कान्तिपुर वेबसाईट
AdvertisementAdvertisement

एक दशकपछि स्वास्थ्यकर्मीहरुको पारिश्रमिक दिन सर्वोच्चको आदेश

कान्तिपुर संवाददाता

काठमाडौँ — सर्वोच्च अदालतले कोसी बाढी पीडितहरुको उपचारमा खटिएका स्वास्थ्यकर्मीहरुको तत्काल पारिश्रमिक दिन सरकारका नाममा आदेश जारी गरेको छ । २०६६ सालको कोसीबाढीबाट प्रभावित बनेकाहरुको उपचारका लागि स्वास्थ्य तथा जनसंख्या मन्त्रालयले २१ जना स्वास्थ्यकर्मीहरु करारमा नियुक्त गरेको थियो ।

झण्डै एक दशकदेखि पारिश्रमिक नपाएका उनीहरुलाई तत्काल पारिश्रमिक दिन आदेश जारी गरेको हो ।

न्यायाधीशहरु सुष्मालता माथेमा र डा. मनोजकुमार शर्माको इजलासले २१ जना स्वास्थ्यकर्मीहरुको कुल ५६ लाख ६७ हजार रुपैयाँ पारिश्रमिक तत्काल भुक्तान गर्न आदेश दिएको हो । उनीहरुको २०६६ फागुनदेखि २०६८ साल भदौसम्मको पारिश्रमिक बाँकी थियो । पारिश्रमिक नपाएको भन्दै उनीहरुले २०६९ सालमा नै सर्वोच्च अदालतमा निवेदन दिएका थिए ।

कोसी नदीको बाँध फुटेर आएको बाढीबाट प्रभावित व्यक्तिहरुलाई अत्यावश्यक स्वास्थ्य सेवा प्रदान गर्न सुनसरीको लौकहीमा अस्थायी अस्पताल निर्माण भएको थियो । उनीहरु अस्पतालका क्लिनरदेखि स्टाफ नर्ससम्मका छन् । उनीहरुको पारिश्रमिक ८ देखि २० हजार रुपैयाँसम्मको थियो । २०६८ असार मसान्तपछि भने उनीहरुको करार थप भएन । त्यही अवधिको पारिश्रमिक दिनुपर्ने माग थियो ।

प्रकाशित : असार २४, २०७७ १८:१४
प्रतिक्रिया
पठाउनुहोस्

पहिरोले ट्यांकी र पाइप बगाएपछि खानेपानी अभाव

कान्तिपुर संवाददाता

सल्यान — पहिरोले जुगेपानी–तलझरे–काफलनेटा–उल्लेरी खानेपानी आयोजनाको ट्यांकी र पाइप बगाएपछि दार्मा गाउँपालिका–५ मा खानेपानी अभाव भएको छ । खानेपानी अभाव भएपछि स्थानीयवासीले आकासेपानीको भरमा गुजारा चलाउन बाध्य छन् ।

ट्यांकी र पाइप बगाएपछि दार्माका १ सय ७५ घरमा खानेपानी अभाव भएको हो । खानेपानी अभाव भएपछि दूषित पानी प्रयोग गर्नुपर्ने बाध्यता भएको स्थानीय कर्णबहादुर खड्काले बताए । ‘पानी नपरेको दिन डेढ घण्टा हिँडेर खोलाबाट पानी ल्याउनुपर्ने बाध्यता छ,’ उनले भने, ‘सरसफाइका काम पनि प्रभावित भएका छन् ।’ उनका अनुसार पहिरोले गाउँका २ घर र सिँचाइ कुलोमा समेत क्षति पुर्‍याएको छ ।

अविरल वर्षापछि आएको पहिरोले २ करोड २२ लाख रुपैयाँको लगानीमा निर्माणाधीन योजनामा क्षति पुर्‍याएको गाउँपालिकाका अध्यक्ष नीमबहादुर केसीले बताए । पहिरोले क्षति पुर्‍याएको स्थानमा मर्मतका लागि प्राविधिक खटाइएको उनले बताए ।

प्रकाशित : असार २४, २०७७ १८:०४
पूरा पढ्नुहोस्
प्रतिक्रिया
पठाउनुहोस्
×