पटनामा १४ वर्षीया नेपाली बालिका बलात्कृत

सुरेशराज न्यौपाने

नयाँदिल्ली — भारतको बिहार राज्यको राजधानी पटनामा एक १४ वर्षीय नेपाली बालिका बलात्कृत भएकी छिन् । पीडित बालिका ६ महिनाअघि मात्र पटना आएकी थिइन् ।

उनी दिदी र भिनाजुसँगै पटनाको राजीव नगरको शान्तिपुरम कोलोनीमा बस्दै आएकी थिइन् । उनी छिमेकीको घरमा सरसफाइको काम गर्थिन् ।

सँधैजसो सोमबार साँझ करिब पाँच बजे उनी नजिककैको एउटा अपार्टमेन्टमा काम गरेर कोठा फर्कदैंथिइन् । त्यति नै बेला कोठामा पुग्नुभन्दा केही वरको एउटा सुनसान गल्लीमा ढुकेर बसेका आरोपितमध्येका एक रोशन कुमारले जबर्जस्ती मोटरसाइकलमा राखेर नजिकैको बन्दै गरेको घरमा लगेको र अन्य पाँच जनासँग मिलेर बलात्कार गरेको प्रहरीको अनुसन्धानमा खुलेको छ ।

पीडित बालिकाले प्रहरीलाई दिएको बयानका अनुसार रोशनलगायतका आरोपित केटाहरुले उनलाई केही दिन पहिलेदेखिनै पछ्याइरहेका थिए । ‘ती केटाहरुले बालिकालाई केही दिन पहिलेदेखि नै पछ्याइरहेको देखिन्छ सोमबार त्यस्तै मौका पारेर जबर्जस्ती लगेको लगेर सबैले मिलेर बलात्कार गरे,’ पटनाको गर्दानीबाग महिला प्रहरी थानाकी प्रमुख आरतीकुमारी जैसवालले कान्तिपुरसँग बताइन् ।

घटनालगत्तै पीडित बालिकाले रोइकराई गरेको सुनेपछि स्थानीयले प्रहरीलाई खबर गरेका थिए । त्यसपछि पीडित बालिकाको बयानकै आधारमा तत्कालै रोशनसहित मन्टु कुमार, विकास कुमार, अंशुलाई पक्राउ गरेको थियो । प्रहरीका अनुसार बलात्कारमा संलग्न अन्य दुई जना भने फरार छन् । आरोपितहरु १८ देखि २० वर्षका रहेको र सबैजना राजीवनगर क्षेत्रकै सुकुम्बासी बस्तीमा बस्दै आएको जैसवालले जानकारी दिइन् ।

प्रकाशित : जेष्ठ २१, २०७७ १३:०८
प्रतिक्रिया
पठाउनुहोस्

बुटवल कोरोना अस्पतालमा स्वास्थ्यकर्मीसहित ४ जना संक्रमित निको भए

सन्जु पौडेल

तिलोत्तमा, रुपन्देही — रुपन्देहीको बुटवलस्थित कोरोना विशेष अस्पतालबाट बुधबार थप ४ जना संक्रमित निको भएर घर फर्किएका छन् । निको हुनेहरुमा ३ जना कपिलवस्तुका र १ जना अर्घाखाँची घर भई कोरोना विशेष अस्पताल बुटवलमा कार्यरत स्वास्थ्यकर्मी रहेका छन् ।

वैशाख २९ गते अस्पताल भर्ना भएका संक्रमितको लगातार दुई पटकको रिपोर्ट नेगेटिभ आएपछि डिस्चार्ज गरिएको बुटवल धागो कारखानास्थित कोरोना विशेष अस्पतालका फोकल पसर्न तथा वरिष्ठ कन्सलटेन्ट डा. सुदर्शन थापाले बताए ।

'१८ देखि २४ वर्षसम्मका पुरुष घर फर्किनुभयो,' उनले भने, 'उहाँहरुसहित गरी अहिलेसम्म १९ जनालाई निको बनाई घर पठायौं ।' बिरामीलाई निको भएर पठाउँदा खुसी लागेको र आत्मबल बलियो राख्ने र अपनाउनुपर्ने नियममा ख्याल गरे कोरोनालाई जितिने थापाले जनाए ।

यसअघि वैशाख ३० गते रुपन्देहीका १ , जेठ १० गते कपिलवस्तुका १० र जेठ १८ गते कपिलवस्तुका ३ र रुपन्देहीका १ गरी १५ जना घर फर्केका थिए । अस्पतालमा अहिले ३० जना जनरल वार्ड र ३ जना आईसीयूमा उपचाररत रहेको थापाले बताए ।

प्रकाशित : जेष्ठ २१, २०७७ १३:०१
पूरा पढ्नुहोस्
प्रतिक्रिया
पठाउनुहोस्
×