भारतले मोबाइल एप बन्द गरेकोमा चीनको आपत्ति

कान्तिपुर संवाददाता

काठमाडौँ — भारतले टिकटक र विच्याटलगायत ५९ वटा चिनियाँ मोबाइल एपमा प्रतिबन्ध लगाएकोमा चीनले कडा आपत्ति जनाएको छ । नयाँ दिल्ली स्थित चिनियाँ दूतावासका प्रवक्ता जि रोङले मंगलबार एक विज्ञप्ति जारी गर्दै यो प्रतिबन्धले दुई देशबीचको व्यापार सम्बन्धमा नकारात्मक असर पर्ने बताएका छन् । 

उनको विज्ञप्तिमा भारतको यो कदमलाई विभेदकारी र विश्व व्यापार संगठनको मान्यताको विरुद्ध पनि भनिएको छ । चिनियाँ मोबाइल एपले भारतको सार्वभौमिकता र आन्तरिक सुरक्षामा खतरा पैदा गरेको भन्दै भारतीय सूचना प्रविधि मन्त्रालयले ५९ वटा एपलाई प्रतिबन्ध लगाएको बताएको थियो । लद्दाखको गलवान क्षेत्रमा चिनियाँ सेनासँग भएको झडपमा २० भारतीय सैनिक मारिएका थिए । त्यसपछि भारत र चीनबीचको सम्बन्ध बिग्रिएको मानिन्छ । विज्ञप्तिमा भारतले ती एपले भारतीय सुरक्षाामै खतरा भएको भन्ने आरोपको पनि खण्डन गरिएको छ ।

साथै विज्ञप्तिमा भारतको यस कदमले ठूलो संख्यामा भारतीयको रोजगारी पनि गुम्ने बताइएको छ । यी एपहरु भारतीय उपभोक्तामाझ पनि निकै लोकप्रिय भएका भन्दै उपभोक्ताको रोजाइ र उपभोगको अधिकारलाई पनि यसले कुण्ठित गर्ने चीनको भनाई छ । चीनले एपलाई प्रतिबन्ध लगाउने निर्णय फिर्ता लिई दुई देशबीचको व्यापार सम्बन्धलाई सुमधुर बनाउन पनि आग्रह गरिएको छ ।

प्रकाशित : असार १६, २०७७ १९:०७
प्रतिक्रिया
पठाउनुहोस्

रुपन्देही र डडेलधुरामा सलहको नयाँ झुन्ड

राजु चौधरी

काठमाडौँ — रुपन्देहीमा  र डडेल्धुरामा सलहको नयाँ झुन्ड देखिएको छ । प्लान्ट क्‍वारेन्टाइन तथा विषादी व्यवस्थापन केन्द्रका सुचना अधिकारी रामकृष्ण सुवेदीका सोमबार करिब ४ बजेतिर प्रवेश गरेका झुन्ड ठूलो रहेको बताए ।

उनले उक्त झुन्डमा करिब १२/१५ लाखको संख्यामा सलह रहेको बताए ।उक्त झुन्ड टुक्रिएर दाङदेखि रोल्पासम्म सलह पुगेको बताए ।

‘सलहको ठूलो झुण्ड रुपन्देहीबाट छिरेको थियो । त्यहाँ बस्‍न खोज्दा किसानले धपाएर तितर/बितर पारे । ठूलो झुण्ड टुक्रिएर अर्घाखाची, प्यूठान र दाङतिर गएको छ,’ सलह सूचना केन्द्रका संयोजक समेत रहेका सुवेदीले भने, ‘दाङ प्रवेश गरेको झुण्ड ३ ग्रुपमा टुक्रिएर लमही, रोल्पा गएको देखिन्छ । करिब ४ टुक्रामा फैलिएको देखिन्छ ।’

केन्द्रका अनुसार दाङको लमहीमा करिब २ लाखको संख्यामा रहेको जनाएको छ । पश्चिम भारतबाट उत्तरखण्ड जाने क्रममा डडेल्धुरामा पनि सलह प्रवेश गरेको सुबेदीले बताए ।

‘डेडल्धुरामा करिब ४ सय हाराहारीमा प्रवेश गरेको अनुमान छ,’ उनले भने । केन्द्रका अनुसार पश्चिमतर्फ सलहको ठूलो मुस्लो देखिएको छ । सलहका केही झुन्ड अझै आउने सम्भावना देखिएको जनाएको छ । ‘झुन्ड देखेर किसान आत्तिएका छन,’ सुवेदीले भने, ‘कुनै तयारी अपनाएर/सलह भगाउने प्रयास गरिरहेका छौ ।’

प्रकाशित : असार १६, २०७७ १८:४८
पूरा पढ्नुहोस्
प्रतिक्रिया
पठाउनुहोस्
×