भारतीय च्यानल बन्द गरेकोमा केबल सेवाप्रदायकलाई सरकारको धन्यवाद- समाचार - कान्तिपुर समाचार

भारतीय च्यानल बन्द गरेकोमा केबल सेवाप्रदायकलाई सरकारको धन्यवाद

कान्तिपुर संवाददाता

काठमाडौँ — संचार तथा सूचना प्रविधि मन्त्रालयले नेपालमा भारतीय टेलिभिजनहरूको प्रशारण रोक्ने निर्णय गरी सरकारलाई सहयोग गरेको भन्दै डिजिटल केबल सेवाप्रदायकहरूलाई धन्यवाद दिएको छ ।

प्रधानमन्त्री केपी शर्मा ओली र नेपालका लागि चिनियाँ राजदूत होउ यान्छी तथा नेपाल र चीन सम्बन्धलाई लिएर केही भारतीय टेलिभिजनहरूले प्रशारण गरेका सामग्रीप्रति असन्तुष्टि बढेपछि बिहीबारदेखि भारतीय च्यानल बन्द गरिएका थिए ।

संचार मन्त्रालयका प्रवक्ता ऋषिराम तिवारीले विज्ञप्ति जारी गर्दै धन्यवाद दिएका हुन् । 'नेपालका मर्यादित संस्था र नेतृत्वलाई लान्छना गरी अनर्गल सामग्री प्रशारण गर्ने कतिपय भारतीय संचारमाध्यमहरूको प्रशारणबाट राष्ट्रिय संवेदनामा आँच आउने कुरालाई ध्यानमा राखी नेपालका डिजिटल केलब सेवाप्रदायकहरूले जिम्मेवारी बोधका साथ स्वतस्फूर्त रूपमा प्रशारण रोकेकोमा मन्त्रालय धन्यवाद व्यक्त गर्दछ । आगामी दिनमा समेत सरोकारवालाहरूबाट प्रचलित कानुन तथा आचारसंहिता परिपालना गर्ने गराउने सन्दर्भमा निरन्तर सहयोग प्राप्त हुनेमा मन्त्रालय विश्वास व्यक्त गर्दछ,' विज्ञप्तिमा लेखिएको छ ।

भारतीय संचारमाध्यमले प्रधानमन्त्री ओलीका बारेमा प्रशारण र प्रकाशन भएका भारतीय संचारमाध्यमका सामग्रीप्रति गम्भीर ध्यानाकर्षण भएको पनि जनाएको छ ।

प्रकाशित : असार २६, २०७७ १९:५०
प्रतिक्रिया
पठाउनुहोस्

तीन दिनदेखि लगातार वर्षा, बाढी पहिरोमा २५ जनाको मृत्यु, ५७ बेपत्ता 

कान्तिपुर संवाददाता

काठमाडौँ — मुलुकभर तीन दिनदेखिको लगातारको वर्षापछि आएको बाढी पहिरोमा २५ जनाको मृत्यु भएको छ । ५७ जना बेपत्ता छन् । कास्की, सिन्धुपाल्चोक, लमजुङ, म्याग्दी लगायत जिल्लामा बाढी र पहिरोले धनजनको क्षति पुर्‍याएको हो ।

केही दिनअघि परेको भारी वर्षापछि बेनीस्थित उर्लिएको काली नदी फाइल फोटो

गृहमन्त्रालयअन्तर्गत विपद् जोखिम न्यूनिकरण तथा व्यवस्थापन प्राधिकरणका प्रमुख कार्यकारी अनिल पोखरेलका अनुसार बिहीबार सिन्धुपाल्चोक बाह्रबिसे नगरपालिका र भोटेकोसी गाउँपालिकामा बाढी र पहिरोमा परी २ जनाको भएको थियो भने मृत्यु २१ बेपत्ता भएका थिए । बाढीले १६ घर बगाएको थियो ।

यस्तै शुक्रबार कास्की, लमजुङ, म्याग्दी, जाजरकोट लगायत ८ जिल्लामा आएको प्रकोपमा २३ जनाको मृत्यु, ३६ बेपत्ता र २६ घाइते भएका छन् । प्रमुख कार्यकारी पोखरेलका अनुसा यो मानवीय र भौतिक क्षति विवरण शुक्रबार अपराह्नसम्मको हो ।

विपदमा परी घाइते भएकाको उपचार, बेपत्ताको खोज तथा उद्धार र मृतकको पहिचान गर्ने काम भइरहेको प्राधिकरणका प्रमुख कार्यकारी अनिल पोखरेलले बताए ।



सम्बन्धित समाचार :

प्रकाशित : असार २६, २०७७ १९:३५
पूरा पढ्नुहोस्
प्रतिक्रिया
पठाउनुहोस्
×