बागलुङमा थप ६८ जना संक्रमित निको भए, धमाधम घर फर्किँदै
बागलुङ — दुई साता लामो आइसोलेसनमा बसेपछि बागलुङमा ६८ जना कोरोना संक्रमितको एकैदिन नेगेटिभ रिपोर्ट आएको छ । उनीहरु कोरोना निको भएपछि उनीहरु धमाधम घर फर्किरहेका छन् ।
दोस्रो पटकको पीसीआर परीक्षणको क्रममा उनीहरु सबैको नेगेटिभ रिपोर्ट आएको धौलागिरि अञ्चल अस्पतालका क्षयकुष्ठ सुपरभाइजर देवप्रकाश घिमिरेले बताए । उनीहरुमध्ये अञ्चल अस्पताल र धौलागिरि बहुमुखी क्याम्पसको प्रि-आइसोलेसनमा गरी ५३ जना उपचाररत थिए ।
मंगलबार उनीहरुमध्ये काठेखोला गाउँपालिका घर भएका १२ जना, बागलुङ नगरपालिकाका ११ जना र गलकोट नगरपालिकाका १५ जना मंगलबार डिस्चार्ज भएर घर फर्केका हुन् । केहीलाई भने व्यवस्थापकीय समस्याका कारण बुधबारमात्रै घर पठाइनेछ ।
नेगेटिभ रिपोर्ट आउनेमा बरेङका ६ जना, बडिगाडका ४ जना, जैमिनीका २ जना र ढोरपाटनका २ जना रहेको अस्पतालका मेडिकल सुपरिटेण्डेन्ट डा. शैलेन्द्र पोखरेलले बताए । गलकोटमा १५ जना डिस्चार्ज भएपछि खाली भएको प्रि-आइसोलेसन कक्षमा सोमबार संक्रमित भएका ८ जनालाई भर्ना गराइएको छ । यसअघि बागलुङका २३ जना डिस्चार्ज भएका थिए ।
जिल्लाका कुल १ सय ९४ जना संक्रमितमध्ये अब १ सय २ जनाको आइसोलेसनमा उपचार भइरहेको छ ।
प्रकाशित : असार १६, २०७७ २१:००