बाँके दुर्घटना : १२ शव परिवारलाई बुझाइयो, ६ डिस्चार्ज

ठाकुरसिंह थारु

नेपालगन्ज — बाँकेको राप्ती सोनारी गाउँपालिका २ ठुरीया जंगलमा आइतबार मध्यरातमा भएको गाडी दुर्घटनामा ज्यान गुमाएका १२ जनाको शव परिवारको जिम्मा लगाइएको छ । बुधबार ४ र मंगलबार ८ जनाको सनाखत गरी शव बुझाइएको हो । शव भेरी अस्पताल नेपालगन्जको शवगृहमा पोस्टमार्टम गरिएको छ । 

दुर्घटनामा चालक दानबहादुर खड्का, सहचालक पवन भण्डारी, दाङका भिमप्रकाश कामी, नरबहादुर विक, रामकुमार पुन, पूर्णबहादुर पुन, सीता पुन र हिमाँशु पुनको मृत्यु भएको थियो । त्यस्तै सल्यान सिद्दकुमाकका निमबहादुर वली, रोल्पा परिवर्तन १ का बुद्धिराम विक, रोल्पाका देबवीर कामी, सुर्खेतका रितेश कार्की रहेका छन् ।

जिल्ला प्रहरी कार्यालय बाँकेका मुद्दा फाँटका प्रमुख प्रहरी निरीक्षक हृदेश सापकोटाका अनुसार घाइतेमध्ये ६ जना डिस्चार्ज भएर घर फर्किएका छन् । भारतबाट घर फर्किएका उनीहरु चढेको बा ५ ख ५९९५ नम्बरका हायस आइतबार राति मध्यरातमा राप्ती सोनारी गाउँपालिका २ ठुरीया जंगलमा बिग्रिएर रोकिएको बा ४ ख ९०६४ नम्बरको ट्रकमा पछाडिबाट जुधेर दुर्घटना भई क्षतबिक्षत भएको थियो । दुर्घटनामा १२ को मृत्यु र २१ जना घाइते भएका थिए ।

चालकले मदिरा सेवन गरी तीव्र गतिमा गाडी चलाउँदा दुर्घटना भएको प्रहरीले जनाएको छ ।

प्रकाशित : जेष्ठ २१, २०७७ १९:०६
प्रतिक्रिया
पठाउनुहोस्

प्रहरी चौकी आक्रमणको आरोपमा वडाध्यक्ष पक्राउ

हरि गौतम

रुकुम पश्चिम — प्रहरी चौकी तोडफोडमा संलग्न वडाध्यक्षसहित ३ जना पक्राउ परेका छन् । मुसीकोट नगरपालिका–१३ का वडाध्यक्ष दिपक केसीसहित राजन केसी र खिलराज गिरीलाई प्रहरीले पक्राउ गरेको हो । 

मंगलबार राति वडाध्यक्ष केसीसहितको समूहले मुसीकोट नगरपालिका–१४, छिवाङज्युलामा रहेको अस्थायी प्रहरी चौकी तोडफोड गरेका थिए । घटनापछि वडाध्यक्ष केसी फरार थिए । घटनामा संलग्न ६ जनाको खोजी भइरहेको जिल्ला प्रहरी प्रमुख डीएसपी ठगबहादुर केसीले बताए ।

उनका अनुसार अभद्र व्यवहार गरेको आरोपमा थप अनुसन्धानका लागि जिल्ला प्रशासन कार्यालयबाट बुधबार १० दिनको म्याद थप गरिएको छ ।

प्रमुख जिल्ला अधिकारी उपेन्द्रराज पौड्यालले वडाध्यक्षसहित ३ जनाविरुद्ध म्याद थप गरिएको र अन्यको खोजी तीव्र पारिएको बताए । उनका अनुसार तोडफोडका क्रममा जाँच गर्ने पोष्ट, चौकीमा रहेका फर्निचरलगायत सामग्रीमा क्षति पुगेको छ ।

प्रकाशित : जेष्ठ २१, २०७७ १८:५४
पूरा पढ्नुहोस्
प्रतिक्रिया
पठाउनुहोस्
×