बाँदरमुढे घटनाको १५ वर्ष : घटनास्थलमा भेला भएर पीडित र घाइतेले दिए श्रद्धाञ्जली

रमेशकुमार पौडेल

चितवन — तत्कालिन माओवादीले सञ्चालन गरेको सशस्त्र संघर्षका बेला माडी बाँदरमुढे खोलामा भएको बम विस्फोटको घटनाको १५ वर्ष पूरा भएको छ । यात्रुले खचाखच भएको बसलाई लक्षित गरी माओवादीले गराएको विस्फोटमा परेर २०६२ सालको जेठ २३ गते बिहान आठ बजेतिर घटनास्थलमै स–साना बालबालिकासमेत गरेर ३८ जनाको ज्यान गएको थियो । ७२ जना घाइते भएका थिए ।

लकडाउनको अफ्ठ्यारो र कोरोना भाइरसको त्रास भए पनि उक्त घटनाको सम्झनामा शुक्रबार बाँदरमुढे खोलामा बनेको स्मारकमा घटनामा आफन्त गुमाएका र घाइते भएका माडीवासीहरु भेला भएर श्रद्धाञ्जली अर्पण गरेका छन् । ‘लकडाउनका कारण धेरै हैन १५/२० जना भेला भएर दियो र अगरबत्ती बाल्यौं, फूल चढाएर घटनाको स्मरण र मृतकप्रति श्रद्धाञ्जली प्रकट गर्‍यौं’ सो घटनामा घाइते भएका कृष्ण अधिकारीले भने ।

माडीकै बासिन्दा अधिकारी बाँदरमुढे घटना पिडित समितिका उपाध्यक्ष हुन् । घटना भएको लामो समय हुँदा पनि पिडितले न्याय नपाएको र अवस्था दयनीय भए पनि सरसहयोग नपाएको गुनासो उनले गर्दै आएका छन् । विष्फोट लगत्तै माओवादीका तत्कालिन अध्यक्ष पुष्पकमल दाहालले उक्त घटना ‘जनयुद्धकाल कै सबैभन्दा दुखद’ भएको प्रतिकृया दिँदै क्षमा मागेका थिए ।

अनुकुल समयमा माडीमै गएर पिडितसँग माफी माग्ने दाहालले उही बेलै वाचा गरेका थिए । तर अहिलेसम्म यो वाचा पूरा नभएको पिडितहरुको भनाइ रहँदै आएको छ । माडी चितवन क्षेत्र नम्बर तीन अन्तर्गत पर्दछ । सोही क्षेत्रबाट पुष्पकमल दाहाल प्रतिनिधि सभा सदस्यमा निर्वाचित पनि भएका छन् । तत्कालिन माओवादीका नेता ठाकुर ढकाल माडी नगरपालिकाको मेयर नै निर्वाचित भएका छन् ।

यी सबै हुँदा पनि आफूहरुको माग पूरा नभएको उपाध्यक्ष अधिकारीको भनाइ छ । प्रतिनिधि सभा सदस्यको उम्मेद्वार भएपछि मतदानअघि दाहालले घटनाबाट प्रभावित केही व्यक्तिहरुसँग तीन बुँदे सहमति गरेका थिए । जसमा मृतकका आश्रित परिवारका लागि काम गर्न सक्नेलाई रोजगार वा स्वरोजगार, नसक्नेका लागि जीवनवृत्ति र बालबालिकाका लागि पठन पाठनको व्यवस्था हुने उल्लेख छ ।

त्यसैगरी घाइतेका लागि उपचारको व्यवस्था, काम गर्न सक्नेलाई रोजगार वा स्वरोजगार तथा नसक्नेलाई जीवनवृत्ति दिने दाहाल र पिडितबीच सहमति भएको थियो । घटनास्थल बाँदरमुढेमा १० विघा क्षेत्रफलमा स्मारक, नमुना संग्राहालय र चिडियाघर निर्माण गरेर उत्कृष्ट पर्यटकीय गन्तव्य बनाउनेसम्मको सहमति दाहाल र पिडितहरुबीच भएको थियो ।

दाहालले पिडितसँग सहमति गर्दा संस्थागत रुपमा नभएर केही व्यक्तिहरुबीच गरेका थिए । तर सहमति कार्यन्वयनका लागि भनेर बनेको सहयोग समितिमा बाँदरमुढे घटना पिडित समितिका अध्यक्ष मुक्तिनाथ न्यौपाने पनि सामेल भएका थिए । दाहालसँग भएका कुनै पनि सहमति कार्यन्वयनमा नआएको अध्यक्ष न्यौपानेको भनाइ छ । घटनामा संलग्न व्यक्तिलाई कानुनी कारबाही हुनु पर्ने आफूहरुको अडान पनि कायमै रहेको उनले बताए ।

प्रकाशित : जेष्ठ २३, २०७७ १०:४६
प्रतिक्रिया
पठाउनुहोस्

पश्‍चिम नवलपरासीमा भएको छुट्टा-छुट्टै दुर्घटनामा २ जनाको मृत्यु

नवीन पौडेल

परासी — पश्चिम नवलपरासीको सुनवलमा शुक्रबार बिहान भएको सवारी दुर्घटनामा एक जनाको मृत्यु भएको छ भने दुई जना घाइते भएका छन् ।

पूर्व–पश्चिम राजमार्गअन्तर्गत सुनवल नगरपालिका–७ ज्यामिरेमा बुटवलतर्फ गइरहेको ना ७ ख ६९६३ नम्बरको बस र प्रदेश २–०३–००१ च ३१२ नम्बरको पिकअप एकापसमा ठक्कर खाँदो दुर्घटना भएको हो । जिल्ला प्रहरी कार्यालय पश्चिम नवलरासीका अनुसार दुर्घटनामा बसका सहचालक सुर्खेत वीरेन्द्रनगरका १७ वर्षीय विरेन्द्र रानाको मृत्यु भएको छ ।

दुर्घटनामा गम्भीर घाइते भएका रानाको उपचारका लागि परासी ल्याउँदै गर्दा बाटोमा नै मृत्यु भएको प्रहरीले जनाएको छ । दुर्घटनामा बसका चालक सुर्खेत वीरेन्द्रनगरका केशव श्रेष्ठ र पिकअपका चालक धुनुषा मिथिला–९ का कृष्णबहादुर बुढा घाइते भएका छन् । उनीहरुको पृथ्वीचन्द्र अस्पताल परासीमा उपचार भईहेको प्रहरीले जनाएको छ ।

यसैगरी बिहीबार साँझ पश्चिम नवलपरासीको पाल्हीनन्दन–३ परसियामा मोटरसाइकलको ठक्करबाट एक जनाको मृत्यु भएको छ । प्रहरीका अनुसार महेशपुर–परासी सडकखण्डको परसिया चोकमा पैदल हिँडिरहेका स्थानीय नाथुप्रसाद गुप्तालाई मोटरसाइकलले ठक्कर दिएको थियो । ठक्करबाट टाउकोमा गम्भीर चोट लागेका गुप्ताको घटनास्थलमै मृत्यु भएको प्रहरीले जनाएको छ । मोटरसाइकल चालक भने फरार रहेका छन् ।

प्रकाशित : जेष्ठ २३, २०७७ १०:४५
पूरा पढ्नुहोस्
प्रतिक्रिया
पठाउनुहोस्
×