कोरोना संक्रमण फैलिएपछि भारतबाट साढे ७ लाख नेपाली भित्रिए- समाचार - कान्तिपुर समाचार
कान्तिपुर वेबसाईट
AdvertisementAdvertisement

कोरोना संक्रमण फैलिएपछि भारतबाट साढे ७ लाख नेपाली भित्रिए

लकडाउन घोषणापछि झन्डै साढे २ लाख आए 
मातृका दाहाल

काठमाडौँ — कोरोना संक्रमण (कोभिड–१९)को महामारी फैलिएपछि भारतबाट हालसम्म साढे ७ लाखभन्दा बढी नेपाली स्वदेश फर्किएका छन् । भारतमा कोरोना संक्रमण फैलिएसँगै बढेको त्रासका बीच २०७६ फागुन २५ यता ७ लाख ५३ हजार २ सय १९ नेपाली घर फर्किएका हुन् ।

त्यसमध्ये २०७६ चैत ११ गते लकडाउन घोषणा भएसँगै स्वदेश फिर्नेको संख्या २ लाख ४३ हजार ८ सय ३१ छ ।

लकडाउन घोषणाअघि सीमा नाकामा २०७६ फागुन २५ गतेबाट हेल्थ डेस्क सञ्चालनमा ल्याइएको थियो । हेल्थ डेस्क राखेपछिको १५ दिन अर्थात् २०७६ चैत १० गतेको अवधिमा मात्रै ५ लाख ५५ हजार ४ सय ६९ जना मानिस भित्रिएका थिए ।

गृह मन्त्रालयको तथ्यांकअनुसार फागुन २५ देखि चैत १० गतेको अवधिमा प्रदेश १ का नाकाबाट २ लाख ४ हजार ७ सय २१, प्रदेश २ बाट ५६ हजार १ सय २, गण्डकी प्रदेशका नाकाबाट ७ हजार ३ सय ६, प्रदेश ५ बाट १ लाख ७१ हजार १ सय ३३ र सुदुरपश्चिम प्रदेशका नाकाबाट १ लाख १६ हजार ६५ जना मानिस भित्रिएका छन् । नाकाबाट भित्रिएका सबे स्थायी थातथलो पुगिसकेको गृहले बताएको छ । तर उनीहरुको न स्वास्थ्य परीक्षण नै गरियो न सरकारले यसप्रति संवेदनशीलता नै देखायो । जसका कारण अहिले देशभर संक्रमण फैलिसकेको छ । तापक्रम मापन गरेर नाकाबाट भित्रिएका सबै आफ्नो घर गएका थिए ।

लकडाउन पछि प्रदेश १ बाट ८ हजार ९ सय ९, प्रदेश २ का नाकाबाट १ हजार १ सय ४, प्रदेश ५ हुँदै ७२ हजार ६ सय ९ र सुदुपश्चिम प्रदेशका नाकाबाट ९७ हजार ६ सय ५४ जना स्वदेश फर्किएका थिए । भारतबाट १० लाख भन्दा बढी नेपाली भित्रिने आकलन सरकारको थियो । यो संख्या अझै बढ्न सक्ने अनुमान भएको गृहका एक अधिकारीले बताए । तर यसलाई धान्न सक्ने गरी न स्वास्थ्य परीक्षण गर्ने क्षमता सरकारसँग छ, न क्वारेन्टाइन व्यवस्थापन नै व्यवस्थित ।

लकडाउनपछि भित्रिएकालाई स्थानीय तहका क्वारेन्टाइनमा १४ दिनसम्म राखिने व्यवस्था मिलाइएको छ । पछिल्लो तथ्यांकअनुसार देशभरका क्वरेन्टाइनमा १ लाख ७० हजार ३ सय ३२ जना मानिस छन् । संक्रमण देखिएपछि आइसोलेसनमा बस्नेको संख्या ३ हजार २६० पुगेको छ । क्वारेन्टाइनमा बसेका मध्ये पनि शंका लागेका र विरामी परेकाको मात्रै परीक्षण गरिएको छ ।

स्वास्थ्य मन्त्रालयका अनुसार हालसम्म ३ हजार ७ सयभन्दा बढीमा संक्रमण देखिसकेको छ । संक्रमणबाट हालसम्म सिन्धुपाल्चोक, बाके, गुल्मी, बारा, ललितपुर, अर्घाखाची, दैलेख, बाजुरा, दोलखा, पाल्पा, सुर्खेत, कैलाली, डोल्पा र स्याङजामा गरी १४ जनाको मृत्यु भइसकेको छ । क्वारेन्टाइनमै बसेका १७ जनाको मृत्यु भएकोमा ९ जनामा संक्रमण देखिएको थियो ।

प्रकाशित : जेष्ठ २६, २०७७ १९:०८
प्रतिक्रिया
पठाउनुहोस्

दुल्लुबाट बालकसहित ३ संक्रमित डिस्चार्ज

ज्योति कटुवाल

दैलेख — दुल्लु नगरपालिकास्थित छिउडी–पुसाकोट स्वास्थ्यचौकीबाट ३ संक्रमितलाई डिस्चार्ज गरिएको छ । दुई वर्षीय बालक, ३३ वर्षीया गर्भवती र ३० वर्षीया महिलालाई सोमबार डिस्चार्ज गरिएको हो । 

दुल्लु नगरपालिकाले स्वास्थ्यचौकीलाई अस्थायी कोरोना अस्पताल बनाएको छ । आइसोलेसनमा डा. प्रशान्त चौलागाईंसहित ५ स्वास्थ्यकर्मी परिचालन गरिएको छ । स्थानीय तहले संक्रमितलाई डिस्चार्ज गरेको यो पहिलो घटना भएको नगरप्रमुख घनश्याम भण्डारीले दाबी गरे । उनका अनुसार डिस्चार्ज गरिएकाहरुमा १० दिनअघि संक्रमण देखिएको थियो । उनीहरुमा महेन्द्र जयदेवी माविको क्वारेन्टाइनमा बसेको बेला संक्रमण पुष्टि भएको हो । सोमबार पुन: पीसीआर परीक्षण गर्दा रिपोर्ट नेगेटिभ आएपछि उनीहरु डिस्चार्ज भएका हुन् ।

स्वास्थ्यचौकीको आइसोलेसनमा अहिले ३९ जना संक्रमितको उपचार भइरहेको नगरप्रमुख भण्डारीले बताए । उनका अनुसार स्वास्थ्यचौकीलाई ४५ शय्याको आइसोलेसनको रुपमा रुपान्तरण गरिएको छ । नगरपालिकामा २ सय ३६ जनाको पीसीआर परीक्षण गर्दा ३९ जनामा संक्रमण देखिएको र ५३ जनाको रिपोर्ट आउन बाँकी रहेको उनले जानकारी दिए । यसअघि १ हजार २ सय ६६ जनाको आरडीटी गर्दा ४६ जनाको रिपोर्ट नेगेटिभ देखिएको थियो ।


प्रकाशित : जेष्ठ २६, २०७७ १९:०६
पूरा पढ्नुहोस्
प्रतिक्रिया
पठाउनुहोस्
×