वैवाहिक अंगीकृत नागरिकता ७ वर्षपछि दिने व्यवस्था संसदीय समितिबाट पारित 

जयसिंह महरा

काठमाडौँ — नेपाली पुरुषसँग विवाह गरेर आउने विदेशी महिलालाई लगातार ७ वर्ष नेपालमा बसेपछि मात्रै अंगीकृत नागरिकता दिने गरी नागरिकता ऐनमा संशोधन गर्ने प्रस्ताव प्रतिनिधि सभाको राज्यव्यवस्था समितिबाट पारित भएको छ ।

समितिको बहुमतले यसलाई पारित गरेको समिति सभापति शशी श्रेष्ठले जानकारी दिएकी छन् । प्रस्तावको पक्षमा नेकपाका सांसदहरू थिए भने प्रतिपक्षी दलका सांसदहरूले यसमा असहमति जनाएका छन् ।

कांग्रेस सांसद दिलेन्द्र प्रसाद बडूले अरु बुँदामा आफ्नो सहमति रहेको तर वैवाहिक अंगीकृत नागरिकता विवाह गरेको ७ वर्षपछि दिने व्यवस्थामा सहमत हुन नसकेको बताए । कांग्रेसले समितिमा यसबारे आफ्नो फरक मत पनि दर्ता गराएको छ । पार्टीका ६ जना सांसदले दर्ता गराएको फरक मत बडुले समितिमा पढेर सुनाएका थिए । कांग्रेसले नागरिकता ऐनको संशोधन संविधानमा उल्लेख भएको संघीय कानून बमोजिम नभएको भन्दै यसलाई असंवैधानिक र संविधान नै संशोधन गर्ने प्रयास भनेको छ । विपक्षी पार्टीहरु राजपा, समाजवादीले पनि यसको विरोध गरे ।

राजपा नेता राजेन्द्र महतोले अंगीकृत नागरिकले नेपालको राष्ट्रियतामा कहाँ खलल पुर्‍याएका छन् भन्ने प्रश्न गरेका थिए । उनले यसले संवैधानिकमात्र नभइ पारिवारिक समस्या समेत पैदा हुने बताएका थिए । राज्यव्यवस्था समितिले आइतबार विधेयकमा अंगीकृत नागरिकता नपाञ्जेल विदेशी महिलालाई स्थायी बसोबास अनुमति पत्र दिने प्रस्ताव पनि ल्याएको छ । यसले राजनीतिक र सरकारी नियुक्ति जागिरबाहेकका विभिन्न ७ वटा अधिकारको व्यवस्था गरेको छ । यो प्रावधान पनि पारित भएको छ । अंगीकृतबाहेक राज्यव्यवस्था समितिले गरेका अन्य प्रस्तावहरु सर्वसम्मतिले पारित भएका छन् ।

प्रकाशित : असार ७, २०७७ १८:०२
प्रतिक्रिया
पठाउनुहोस्

झापामा होम क्‍वारेन्टाइनमा बसेकालाई कोरोना

पर्वत पोर्तेल

काँकडभिट्टा — भारतबाट आएर होम क्‍वारेन्टाइनमा बसेका झापा मेचीनगर ६ काँकडभिट्टाका ३५वर्षीय पुरुषमा कोरोना संक्रमण देखिएको छ । होम क्‍वारेन्टाइनमा बसेकालाई कोरोना संक्रमण भएको जिल्लामै पहिलो घटना हो । 

स्वास्थ्य मन्त्रालयको आइतबारको प्रेस ब्रिफिङमा झापामा ६ जना संक्रमित थपिएका छन् । जसमा काँकडभिट्टाका ती पुरुष सहित वडा नम्बर ५ का ३० वर्षीय पुरुष छन् । उनी बालकल्याण मावि अधेरीको क्‍वारेन्टाइनमा बसेका थिए । उनी पनि भारतबाटै आएका हुन् ।

स्वास्थ्य कार्यालय झापाका फोकल पर्सन जीवन चौलागाईंका अनुसार आइतबार थपिएका २ सँगै झापाको मेचीनगरमा कोरोना संक्रमितको संख्या ५ पुगेको छ । संक्रमण दुवैलाई मोरङको गोठगाउँस्थित कोभिड उपचार केन्द्रमा लगिएको छ ।

आइतबारै झापाको कन्काइमा १ महिला र अर्जुनधारा २ महिला र १ पुरुषमा संक्रमण पुष्टि भएको चम्लागाईंले जनाए । कन्काईकी महिला भर्खरै कुवेतबाट आएकी हुन् । अन्य भारतबाट आएर क्‍वारेन्टाइनमा बसेका थिए ।

झापा कोरोना संक्रमितको संख्या १८९ पुगेको छ ।

प्रकाशित : असार ७, २०७७ १७:५३
पूरा पढ्नुहोस्
प्रतिक्रिया
पठाउनुहोस्
×