कोरोनाको महामारी नसकिँदै चीनमा अर्को नयाँ फ्लू भाइरस फेला पर्‍यो

यसले पनि महामारीको रुप लिनसक्ने वैज्ञानिकहरुको अनुमान
कान्तिपुर संवाददाता

कोरोना भाइरसको महामारी विश्वव्यापी देखिरहँदा चीनमा अर्को नयाँ फ्लू भाइरस देखिएको वैज्ञानिकहरुले बताएका छन् । उनीहरुलाई यस नयाँ भाइरसले पनि महामारीको रुप लिन सक्ने बताएका छन् । 

तस्बिर : होङली सन/साइन्स म्यागजिन

यो भाइरस सुँगुरमा भेटिएको हो र यो मानिसमा पनि सर्न सक्ने भन्दै अनुसन्धानकर्ताहरु चिन्तित देखिएका छन् । इन्फ्लुएन्जा इन्भेष्टिगेटर रोबर्ट वेबस्टरका अनुसार यस भाइरसको सरंचनामा परिवर्तन हुने र मानिस-मानिसबीच सर्न सक्ने किसिमको छ । त्यसैले यो पनि महामारीको रुपमा फैलिन सक्ने अड्कल लगाइएको छ । चीनमा सुँगुरको संख्या बढी भएकाले पनि यो भाइरस फैलिनसक्ने बताइएको छ ।

यो कस्तो भाइरस हो ?

चिनियाँ अनुसन्धनकर्ताको एक समूहले सन् २०११ देखि २०१८ सम्म सुँगुरमा देखिएको इन्फ्लुएन्जा भाइरसको अध्ययन गरेका थिए । उनीहरुले ‘एचवानएनवान’को एक प्रकार जिफो पाएका थिए जसले महामारी फैलाउन सक्ने युएस जर्नल प्रोसिडिङ्स अफ द नेसनल एकाडेमी अफ साइन्सेज नामक जर्नलमा उल्लेख छ ।

जर्नलमा वैज्ञानिकहरूले उक्त भाइरस नियन्त्रण गर्न सुँगुरपालन उद्योगमा काम गर्ने किसानहरुलाई, मासु काट्ने ठाउँ र मासु पाउने ठाउँमा निगरानी गर्न आवश्यक उपायहरू अपनाउनु पर्ने उल्लेख गरिएको छ । यो नयाँ भाइरस सन् २००९ मा सुँगुरमा देखिएको स्वाइन फ्लूसँग मिल्दोजुल्दो रहेको छ । अनुसन्धानकर्ताहरुले यो भाइरसलाई ‘जिफो इए एचवानएनवान’ नाम दिएका छन् ।

उनीहरुका अनुसार उक्त भाइरस संक्रमण भएमा मानिसको श्वासनलीमा कोषमा बढ्न र फैलिन सक्छ। यो भाइरस अहिले फैलिनसके पनि अनुसन्धानकर्ताहरुले मानिसमा सङ्क्रमण गर्न आवश्यक पर्ने कुराहरु यसमा भएकाले सतर्क हुनुपर्ने बताएका छन् ।

महामारीको रुपमा फैलिएको कोरोना भाइरस चीनको वुहानबाट देखिएको हो ।

प्रकाशित : असार १६, २०७७ १४:०२
प्रतिक्रिया
पठाउनुहोस्

नेकपा बैठक जारी : सचिवालय सदस्यहरुले बोल्ने, नेताहरुका कुर्सी मञ्‍चबाट तल झारियो

कान्तिपुर संवाददाता

काठमाडौँ — सत्तारुढ नेकपाको चौथो दिनको स्थायी कमिटी बैठक प्रधानमन्त्री निवास बालुवाटारमा जारी छ । मंगलबार बिहान ११.३० बजेपछि सुरु भएको बैठकमा सीमा समस्या समाधानमै केन्द्रित भएर बोल्न बाँकी रहेका सचिवालयका चार नेताले बोल्ने कार्यसूची तय भएको छ । 

तस्बिर : प्रधानमन्त्रीको निजी सचिवालय

वरिष्ठ नेताद्वय झलनाथ खनाल र माधवकुमार नेपाल, सचिवालय सदस्य रामबहादुर थापा र महासचिव विष्णु पौडेल सीमा समस्यासम्बन्धी एजेण्डामा बोल्न बाँकी छ । बैठकमा शीर्ष नेताले बोलेपछि कोभिड–१९ को नियन्त्रण, रोकथाम र उपचारसम्बन्धी एजेण्डामा छलफल केन्द्रित हुने भएको छ । बैठकका लागि सात एजेण्डा तय भएका थिए । पहिलो दिनको बैठकमा दुई अध्यक्षले बोलेका थिए ।

आइतबार प्रधानमन्त्री ओलीले आफ्नो नेतृत्वको सरकार ढाल्न आफ्नै पार्टीका केही नेता तथा भारतीय राज्यसंयन्त्र र दूतावास लागि परेको भन्ने अभिव्यक्ति दिएका थिए । यो गम्भीर र कूटनीतिक मयार्दाविपरीत प्रधानमन्त्रीले अभिव्यक्ति दिएको भन्दै बैठकमा यसबारे प्रधानमन्त्रीसँग जवाफ माग्ने तयारी पनि नेताहरुले गरेका छन् ।

सिटको व्यवस्थापन बदलियो, शीर्ष नेताहरुको कुर्सी मञ्‍चबाट तल झारियो

बुधबारबाट सुरु भएको स्थायी बैठकमा हरेक दिन कुर्सीको विषयलाई लिएर विवाद हुने गरेको छ । बैठकको पहिलो दिन दुई अध्यक्षका लागि सोफा राखिएको थियो । अन्य सदस्यहरुका लागि काठको कुर्सी व्यवस्था थियो । दुई अध्यक्षका सोफाभन्दा केहीपछि वरिष्ठ नेता खनाल र नेपालका लागि कुर्सी थिए । तर, नेता नेपालले असन्तुष्टि जनाएपछि दुई अध्यक्षकै बराबरीमा उनी र नेता खनाल बस्ने कुर्सी सारिएको थियो ।

बैठकको दोस्रो दिन दुई अध्यक्ष बस्नका लागि सोफाको व्यवस्था गरिएको भन्दै स्थायी कमिटीका नेताहरुले विरोध गरेका थिए । लगत्तै दुई अध्यक्षका लागि राखिएका सोफा हटाएर मञ्चमा नै अन्य नेतालाई जस्तै काठका कुर्सी राखिएको थियो । तर, बैठकको चौथौ दिनसम्म आईपुग्दा मञ्चमा भएका नेता तल झरेका छन्, सबै बस्ने कुर्सी उस्तै छन् ।

दुई अध्यक्ष, वरिष्ठ नेताद्वय खनाल र नेपाल साथै उपाध्यक्ष वामदेव गौतम अगाडिको रोमा बसेका छन् । प्रवक्ता नारायणकाजी श्रेष्ठ, सचिवालय सदस्यद्वय ईश्वर पोखरेल, रामबहादुर थापा र महासचिवलाई स्थायी कमिटीका अन्य सदस्यसँगैको रोमा बसेका छन् । शुक्रबार दोस्रो दिनको बैठकमा अनुपस्थित भएका र शनिबार केही बेरमात्र उपस्थित भएका प्रधानमन्त्री केपी शर्मा ओली मंगलबारको बैठकमा सहभागि छन् ।

बैठकअघि प्रधानमन्त्री र राष्ट्रपतिबीच भेटवार्ता

पूर्वनिर्धारित समयअनुसार बैठक ११ बजेलाई तय थियो । नेताहरु समयमै बालुवाटार पुगेका थिए । तर, प्रधानमन्त्री ओली भने नेताहरुलाई कुराएर राष्ट्रपति शीतल निवासमा पुगेका थिए । प्रधानमन्त्री ओली राष्ट्रपति विद्यादेवी भण्डारीसँगको भेटघाट सकेर बालुवाटार फर्किएपछि स्थायी कमिटी बैठक सुरु भएको थियो । राष्ट्रपति र प्रधानमन्त्रीबीच समसामयिक विषयमा छलफल भएको हुन सक्ने नेकपाका नेताहरुको अनुमान छ ।

प्रकाशित : असार १६, २०७७ १३:४२
पूरा पढ्नुहोस्
प्रतिक्रिया
पठाउनुहोस्
×