क्वारेन्टाइनमा ‘बलात्कार’ घटना : दोषीलाई कारबाही गर्न माग गर्दै प्रदर्शन
टीकापुर — क्वारेन्टाइनमा महिला बलात्कार भएको घटनाको विरोधमा सोमबार पनि कैलालीको लम्की बजारमा प्रदर्शन भयो । आइतबार लम्कीचुहा नगरपालिका–१ को कार्यालयसमेत तोडफोड गरेका स्थानीय प्रदर्शनकारी सोमबार भने दिनभर शान्तिपूर्ण रूपमा विरोधमा उत्रिएका थिए । लम्कीचुहा–१ का वडाध्यक्ष जनक बमले घटना सामसुम पार्न खोजेको स्थानीयको आरोप छ ।
लम्की बजारको मुख्य चोकमा यातायात आवागमन ठप्प पारेका प्रदर्शनकारीले ‘घटना ढाकछोप गर्नेलाई कारबाही गर, क्वारेन्टाइन भंग गर, दोषीलाई कारबाही गर’ लगायत नारा लेखिएका प्लेकार्ड बोकेका थिए ।
लम्कीचुहाका नगर प्रमुख महादेव बजगाईंले घटनाको सत्यतथ्य छानबिन र संलग्नलाई कारबाही गर्न नगरपालिका संवेदनशील रहेको बताए । ‘क्वारेन्टाइनमा दुई/दुई जना स्वास्थ्यकर्मी र स्वयंसेवकको व्यवस्था थियो,’ उनले भने, ‘उनीहरूबाटै बदमासी भयो । अपराधीलाई कानुनी कठघरामा उभ्याएर कडा कारबाही गर्न नगर कार्यपालिकाबाट निर्णय गरेका छौं ।’ उनले आरोपितलाई पक्राउ गरी अनुसन्धान सुरु गरे पनि अराजक समूहले वडा कार्यालय तोडफोड र स्वास्थ्यकर्मीमाथि समेत हातपात गरेको बताए । बजगाईंले स्थानीय र प्रदर्शनकारीलाई घटनाको अनुसन्धानमा प्रहरीलाई सघाउन आग्रहसमेत गरे ।
‘घटनालाई लिएर अधिकारकर्मी, पत्रकार र जनप्रतिनिधि सबैले चासो राख्नुभएको छ । क्वारेन्टाइनमा महिला सुरक्षाका विषयमा आफूकहाँ सोमबार महिलाहरू डेलिगेसनमा समेत आउनुभयो,’ उनले भने, ‘यसमा हामी संवेदनशील छौं, दोषीलाई कानुनबमोजिम कारबाही गर्न कृपया सबै पक्षको साथ चाहन्छौं ।’
के थियो घटना ?
लम्कीचुहा–१ स्थित सहिद स्मृति माध्यमिक विद्यालयका चार भवनलाई क्वारेन्टाइन बनाइएको छ । जसमा एक महिलासहित २० जना पुरुषलाई राखिएको छ । महिला र पुरुषलाई छुट्टाछुट्टै भवनमा बसाइएको छ । छुट्टै बसेकी ३१ वर्षीया महिलाले शनिबार राति क्वारेन्टाइनमा खटिएका तीन जना स्वयंसेवकले आफूलाई बलात्कार गरेको आइतबार आरोप लगाइन् ।
पीडित महिला बलात्कृत भएको भनिएको विद्यालयको कोठा । तस्बिर : गणेश चौधरी/कान्तिपुर
ती महिला बसेको कोठाको दुवै छेउमा डेस्क र बेन्च छन् । भुइँमा चटाई ओछ्याएर सुत्ने व्यवस्था मिलाइएको छ । कोठाको झ्यालमा ग्रिल लगाइएको छ, पल्ला भने छैनन् । आइतबार बिहान उनी खाजा खान बोलाउँदा पनि बाहिर निस्किनन् । करिब ९ बजेतिर उनका आमा र भाइ क्वारेन्टाइन आएपछि मात्रै घटनाबारे खुलासा भयो । क्वारेन्टाइनमा खटिएकी स्वास्थ्यकर्मी सीता प्याकुरेलले उनकी आमाले घटनाबारे बताएपछि मात्रै थाहा भएको बताइन् ।
‘हामी सबै अचम्ममा पर्यौं । उहाँका आमा र भाइलगायत आएपछि आरोपित तीन जना क्वारेन्टाइनबाट भागे,’ प्याकुरेलले भनिन्, ‘उहाँ सुतेकोबाट अर्को कोठामा लगेर बलात्कार गरिएको भनिएको छ, सत्य कुरा के हो थाहा भएन । राति क्वारेन्टाइनमा बसेका र मैले पनि केही थाहा पाइन ।’ प्याकुरेल भने विद्यालयको अर्को भवनमा सुत्थिन् ।
बलात्कारको आरोपमा २० वर्षीय लक्ष्मण परियार, २२ वर्षीय किशोर परियार र १७ वर्षीय सर्जन विक आइतबार नै पक्राउ परेका छन् । उनीहरू तीनै जना छेउको अर्को भवनमा बस्दै आएको प्याकुरेलले जानकारी दिइन् ।
आफूमाथि भएको दुव्र्यवहारका बारेमा बताउन आमालाई बोलाएको र आमा आएपछि मात्र पीडा सुनाउन सकेको कुरा पीडित महिलाले बताएको स्थानीय महिला अधिकारकर्मी गोमा आचार्यले जानकारी दिइन् । पीडितको भनाइ उद्धृत गर्दै आचार्यले भनिन्, ‘रातभरि पीडा सहेर रुँदै बसें । बिहान भएपछि आमालाई बोलाएँ र भनें ।’
जेठ २० मा भारतको बैंग्लोरबाट आएकी ती महिला सोझै क्वारेन्टाइनमा बसेकी हुन् । श्रीमान् अर्की श्रीमतीलाई लगेर भारत गएपछि दुई छोराको पालनपोषणका लागि काम गर्न उनी बैंग्लोर गएकी उनकी आमाले बताइन् । यौन दुव्र्यवहारको आरोपपछि ती महिलालाई स्वास्थ्य जाँचका लागि प्रहरीले आइतबार धनगढी लगेको थियो । सोमबार उनलाई घर ल्याइएको छ ।
लम्कीचुहा नगरपालिका–१ स्थित सहिद स्मृति माविमा बनाइएको क्वारेन्टाइन । तस्बिर : गणेश चौधरी/कान्तिपुर
पीडित महिलाकी आमाले रोगबाट जोगाउन क्वारेन्टाइन बसेकी छोरी आफैं असुरक्षित भएर दुव्र्यवहारमा परेको गुनासो गरिन् । उनले घटनामा संलग्नलाई कडा कारबाही र लम्कीचुहा–१ का वडाध्यक्षले समेत राजीनामा दिनुपर्ने आफूहरूको माग रहेको बताइन् । ‘रोगबाट हामी सबैको सुरक्षाका लागि क्वारेन्टाइन गएकी हो । आफैं असुरक्षित भई,’ उनले भनिन्, ‘तीन लोग्ने मान्छेका अगाडि एक महिलाको के लाग्छ ? जीवनभरको दाग लाग्यो । अब कसरी मेटाउने ?’ पीडित महिलाकी आमाका अनुसार शनिबार मध्यरातपछि घटना भएको हो ।
लम्कीस्थित इलाका प्रहरी कार्यालयका प्रहरी निरीक्षक ज्ञानेन्द्र चन्दले आरोपितहरूलाई हिरासतमा लिइएको र घटनाको अनुसन्धान जारी रहेको बताए ।
प्रकाशित : असार २, २०७७ ०८:१५