चिनियाँ राजदूत होउ र नेता पौडेलबीच भेट- समाचार - कान्तिपुर समाचार

चिनियाँ राजदूत होउ र नेता पौडेलबीच भेट

कान्तिपुर संवाददाता

काठमाडौँ — नेपालका लागि चिनियाँ राजदूत होउ यान्छीले मंगलबार कांग्रेसका वरिष्ठ नेता रामचन्द्र पौडेलसँग भेटेघाट गरेकी छन् । भेटका लागि राजदूत होउ पौडेलको निजी निवास बोहराटार पुगेकी थिइन् ।

सयौं वर्षदेखि नेपाल–चीन बीचको सुमधुर सम्बन्ध र औपचारिक सम्बन्ध स्थापना भएको ६३ औं वर्ष गाँठको अवसरमा नेता पौडेल र होउ बीच भेट भएको पौडेलका निजी सचिव चिरन्जिवी अधिकारीले जानकारी दिए ।

भेटमा बीपी कोइराला र माओ त्सेतुङका पालादेखि नेपाली कांग्रेस र चिनियाँ कम्युनिस्ट पार्टीको बीचको सम्बन्धको चर्चा भएको पौडेलले आफ्नो फेसबुक पेजमा लेखेका छन् । ‘चीन सरकारले कोभिड–१९ नियन्त्रणमा प्राप्त गरेको सफलता र नेपाललाई कोभिड–१९ नियन्त्रणका लागि यथेष्ट सहयोग गर्ने बारे चर्चा भयो,’ पौडेलले पेजमा लेखेका छन् ।

यसअघि चिनियाँ राजदूत होउले नेकपा भित्रको अन्तर संघर्ष चलिरहेको बेलामा नेकपाका शीर्ष नेताहरुसँग भेटवार्ता गर्दा आलोचना भएको थियो ।

प्रकाशित : श्रावण १३, २०७७ १८:२४
प्रतिक्रिया
पठाउनुहोस्

पहिरोले गुल्मीका दश परिवार विस्थापित 

वीरेन्द्र केसी

अर्घाखाँची — अविरल वर्षासँगै पहिरो खस्दा गुल्मीको चन्द्रकोट गाउँपालिका–८ बाँस्कोट गाउँमा दश परिवार विस्थापित भएका छन् । उनीहरुलाई नजिकैको स्कुल र छिमेकीको घरमा राखिएको छ । 

लगातारको वर्षाले बस्तीमा माथिबाट खसेको पहिरोले स्थानीय बाबुराम दमाई, जयबहादुर दमाई, टोपबहादुर दमाई, तेजबहादुर दमाई र केशवबहादुर परियारको परिवारलाई नजिकैको जनता बाल निकेतन मावि स्कुलमा सुरक्षित राखिएको वडाध्यक्ष नन्दराम अर्यालले बताए । दिलबहादुर राना, कर्णबहादुर दमाई, झगबहादुर सुनार, माया कुमाल, विष्णुबहादुर सुनारको घर पनि उच्च जोखिममा रहेकाले अन्यत्र सार्न थालिएको उनले बताए । घरमा बस्न नमिल्ने गरी पहिरोले चर्काएको छ । पहिरोले सिंगो बस्ती नै बगाउन सक्ने खतरा भएकाले सबैलाई स्कुल, छिमेकीको घरमा व्यवस्थापन गर्ने तयारी गरिएको वडाध्यक्ष अर्यालले बताए । वर्षाकै कारण गाउँमा आउने सबै कच्ची सडक अवरुद्ध भएका छन् ।

विस्थापितलाई वडा कार्यालयले खाने व्यवस्था गरिएको उनले बताए । यसैबीच बुटवलबाट शान्तिपुरतर्फ आउँदै गरेको ना ६ ख ७७९२ नम्बरको ट्रक खसीमारे भन्ने स्थानमा पहिरोले बगाएको प्रहरीले जनाएको छ । चालक र सहचालक हाम फालेर बाँच्न सफल भएका छन् । ट्रकमा ५ लाख २५ हजार बराबरका हार्डवेयरका सामान रहेको बताइएको छ ।

प्रकाशित : श्रावण १३, २०७७ १८:१२
पूरा पढ्नुहोस्
प्रतिक्रिया
पठाउनुहोस्
×