै निकुञ्‍जको लिगलिगे पोस्ट पुर्‍याएका थिए ।

दुई महिलाबाहेक सबैले पिटाइ खाए पनि राजकुमार धेरै बिरामी परेका थिए । स्थानीय मेडिकलमा गरिएको उपचारले निको नभएपछि साउन ७ गते बुधबार राति उनलाई परिवारले पिप्लेबाट भरतपुर लगेका थिए । भरतपुर अस्पतालको आकस्मिक कक्षमा पुर्‍याउने बित्तिकै चिकित्सकले राजकुमारलाई मृत घोषणा गरेका थिए । उनको बाटोमै मृत्यु भएको थियो । तत्काल किरिया खर्च एक लाख रुपैयाँ दिने भनेपछि परिवारका सदस्यहरुले पोस्टमार्टम गर्न स्वीकृति दिएका थिए । तर, भरतपुर अस्पतालले पोस्टमार्टमका लागि शव काठमाडौं पठाएको थियो ।

गत सोमबार त्रिवि शिक्षण अस्पतालमा पोस्टमार्टम भए पनि परिवार शव नबुझी चितवन फर्केका थिए । शुक्रबार भएको छलफलमा घटनाको अनुसन्धान गरेर दोषीलाई कारबाही गर्ने समेत सहमति भएको छ । मृतक राजकुमारकी डेढ वर्षीया छोरीलाई उमेर नपुग्दासम्म भरणपोषण र १२ कक्षासम्मको शिक्षाका लागि लोथर मध्यवर्ती उपभोक्ता समितिमार्फत चितवन निकुञ्‍जले सहयोग गर्ने पनि जनाइएको छ । राजकुमारको परिवार बस्ने घर मर्मतमा पनि निकुञ्‍जले सहयोग गर्ने प्रतिबद्धता गरेको छ ।

सम्बन्धित समाचार

प्रकाशित : श्रावण १७, २०७७ १८:१४
पूरा पढ्नुहोस्
प्रतिक्रिया
पठाउनुहोस्
×