उपत्यकामा १५ सहित थप २१० जनामा संक्रमण, संक्रमितको संख्या १९ हजार २७३ पुग्यो   

कान्तिपुर संवाददाता

काठमाडौँ — उपत्यकामा १५ सहित थप २१० जनामा कोरोना भाइरस संक्रमण पुष्टि भएको छ । पछिल्लो २४ घन्टामा थप २१० जनामा कोरोना संक्रमण देखिएको स्वास्थ्य तथा जनसंख्या मन्त्रालयका प्रवक्ता डा.जागेश्‍वर गौतमले बुधबार आयोजित पत्रकार सम्मेलनमा जानकारी दिएका हुन् । उनका अनुसार नेपालमा संक्रमितको संख्या १९ हजार २७३ पुगेको छ ।     

२४ घन्टामा १४६ जना संक्रमित निको भएर घर फर्किएका छन् । यो सँगै १४ हजार २१ जना कोरोना निको भएर डिस्चार्ज भएका प्रवक्ता गौतमले बताए । ७२.७ प्रतिशत संक्रमित निको भएको छ ।

भोजपुर, संखुवासभा, रसुवा, मनाङ र मुस्ताङ भने बुधबार संक्रमणमुक्त जिल्ला बनेका छन् ।

प्रवक्ता गौतमका अनुसार आइसोलेसनमा ५ हजार ३६० र क्वारेन्टाइनमा १४ हजार ४७१ रहेका छन् ।

जिल्लागत नयाँ संक्रमितको विवरण




प्रकाशित : श्रावण १४, २०७७ १६:२९
प्रतिक्रिया
पठाउनुहोस्

मानवीय त्रुटिले घर जले : मन्त्री बस्‍नेत

कान्तिपुर संवाददाता

काठमाडौँ — वन तथा वातावरण मन्त्री शक्तिबहादुर बस्नेतले मानवीय त्रुटिले चितवन कुसुम खोलाका चेपाङ समुदायका घर जलेको बताएका छन् ।

यसअघि चितवन राष्ट्रिय निकुञ्‍जले कुसुम खोलामा घर जलाएको नभइ गोठ र गुन्द्रीमा मात्रै आगो लगाएको उनले बताएका थिए । मन्त्री बस्‍नेतको उक्त भनाइको आलोचना भएपछि उनले बुधबार संघीय संसद्को प्रतिनिधिसभाको कृषि, सहकारी तथा प्राकृतिक स्रोत समितिमा मानवीय त्रुटिले घर जलेको बताएका हुन् ।

मन्त्री बस्‍नेतले वन मन्त्रालयले यस घटना छानबिन गर्न गठन गरेको समितिको प्रतिवेदन आइनसकेको पनि समितिलाई जानकारी दिए ।

उनले निकुञ्जका वार्डेन र सहायक वार्डेनलाई विभागमा फिर्ता बोलाइएको समितिलाई जानकारी दिए । साउन २ गते चितवन राष्ट्रिय निकुञ्जका कर्मचारीले हात्ती लगाएर घर भत्काउने र आगो लगाउने काम गरेका थिए ।

बस्नेतले भूमि व्यवस्थापनको काम अगाडि बढिरहेका बेला मध्य बर्खामा निकुञ्जका कर्मचारीले चेपाङ बस्तीमा आगो लगाउने र हात्ती लगाएर भत्काउने काम दुःखद् र अनुपयुक्त भएको बताएका थिए । त्यस क्रममा ८ परिवारका घर भत्काइएको र आगो लगाइएको कुरा आफूलाई मन्त्रालयबाट पठाएको छानबिन समितिको प्रारम्भिक प्रतिवेदनबाट थाहा हुन आएको पनि उनले बताए ।

चेपाङ बस्तीका भनेर पुराना तस्बिर सामाजिक संजाल र संचार माध्यममा आइरहेको पनि मन्त्री बस्नेतको भनाइ थियो । 'यसलाई कति प्रोभोक गर्न सकिन्छ, कतै राजनीतिक लाभ लिन सकिन्छ कि भन्ने ध्येयका साथ कुराहरू अगाडि बढेका छन्,' उनले भने ।

मन्त्री बस्नेतले गल्ती ढाकछोप नगरिने पनि समितिसमक्ष प्रतिबद्धता व्यक्त गरेका छन् । उनले घटना सार्वजनिक भए लगत्तै मन्त्रालयले छानबिन गरिएको भन्दै आफू उक्त घटनालाई लिएर गम्भीर रहेको बताए ।

प्रकाशित : श्रावण १४, २०७७ १६:२०
पूरा पढ्नुहोस्
प्रतिक्रिया
पठाउनुहोस्
×