जनता समाजवादी पार्टीको नेतृत्वमा जुट्यो सहमति- समाचार - कान्तिपुर समाचार
कान्तिपुर वेबसाईट
AdvertisementAdvertisement

जनता समाजवादी पार्टीको नेतृत्वमा जुट्यो सहमति

संघीय परिषद्को अध्यक्ष बाबुराम भट्टराई, केन्द्रीय समिति अध्यक्षमा महन्थ ठाकुर र उपेन्द्र यादव
पार्टी दर्ताका लागि निर्वाचन आयोग जाने तयारी 
बबिता शर्मा

काठमाडौँ — राष्ट्रिय जनता पार्टी (राजपा) र समाजवादी पार्टी मिलेर बन्न लागेको जनता समाजवादी पार्टीको नेतृत्व टुंगो लागेको छ । नेतृत्वमा सहमति जुटेसँगै जनता समाजवादी पार्टी दर्ताका लागि नेताहरु निर्वाचन आयोग जाने तयारी भएको नेता नवराज सुवेदीले बताए । 

एकीकृत पार्टीको संघीय परिषद्को अध्यक्ष बाबुराम भट्टराई र केन्द्रीय समिति अध्यक्षमा महन्त ठाकुर र उपेन्द्र यादव रहने सहमति जुटेको हो । अशोक राई र राजेन्द्र महतो वरिष्ठ नेता रहने भएका छन् ।

दुई दलले वैशाख १० गते राति एकताका लागि सैद्धान्तिक सहमति गरेका थिए । त्यसको भोलिपल्ट अर्थात ११ गते नेताहरु निर्वाचन आयोग पुगेर नयाँ दल दर्ताका लागि निवेदन दिएका थिए ।

राजनीतिक दलसम्बन्धी ऐनअनुसार दुई पार्टीबीच एकता गर्ने घोषणा गरेको ४५ दिनभित्र दलको विधान, पार्टी नेतृत्व, पार्टी एकता गर्न गरिएको सहमति, दुवै पक्षका केन्द्रीय सदस्यको हस्ताक्षर, संयुक्त बैठकको निर्णय बुझाउनु पर्ने व्यवस्था छ ।

सरकारले राजनीतिक दलसम्बन्धी अध्यादेश ल्याएपछि दुई दलले हतारमा पार्टी एकताको सैद्धान्तिक घोषणा गरेका थिए ।

प्रकाशित : जेष्ठ २५, २०७७ १४:४२
प्रतिक्रिया
पठाउनुहोस्

बुटवलबाट ८ वर्षीया बालिकासहित ९ जना कोरोना संक्रमित निको भए

सन्जु पौडेल

बुटवल — बुटवलको कोरोना विशेष आइसोलेसन सेन्टरमा रहेका ८ वर्षीया बालिकासहित नौ जना संक्रमित कोरोनामुक्त भएका छन् । बुटवल–१० स्थित एन्फा फुटबल सेन्टरमा निर्माण गरिएका आइसोलेसन सेन्टरमा उनीहरुको विभिन्न चरणमा गरिएको कारोना परीक्षणमा संक्रमण नदेखिएपछि आइतबार डिस्चार्ज गरिएको हो । 

कोरोना नतिजा नेगेटिभ आएपछि डिस्चार्ज हुने नौ जनालाई बुटवलका प्रमुख शिवराज सुवेदीले पुष्पगुच्छा प्रदान गर्दै बिदाई गरे । ‘घर फर्किएपछि समुदायमा सचेतना दूतका रुपमा काम गर्न आग्रह गरिएको छ,’ प्रमुख सुवेदीले भने, ‘सन्तुलित आहारविहारलाई जारी राख्न समेत सुझाएका छौं ।’

आइतबार डिस्चार्ज हुनेमा कपिलवस्तुका ८ र रुपन्देहीका १ जना रहेका छन् । उनीहरु संक्रमण पुष्टि भएपछि गत जेठ ११ गते बुटवल–१० स्थित आइसोलेसन सेन्टरमा भर्ना हुन आएका थिए । त्यसरी भर्ना भएकामध्ये ७ जना भारतबाट आएका थिए । उनीहरुमध्ये दुई जनालाई सामान्य ज्वरो देखिए पनि अरु कसैमा पनि कुनै लक्षण नदेखिएको आइसोलेसनमा खटिएका बुटवलका स्वास्थ्यकर्मीले बताए । २ जना भने घरमै रहेका बेला संक्रमित भएको भन्दै बुटवलमा आएका थिए ।

कपिवलस्तुका एक जना वडाध्यक्ष र आठ वर्षीया बालिका पनि कोरोनामुक्त हुँदै डिस्चार्ज भएका हुन् । उनीहरु बाहेक अरु सबै जना भारतबाट आएका हुन् । अब आइसोलेसनमा ३२ जना छन् । उनीहरुमध्ये केहीको दोस्रो चरणको परीक्षणमा पनि संक्रमण देखिएपछि अब फेरि अवधि पूरा भएपछि स्वाब संकलन गरेर परीक्षण गरिने छ । आइतबार बेलुका वा सोमबार बिहान स्वाब संकलन गरेर पठाउने गरी तयारी भइरहेको बुटवलका स्वास्थ्य शाखाका प्रमुख कुन्दनकुमार सिंहले जानकारी दिए ।

आइसोलेसन सेन्टरमा रहेकालाई नियमित स्वास्थ्य चेक गर्नुका साथै नियमित रुपमा योगा गुरुमार्फत योगा अभ्यास, ध्यान, नृत्य गराउनुका साथै सात्विक भोजन सेवन गराइएको आइसोलेसन सेन्टरको रेखदेखमा खटिएका बुटवलका जनस्वास्थ्य अधिकृत मोहन मिश्रले बताए ।

प्रकाशित : जेष्ठ २५, २०७७ १४:३६
पूरा पढ्नुहोस्
प्रतिक्रिया
पठाउनुहोस्
×