वीरेन्द्रनगर — गत शुक्रबार जंगली च्याउ खाएर बिरामी परेका जाजरकोटको कुशे गाउँपालिकाका थप १ जनाको मृत्यु भएको छ । प्रदेश अस्पताल सुर्खेतमा गत सोमबारदेखि उपचाररत २२ वर्षीय ललित चलाउनेको बिहीबार राति मृत्यु भएको हो । 

योसँगै च्याउ खाएर मृत्यु हुनेको संख्या ५ पुगेको छ । विषालु च्याउ खाँदा गत शनिबार एकै घरका ८ जना बिरामी परेका थिए । बिरामी भएकामध्ये २ वर्षीया अन्जनाको साउन ११ गते गाउँमै मृत्यु भयो । अन्य ७ जना बिरामीलाई नेपाली सेनाको हेलिकप्टरमार्फत उद्धार गरी प्रदेश अस्पताल उपचारका लागि ल्याइएको थियो ।

उपचार गराइरहेकामध्ये घरमुली टेकबहादुर चलाउनेकी १६ वर्षीया छोरी औसरा, १३ वर्षीया छोरी धनसरा र ११ वर्षीया नातीनी निरुता सिंहको मंगलबार राति मृत्यु भएको थियो ।

अहिले टेकबहादुरसहित उनकी ३३ वर्षीया बुहारी कल्पना र १५ वर्षीया भतिजी पशुपति उपचाररत छन् । टेकबहादुरलाई अहिले सघन उपचार कक्ष (आईसीयु) मा राखिएको अस्पतालका मेडिकल विभाग प्रमुख डा. केएन पौडलले बताए । ‘उहाँको अवस्था सुधारोन्मुख छ,’ उनले भने, ‘तर पनि आईसीयुमा रहुन्जेल केही भन्न सक्ने अवस्था छैन ।’

अरु २ जनाको अवस्था सामान्य भए पनि पेट दुख्ने, होस हराउने र सास फेर्न मुस्किल हुनेजस्ता लक्षण देखिएको उनले जानकारी दिए ।