सत्ताको खेलमा नलाग्‍न नेताहरुलाई कांग्रेस केन्द्रीय सदस्यहरुको खबरदारी

नेकपा विभाजित भए पनि सत्तामा जानका लागि कुनै पनि सम्झौता नगर्न नेताहरुलाई उनीहरुले सचेत गराएका छन् । निर्वाचन परिणामले कांग्रेसलाई पाँच वर्ष प्रतिपक्षमा बस्न म्यानडेट दिएको भन्दै उनीहरुले सत्ताको खेलमा नेताहरुलाई नफस्न आग्रह गरेका हुन् ।

कांग्रेस केन्द्रीय सदस्य अर्जुननरसिंह केसीले यस विषयमा बोल्ने सबैजसो केन्द्रीय सदस्यहरुले कांग्रेसले सत्ताका लागि कुनै पनि खालको बार्गेनिङमा लाग्न नहुने धारणा राखेको बताए ।

‘नेकपाभित्रको आन्तरिक कलहमा कांग्रेस कुनै पनि समूहको पक्ष र विपक्षमा संलग्न हुनु हुन्न । सभापतिले बैठकमा संलग्नता नभएको भनेर प्रष्ट पनि पार्नु भएको छ । बाहिर जुनखालका चर्चा परिचर्चा आएका छन्, त्यो गलत छ,’ केसीले भने, ‘सत्ताको साझेदारी र लोभमा च्याखे थाप्ने काम गर्न थाल्यौं भने आत्मघाती हुन्छ । कांग्रेस केन्द्रीय कार्यसमितिको निचोड पनि यही हो ।’

‘सत्तारुढ दल नेकपाको आन्तरिक जीवनमा उत्पन्‍न द्वन्दसँग कांग्रेस निरपेक्ष रहेको छ । गत निर्वाचनमा नेपाली जनताले दिएको म्याडेड बमोजिम जिम्मेवार प्रतिपक्षको भूमिका निर्वाह गर्न पार्टी प्रतिबद्ध छ,’ कांग्रेसले निर्णयमा भनेको छ,‘सत्ता द्वन्दसँग कांग्रेसलाई जोडेर गरिएका प्रचारहरुलाई यो बैठक सम्पूर्ण रुपले खारेज गर्दछ ।’