मेलम्चीमा बेपत्ता खोज्‍न गएको सशस्त्र प्रहरीको डुंगा दुर्घटना- समाचार - कान्तिपुर समाचार
कान्तिपुर वेबसाईट
AdvertisementAdvertisement

मेलम्चीमा बेपत्ता खोज्‍न गएको सशस्त्र प्रहरीको डुंगा दुर्घटना

एक जना घाइते
अनिश तिवारी

सिन्धुपाल्चोक — मेलम्ची खानेपानी आयोजनाको गेट फुटेर बेपत्ताको खोजीमा गएको सशस्त्र प्रहरीको डुंगा दुर्घटना हुँदा एक जना घाइते भएका छन् । विपद् उद्धार नम्बर २० गण सिनामंगलबाट सशस्त्र प्रहरी निरीक्षक नन्दकिशोर महतोको कमाण्डमा खटिएको टोली चढेको बोट पल्टिँदा प्रहरी जवान रामजी भण्डारी सामान्य घाइते भएका हुन् ।

उनको मेलम्ची प्राथमिक स्वास्थ्य केन्द्रमा उपचार भइरहेको इलाका प्रहरी कार्यालय मेलम्चीका प्रहरी निरीक्षक फलबहादुर तामाङले जानकारी दिए ।

बोट पल्टिएपछि उनीहरु सय मिटर परसम्म बगेको प्रहरी निरीक्षक तामाङले बताए । बोटमा रहेका ७ जनामध्ये ५ जना पौडिएर बाहिर आएको र दुई जना नदीको बीचमा रहेको उनले बताए । उनीहरु सकुशल रहेको उद्धार भइरहेको उनले जानकारी दिए ।

मंगलबार दिउँसो मेलम्ची खानेपानी आयोजनाको अम्बाथान अडिटको गेट नम्बर १७ फुट्दा निस्किएको पानीले दुई बेपत्ता र दुई जनालाई घाइते बनाएको थियो । बेपत्ता भएका जनकपुरका इन्जिनियर सतिश गोहितको शव बुधबार दिउँसो इन्द्रावती खोलाको बाहुनेपाटीमा फेला परेको थियो । जसमध्ये आयोजनामा कार्यरत कर्मचारी सवारी चालक ५५ वर्षीय राधाकृष्ण थापामगर भने अझै बेपत्ता छन् ।

सम्बन्धित समाचार

मेलम्ची सुरुङ : सात दिन पनि टिकेन अडिटको मुख्य गेट, पुगेन प्राविधिक टोली

प्रकाशित : श्रावण १, २०७७ १०:३६
प्रतिक्रिया
पठाउनुहोस्

फुल्पिङकट्टी पहिरो : दुईको मृत्यु, तीन बेपत्ता [अपडेट]

अनिश तिवारी

सिन्धुपाल्चोक — भोटेकोसी गाउँपालिका–४ फुल्पिङकट्टीमा बुधबार राति खसेको पहिरोमा पुरिएर दुई जनाको मृत्यु भएको छ भने तीन जना बेपत्ता भएका छन् ।

स्थानीय ग्याल्जेन शेर्पाको घर बगाउँदा परिवार सदस्यहरु १६ वर्षीया याङ्जी शेर्पा र ३५ वर्षीया साङ्बु शेर्पाको मृत्यु भएको हो । राति १ बजेतिर खकुन्डोलमाथिबाट आएको पहिरोले दुई घर बगाएकोमा ग्याल्जेनको परिवारका पाँच जना बेपत्ता भएका थिए । बिहीबार बिहानैदेखि प्रहरी र स्थानीय मिलेर खोजी गर्दा दुई जनाकाे शव भेटिएको र अन्य तीन जना अझ बेपत्ता रहेको गाउँपालिका प्रमुख राजकुमार पौडेलले बताए । उनका अनुसार १४ वर्षीया छिरिङवाङ्मु शेर्पा, ७५ वर्षीया सुमबुट्टी शेर्पा र ४० वर्षीया सेमसङ्ग शेर्पा बेपत्ता छन् । ग्याल्जेन भने राजधानीमा सवारी चलाउने पेसामा रहेकाले घटनाका बेला घरमा थिएनन् ।

स्थानीयका अनुसार राति पहिरो खसेको आवाजसँगै वरिपरिको बस्ती थर्किएको थियो । साेही पहिरोले फुल्पिङकट्टीकै नोर्साङ शेर्पाको घर बगाउनुका साथै पञ्चकन्या आधारभूत विद्यालयमा समेत क्षति पुर्‍याएको छ । ‘पहिरो आँखैअगाडि बाट भास्सिएर गयो, के हो भन्ने थाहा नपाउँदै भागेर बाँचियो,’ नोर्साङले भने ।

स्थानीय, जनप्रतिनिधि र सुरक्षाकर्मी मिलेर बेपत्ता अन्यको पनि खोजी गरिरहेका छन् ।

प्रकाशित : श्रावण १, २०७७ ०८:५५
पूरा पढ्नुहोस्
प्रतिक्रिया
पठाउनुहोस्
×