गायिका सोफियालाई गीत हटाउन दबाब र धम्की- समाचार - कान्तिपुर समाचार

गायिका सोफियालाई गीत हटाउन दबाब र धम्की

कान्तिपुर संवाददाता

काठमाडौँ — गायिका सोफिया थापाले आइतबार सार्वजनिक भएको 'अबको तीज नो ब्रत प्लिज' गीत हटाउन लगातार दबाब दिइएको बताएकी छन् । हिन्दु धार्मिक संगठनका नाममा केही व्यक्तिहरुले गीत युट्युबमा सार्वजनिक भएलगत्तै आफूलाई फोन गरी हटाउन भनिएको र गीत नहटाए घरमै आएर शारीरिक क्षति पुर्‍याउने धम्कीसमेत दिइएको उनले बताइन् ।

'दुर्व्यवहार र बुलिङ गर्ने शब्दहरुको प्रयोग गर्दै धम्की आइरहेको छ । हिन्दु जागरण र विश्व हिन्दु युवा संघ अन्तर्राष्ट्रिय समितिका नाममा मलाई धम्की दिइरहेको छ । निम्नस्तरको गालीसहितको मेसेजहरु आइरहेका छन् । बिहानदेखि फोन आइरहेको छ । गीत हटाएन भने सञ्चार मन्त्रालयमा गएर उजुरी दिने पनि भन्नु भएको छ,' उनले भनिन् ।

आफूले गाएको गीतमा धर्मलाई कतै नछोएको उनी बताउँछिन् । उनले भनिन्, 'मैले धर्मलाई केही छोएकै छैन । मैले तीजमा भएको सानो विषयलाई परिस्कृत गरौं भनेको छु । यसमा केको टाउको दुखाउनु पर्ने र हिन्दु धर्मको आस्थालाई आँच आएर हिन्दु धर्म नै पुरै हल्लिने कहिँ पनि म देख्दिनँ ।'

श्रीमानको आयु लामो होस् भनेर पानी पनि नखाएर ब्रत बस्नु स्वास्थ्यको हिसाबले पनि ठीक नरहेको र खुट्टाको पानी खानु समानताको सोच राख्ने सबैका लागि गलत विचारधारा रहेको भन्दै आफूले गीत गाएको उनी बताउँछिन् । 'गरगहना झप्पकै लगाएर पार्टी गरेर फजुल खर्च गर्नुहुँदैन है भन्ने सन्देश राखेको छु । यसको मतलब तीज मनाउनै नहुने भन्ने होइन्, परिस्कृत गरौं भनेकी हुँ । यति भन्दा हिन्दु धर्ममा कसरी खतरा भयो ?' उनले भनिन् ।

सोमबार 'विश्व हिन्दु युवा संघ अन्तर्राष्ट्रिय समिति' को नामबाट यो गीत युट्युबबाट हटाउन प्रेस विज्ञप्ति जारी गरिएको छ । ६ गतेसम्म गीत नहटाएमा विरोध कार्यक्रम गर्ने विज्ञप्तिमा उल्लेख छ ।

यो गीतलाई युट्युबमा सार्वजनिक गर्ने हाइलाइट्स नेपालका जनक तामाङले पनि गीत हटाउन फोनबाट दबाब आइरहेको बताए । उनले भने, 'यो गीतले हाम्रो धर्ममा नराम्रो असर गर्छ । हटाउने भए हटाउनु नत्र कारबाही गर्न तयार छौं भन्दै फोन आएको छ,' उनले भने ।

प्रकाशित : श्रावण ६, २०७७ ११:५४
प्रतिक्रिया
पठाउनुहोस्

गोरखा–आँबुखैरेनी सडक तीन मिटर भासियो

कान्तिपुर संवाददाता

गोरखा — वर्षाको पानी जमेर गोरखा–आँबुखैरेनी सडकअन्तर्गत एघार किलोमा सडक भासिएको छ । तीन मिटरजति कालोपत्रे सडक भासिएको हो ।तत्काल सडक खुलाउने अवस्था नरहेको गोरखा नगरपालिका–११ का वडा अध्यक्ष रामबहादुर खड्काले बताए ।

गोरखा–आँबुखैरेनी सडकअन्तर्गत ११ किलोमा सडक भासिएर जमेको पानी तर्काइँदै । तस्बिर सौजन्य : सुनील कुँवर


‘सडकको कुनापट्टिको कल्भर्टमा पानी भरिएछ, पानीले निकास खोज्दा सडक भ्वाङ पर्‍यो,’ उनले भने, ‘पिचभन्दा मुनिको भागमा जमेको पानी सडक खनेर कटाएका छौँ ।’

उक्त स्थानमा पैदल यात्रुलाई आउजाउका लागि भने फड्के हालेर सहज बनाइएको छ । सडकको अवस्थाबारे डिभिजन सडक कार्यालय दमौलीमा जानकारी गराइएको खड्काले बताए । उनका अनुसार तत्कालका लागि ह्युमपाइप राखेर सडक खुलाउने प्रयास भइरहेको छ ।

यसअघि तीन किलो र आठ किलोमा खसेको पहिरो पन्छाउने काम भइरहेको जिल्ला प्रहरी कार्यालय गोरखाका डीएसपी वासुदेव खतिवडाले बताए ।

प्रकाशित : श्रावण ६, २०७७ ११:५०
पूरा पढ्नुहोस्
प्रतिक्रिया
पठाउनुहोस्
×