सत्तारूढ सांसदको प्रश्न, 'नेपालले जब स्वतन्त्र निर्णय गर्छ, किन भारतबाट टाढा गर्न खोजिएको भनिन्छ ?'- समाचार - कान्तिपुर समाचार
कान्तिपुर वेबसाईट
AdvertisementAdvertisement

सत्तारूढ सांसदको प्रश्न, 'नेपालले जब स्वतन्त्र निर्णय गर्छ, किन भारतबाट टाढा गर्न खोजिएको भनिन्छ ?'

कान्तिपुर संवाददाता

काठमाडौँ — सत्तारुढ नेकपाका सांसद वेदुराम भुसालले नेपालले स्वतन्त्र निर्णय गर्न खोज्दा किन भारतबाट टाढ गर्न खोजिएको भनेर प्रश्न गरिने गरेको बताएका छन् । राष्ट्रियसभाको मंगलबारको बैठकमा भुसालले नागरिकता विधेयकका विषयमा प्रतिपक्षी दलका सांसदले उठाएको प्रश्नको जवाफ दिने शैलीमा बोल्दै राजनीतिक अभिष्टका निम्ति परराष्ट्र सम्बन्धलाई नजोड्न आग्रह गरेका थिए ।

राष्ट्रियसभाको सोमबारको बैठकमा प्रमुख प्रतिपक्षी कांग्रेसका सांसद जितेन्द्रनारायण देवले वैवाहिक अंगीकृत नागरिकतामा ७ वर्षको समय सीमा लगाउने निर्णय असंवैधानिक भएको, नेपालको परराष्ट्र सम्बन्धको आधार भत्काउने, नेपाललाई चीनको झोलामा राख्ने लगायतका प्रतिगामी काम भएको आरोप लगाएका थिए । उनले सत्तारुढ नेकपा 'मण्डले राष्ट्रवाद'मा लागेको भनेका थिए ।

भुसालले ती भनाइ आपत्तिजनक भएको बताए । उनले संविधानले संघीय कानुन बनाएर वैवाहिक अंगीकृत नागरिकताको व्यवस्था भनेको अवस्थामा सोहीअनुसार कानुन बनाउँदा कसरी संविधान विपरीत हुन्छ भनेर प्रश्न गरेका थिए ।

'चीन जोड्ने कोदारी राजमार्ग निर्माण गर्ने बेला, संविधान निर्माणका बेलाको र नाकाबन्दीको बेलाकै जस्तो नागरिकता विधेयकमा पनि कुरा उठाइएको' भुसालको भनाइ थियो । 'नेपालले स्वतन्त्र ढंगले जब निर्णय गर्छ किन भारतबाट टाढा गर्न खोजिएको भनिन्छ ? के भारतको चंगुलमा राखिरहनुपर्छ भनिरहेको हो ? राजनीतिक दुर्घटना हुन्छ भनिएको छ, के भारतको छोटे भाइ भइरहेन भनेर हो ? नेपालले आफ्नो खुट्टामा आफै‌ हिँड्न खोज्दा किन आपत्ति हो ?' उनले प्रश्न गरेका थिए ।

भारतको नाम लिएर नेपाली नेताहरूले नै किन आगो लगाउछौं भनिँदैछ भनेर उनले प्रश्न गरेका थिए ।

नेपालले कानुन भारतका युपी र बिहारबाट आउने महिलाका लागि मात्रै निर्णय नगरेर विश्वका जुनसुकै मुलुकका महिलाले नेपाली पुरुषसँग विवाह गरेर आउँदा पनि त्यो व्यवस्था लागु हुने बुझ्न उनले आग्रह गरेका थिए । 'जुन खालको व्यवस्था हाम्रो छिमेकले गरेको छ त्यस्तै व्यवस्था हामीले गर्दाखेरि भारतसँगको सम्बन्ध कटअप हुन्छ भन्ने ? हाम्रो अन्तर्राष्ट्रिय सम्बन्धको जग भत्किन्छ भन्ने ? राजनीतिक अभिष्टका निम्ति राखिएका यी तर्क हुन्,' भुसालले भने ।

हेर्नुहोस्, सांसद जितेन्द्रनारायण देवले के भनेका थिए ?

प्रकाशित : असार ९, २०७७ ११:५५
प्रतिक्रिया
पठाउनुहोस्

स्वास्थ्यकर्मी र सुरक्षाकर्मीमा संक्रमण देखिएपछि बन्दीपुर एक हप्ता बन्द

सम्झना रसाइली

तनहुँ — स्वास्थ्यकर्मी र सुरक्षाकर्मीसहित ११ जनामा कोरोना भाइरसको संक्रमण पुष्टि भएसँगै बन्दीपुर गाउँपालिका क्षेत्र एक हप्तासम्म पूर्ण रुपमा बन्द गरिने भएको छ ।

सोमबार ११ जनामा कोरोना संक्रमण पुष्टि भएसँगै गाउँपालिकाको आपत्कालीन बैठक बसेर सम्पूर्ण क्षेत्र एक हप्ताका लागि बन्द गर्ने निर्णय गरेको अध्यक्ष पूर्णसिंह थापाले बताए ।

गाउँपालिकाका अनुसार सोमबार २ जना स्वास्थ्यकर्मी, १ जना सुरक्षाकर्मी र २ वटा स्थानमा रहेको क्वारेन्टाइनमा रहेका ८ जना गरी ११ जनामा कोरोना भाइरस संक्रमण पुष्टि भएको छ ।

स्वास्थ्यकर्मी र सुरक्षाकर्मीमा समेत संक्रमण देखिएका कारण समुदायमा फैलने जोखिम उच्च रहेको भन्दै असार ९ गतेदेखि लागू हुने गरी गाउँपालिकाले प्रदान गर्दै आइरहेको सबै सेवाहरु र इलाका प्रहरी कार्यालय बन्दीपुर १ हप्ताका लागि बन्द गर्ने निर्णय गरिएको अध्यक्ष थापाले बताए । उनले भने, ‘बन्दीपुर गाउँपालिकाको सबै सेवा, गाउँपालिकाअन्तर्गतका सबै सरकारी कार्यालय, गैरसरकारी संस्था, निजी क्षेत्र, बैंक तथा वित्तीय संस्थाहरु २ हप्ताका लागि पूर्ण रुपमा बन्द गर्ने निर्णय गरेका छौं ।’ गाउँपालिकामा क्षेत्रमा थप संक्रमण फैलन नदिनका लागि बन्दाबन्दीको निर्णयलाई पूर्ण रुपमा पालना गर्न, सबै गाउँपालिका बासिलाई उच्च मनोबलका साथ भौतिक दूरी कायम गरी आफू र समुदायलाई सुरक्षित रहन गाउँपालिकाले अनुरोध गरेको छ ।

त्यस्तै तनहुँको व्यास नगरपालिकामा ८, शुक्लागण्डकी नगरपालिकामा ५, भानु नगरपालिकामा ४, रिसिङ गाउँपालिकामा ३२, घिरिङ गाउँपालिकामा २४, भिमाद नगरपालिकामा ३, आबुखैरेनी गाउँपालिकामा ३ र बन्दीपुर गाउँपालिकामा ११ गरी ८९ जनामा कोरोना भाइरस संक्रमण पुष्टि भएको छ । तनहुँमा कोरोना संक्रमणमुक्त भएर ९ जना घर फर्किएका छन् ।

प्रकाशित : असार ९, २०७७ ११:५०
पूरा पढ्नुहोस्
प्रतिक्रिया
पठाउनुहोस्
×