साउन ७ गतेसम्म अहिलेकै मोडालिटी अनुसार लकडाउनलाई निरन्तरता दिइने- समाचार - कान्तिपुर समाचार

साउन ७ गतेसम्म अहिलेकै मोडालिटी अनुसार लकडाउनलाई निरन्तरता दिइने

कान्तिपुर संवाददाता

काठमाडौँ — सरकारले लकडाउनलाई साउन ७ गतेसम्म निरन्तरता दिने निर्णय गरेको छ ।

सोमबार बसेको मन्त्रिपरिषद् बैठकले अहिलेकै मोडालिटीमा लकडाउनलाई निरन्तरता दिने निर्णय गरेको एक मन्त्रीले कान्तिपुरलाई बताए ।

यस्तै, बैठकले प्रदश सरकार र स्थानीय तहरुलाई जोखिम मूल्यांकन गरेर लकडाउनलाई कार्यान्वयन गराउन सक्‍ने निर्णय पनि गरेको छ ।

'बैठकमा हवाइ उडाउन खुलाउने विषयमा पनि कुरा भयो तर यसबारे कुनै निष्कर्ष भएन,'ती मन्त्रीले भने ।

यसअघि जेठ २८ मा मन्त्रिपरिषद् बैठकले असार १ गतेबाट लकडाउन खुकुलो पार्ने निर्णय लिएको थियो ।

त्यसैअनुसार अहिले जनसंख्या मन्त्रालय र गृह मन्त्रालयको निर्देशिकाअनुसार सुरुमा स्वास्थ्य, पेट्रोलियम पदार्थ, फोहोरमैला व्यवस्थापन, बैंक तथा वित्तीय संस्था, कृषिसम्बन्धी काम, उत्पादनशील उद्योग, निर्माण उद्योग, सबै प्रकारका ढुवानी र पुस्तक पसललगायतका सेवा खुला गरिएको छ । यिनै सेवा खुल्ने गरी सरकारले लकडाउन साउन ७ सम्मका लागि लम्बाउने निर्णय गरेको हो ।

मन्त्रिपरिषद्को जेठ २८ मा बसेको बैठकले उच्चस्तरीय समन्वय समितिको प्रस्तावअनुसार तीन चरणमा लकडाउन खोल्ने निर्णय लिएको थियो । पहिलो चरण २१ दिन, अवस्था हेरेर दोस्रो चरण १५ दिन र थप १५ दिन तेस्रो चरण गरी लकडाउन पूर्ण रूपमा खुला गर्ने सरकारको नीति थियो । तर, पहिलो चरण सकिएपछि थप २१ दिन सरकारले लकडाउन पहिलो चरणकै जस्तै लम्बाएको हो ।

प्रकाशित : असार १५, २०७७ २१:५९
प्रतिक्रिया
पठाउनुहोस्

नेकपा–कांग्रेस कार्यकर्ताको झडपमा प्रहरीसहित २१ घाइते

ओमप्रकाश ठाकुर

सर्लाही — सर्लाहीको धनकौलमा आइतबार साँझ नेकपा र कांग्रेसका कार्यकर्ताबीच भएको झडपमा गोली चल्दा १८ जना घाइते भएका छन् ।

झडप नियन्त्रणमा लिन गएका तीन प्रहरी पनि घाइते छन् । उनीहरूको अवस्था सामान्य छ । घाइते सबैको जिल्ला अस्पताल मलंगवामा उपचार भइरहेको छ ।

एक साताअघि सर्लाहीको रामनगरका रामजनम यादवको हत्या भएको भन्दै दोषीलाई कारबाही गर्नुपर्ने मागसहित नेकपाले आइतबार साँझ धनकौलमा जुलुस निकालेको थियो । ४०–५० जनाको समूहमा रहेका नेकपाका कार्यकर्ताले कांग्रेस कार्यकर्ताको घर अगाडि टायर बाल्ने क्रममा झडप भएको थियो । घर अगाडि टायर नबाल्न भन्दा आफ्ना कार्यकर्ता कुटिएको भन्दै कांग्रेसका कार्यकर्ताले पनि उनीहरूमाथि ढुंगामुढा गरेका थिए ।

झडप नियन्त्रणमा केही राउन्ड गोली चलाएको थियो । घाइते अधिकांशलाई गोलीको छर्रा लागेको छ । गोली कसले चलाएको भन्ने स्पष्ट भइनसकेको प्रहरीले जनाएको छ । जुलुस निकालेका बेला कांग्रेस कार्यकर्ताले एक्कासि ढुंगामुढा गरेको गोलीसमेत प्रहार गरेको आरोप नेकपाले लगाएको छ ।

प्रहरी उपरीक्षक विश्वमणि पोखरेलले स्थिति नियन्त्रणमा लिन प्रहरीले चार राउन्ड अश्रुग्यास प्रहार गरेको बताए । ‘आइतबार बिहान ट्र्याक्टरका विषयमा दुई जनाबीच कुटाकुट भएको थियो, त्यसलाई नै उनीहरूले दुई पक्ष र पार्टीको इस्यु बनाइदिए,’ प्रहरी उपरीक्षक पोखरेलले भने, ‘गोली कसले प्रहार गर्‍यो भनेर अनुसन्धान गरिरहेका छौं ।’ गोली प्रहारका विषयमा एक जनालाई नियन्त्रणमा लिएर प्रहरीले सोधपुछ गरिरहेको छ ।

प्रकाशित : असार १५, २०७७ २१:४४
पूरा पढ्नुहोस्
प्रतिक्रिया
पठाउनुहोस्
×