पीसीआर परीक्षणका लागि १० वटा प्रयोगशाला थपिने

कान्तिपुर संवाददाता

काठमाडौँ — कोरोना भाइरसको पीसीआर विधिबाट परीक्षणका लागि स्वास्थ्य तथा जनसंख्या मन्त्रालयले थप १० वटा प्रयोगशाला सञ्चालन गर्ने निर्णय गरेको छ । पीसीआर परीक्षणको दायरा बढाउने उद्देश्यले मन्त्रालयले प्रयोगशाला थप्ने निर्णय गरेको हो । हाल मुलुकभर २३ वटा प्रयोगशाला सञ्चालनमा रहेको छ। 

मन्त्रालयका अनुसार थप गरिएका १० वटा प्रयोगशालाहरुमा मेची अस्पताल, डडेल्धुरा अस्पताल, दैलेख अस्पताल, राष्ट्रिय आयुर्वेद अनुसन्धान तथा तालिम केन्द्र, सशस्त्र प्रहरी अस्पताल, पाल्पा अस्पताल, धौलागिरि अस्पताल, धनकुटा अस्पताल, वीरेन्द्र प्रहरी अस्पताल र नेपाली सेना अस्पताल रहेका छन् । यो सँगै पीसीआर परीक्षणका लागि प्रयोगशालाको संख्या ३३ पुगेको छ ।


प्रकाशित : असार १२, २०७७ १८:४८
प्रतिक्रिया
पठाउनुहोस्

सुदूरपश्चिम प्रदेशसभा बैठक दोस्रो दिन पनि अवरुद्ध

अर्जुन शाह

धनगढी — सुदूरपश्चिम प्रदेशसभाको शुक्रबारको बैठक पनि अवरुद्ध भएको छ । 

प्रमुख प्रतिपक्षी कांग्रेस र राजपाका सांसदहरुले बैठक अवरुद्ध गरेपछि बजेटमाथिको छलफलसमेत सुरु हुन सकिरहेको छैन । यसअघि बुधबारको बैठकसमेत अवरुद्ध भएको थियो । प्रतिपक्षी दलहरुले प्रदेश सरकारले कोरोना संक्रमण रोकथामको व्यवस्थापन प्रभावकारी ढंगले गर्न नसकेको, पीसीआर परीक्षण सुस्त भएको तथा कोरोना रोकथाममा भएको खर्चको हिसाबकिताब दिनु पर्ने लगायतका माग गर्दै आएका छन् ।

राजपा सांसद कृष्ण चौधरीले कोरोना परीक्षणका लागि पीसीआर जाँच हुन नसकेको, संक्रमितहरुलाई परीक्षण बिना नै घर पठाइने गरेको, प्रदेश सरकारले कोरोना संक्रमण रोकथाम र उपचारमा गरेको खर्चको हिसाबकिताब दिनुपर्ने र सरकार स्वेच्छाचारी ढंगले अघि बढेकोमा आलोचना गरेका थिए ।

अघिल्लो दिनझैं सभामुख अर्जुनबहादुर थापाले बैठक सुरु गर्नासाथ प्रतिपक्षी दलका सांसदहरु आ–आफ्नो स्थानमा उठेर मौन भएपछि एक सांसदलाई बोल्न अनुमति दिएका थिए । सांसद चौधरीले मन्तव्य राखिसकेपछि सभामुख थापाले सरकारलाई आफ्ना धारणा राख्नका लागि बैठक सञ्चालन हुनुपर्नेमा जोड दिएका थिए । त्यहीअनुसार प्रतिपक्षी सांसदहरुले उठाएका सवालहरुको जवाफ पाउन पनि बैठक सञ्चालन हुनै पर्ने भन्दै सभामुखले बैठक सञ्चालनमा सहयोग गर्न आग्रह गरे । तर प्रतिपक्षी सांसदहरुले मानेनन् ।

प्रतिपक्षी सांसदहरु आशनमा उभिएर मौन भइरहेपछि बुधबारझैं शुक्रबारको बैठक स्थगित भएको हो ।

प्रकाशित : असार १२, २०७७ १८:२५
पूरा पढ्नुहोस्
प्रतिक्रिया
पठाउनुहोस्
×