भरतपुर क्यान्सर अस्पतालमा बिरामी र कुरुवाको कन्तबिजोग [तस्बिरहरु]

रमेशकुमार पौडेल

चितवन — भरतपुरमा रहेको बीपी कोइराला मेमोरियल क्यान्सर अस्पताल क्यान्सर रोगको उपचार हुने देशकै मुख्य अस्पताल हो । देशभरका बिरामी उपचारका लागि आउने यो अस्पतालमा अहिले फरक खालको अस्तव्यस्त रुप देखिन्छ । कोरोना भाइरसको संक्रमण बढ्दै जाँदा देशभर लकडाउन भयो । यसको असर क्यान्सर रोगीको उपचारमा परेको छ । जनतन अस्पताल आएका बिरामी र कुरुवाको बिजोग भएको छ ।

अस्पताल आइपुगेका बिरामीहरु उपचारका विषयमा खासै गुनासो गर्दैनन् । तर खान र बस्न भने उनीहरुलाई सकस परेको छ । लकडाउनका कारण नारायणगढ–भरतपुर क्षेत्रका सबै होटल लज बन्द छन् । त्यसैले आएका बिरामी र उनीहरुका कुरुवा अस्पताल हाताभित्र खाना बनाएर खान्छन् । चौरमै सुत्छन् । पानी आए अस्पतालको भवनभित्र कोचाकोच गर्न जाने बाध्यता उनीहरुलाई छ ।

महोतरी जलेश्वर–७ का ६८ वर्षीय रामआशिष यादवलाई उनका छोराहरुले जनकपुर लगायतका अस्पतालमा पुर्‍याए । पेटमा समस्या देखिएका उनलाई के भएको हो त्यहाँका अस्पतालले पत्ता लगाउन सकेनन् । रोग जटिल हुँदै गयो । भरतपुर लैजान सबैले सल्लाह दिएपछि विनोद यादवले रामआशिषलाई आइतबार यहाँ ल्याए । साथमा एकजना अर्का भाइ पनि छन् । रामआशिषको परीक्षण जारी छ । मंगलबार साँझ ६ बज्दै गर्दा विनोद खाना बनाउन व्यस्त थिए । क्यान्सर अस्पतालको प्रशासन भवनको पछाडि र नयाँ भवनको अगाडि खाली जमिन छ । उनले त्यही खुला चौरमा सानो खाले ग्याँस स्टोभ बालेर खाना पकाउँदै थिए । रामआशिष चुलोभन्दा १० हात पर बसेर टाउकोमा हात राखी त्यहाँको माहोल नियालीरहेका थिए । उनको अनुहारमा पिडा र दिक्दारी झल्कन्थ्यो ।

त्यो चौरमा रामआशिषका लागि मात्रै नभएर अन्य सयौंका लागि खाना पाक्दै थियो । साना खाले दर्जनौं ग्याँस स्टोभको भर्ररर आवाज र मान्छेको होहल्ला चर्कै थियो । पहिला उपचारका लागि आएका मान्छेहरु भर्ना नहुँदासम्म होटलमा बस्थे । अहिले होटल सबै बन्द छन् । त्यसैले चौरमै खाना पकाउने र चौरमै सुत्ने बाध्यतामा उनीहरु पुगेका छन् । क्यान्सर अस्पताल अगाडि १४० होटल छन् ।

त्यहीँको होटल दिप एन्ड सन्सका सञ्चालक तथा होटल तथा रेष्टुरेन्ट व्यवसायी संघ चितवनका अध्यक्ष दिपक ढकालका अनुसार क्यान्सर क्षेत्रका सबै होटल चैत्र १५ गतेदेखि ठप्प छन् । यहाँका होटलमा १५ सयजना अटाउँछन् । प्रायजसो ८० प्रतिशत कोठा सधै भरीभराउ हुन्छन् । तर पछिल्लो समय लकडाउन र कोरोना रोगको त्रासले होटल खुल्न सकेका छैनन् । त्यही भएर अस्पताल आउनेहरुको बिजोग भएको उनले बताए ।

अस्पतालका उपकार्यकारी निर्देशक डा.कृष्णसागर शर्मा अझै पनि १६० जना अस्पतालमा उपचारका लागि भर्ना भएको बताउँछन् । उपचार सकिएर घर जानु पर्नेहरु जान पाएका छैनन् । २०/२१ दिनपछि फेरि अस्पतालमै आउनु पर्दछ । फेरि आउँदा जाँदा खर्च धेरै लाग्छ । त्यसैले मान्छेहरु फर्कन खोजेका छैनन् । कष्ट सहेरै चौरमा दिनरात गुजारेका छन् ।

यो समस्याको व्यवस्थापनका लागि छलफलहरु चलेको उपकार्यकारी निर्देशक डा.कृष्णसागर शर्माले जानकारी दिए । होटल तथा रेष्टुरेन्ट व्यवसायी संघका चितवन अध्यक्ष दिपक ढकाल पनि जिल्ला प्रशासनमा छलफल गरेर सुरक्षित तरिकाले होटल चलाउने जमर्को भइरहेको बताउँछन् । क्यान्सरका बिरामी कोरोनाको जोखिममा पनि हुन्छन् । अहिले अस्तव्यस्त रुपमा भीडभाडमै उनीहरु बसेका कारण जोखिम पनि बढेको छ ।


प्रकाशित : जेष्ठ २१, २०७७ १२:५५
प्रतिक्रिया
पठाउनुहोस्

पर्साका थप ७ जनामा कोरोना संक्रमण

भूषण यादव

वीरगन्ज — भारतबाट फर्किएका पर्साका तीन गाउँपालिकाका ७ जनामा कोरोना संक्रमण पुष्टि भएको छ ।कालिकामाई गाउँपालिकाका ४ जना, सखुवाप्रसौनी गाउँपालिकाका २ जना र विन्दवासनी गाउँपालिकाका एक जना गरी सात जनामा कोरोना संक्रमण पुष्टि भएको नारायणी अस्पतालका प्रमुख मेडिकल सुपरिटेन्डेन्ट डा.मदनकुमार उपाध्यायले बताए ।

नारायणी अस्पतालको पीसीआर मेसिनमा गरिएको स्वाब परीक्षणमा मंगलबार साँझ एक जना र बुधबार विहान ६ जनाको रिपोर्ट पोजिटिभ आएको डा.उपाध्यायले बताए । गत जेठ १४ मा भारतबाट फर्किएका उनीहरुलाई सम्बन्धित गाउँपालिकाको क्वारेन्टाइनमा राखिएको थियो ।

कालिकामाई गाउँपालिकाका स्वास्थ्य प्रमुख योगेन्द्र चौरसियाका अनुसार संक्रमित हुनेमा कालिकामाई २ भेडियारी निवासी ३० वर्षीय र ४५ वर्षीय पुरुष, वडा एक तीनडोबियाका एक ३० वर्षीय र एकजना वडा ५ विरन्चीबारवाका १६ वर्षीय युवक रहेका छन् । ‘८ दिन अगाडि भारतबाट फर्किएका उनीहरुलाई कालिकामाई गाउँपालिकाको हरिहरपुर विर्तामा रहेको क्वारेन्टाइनमा राखिएको थियो,’ उनले भने, ‘गत आइतबार २१ जनाको थ्रोट स्वाब संकलन गरिएको थियो, जसमध्ये चारजनामा कोरोना संक्रमण पुष्टि भएको जानकारी आएको छ ।’

सखुवाप्रसौनी गाउँपालिकाका स्वास्थ्य प्रमुख राजेश रौनियारले गत जेठ १४ मा भारतको लुधियाना र बनारसबाट फर्किएका दुई जनामा कोरोना संक्रमण भएको बताए । ‘सखुवाप्रसौनी गाउँपालिका–२ गुलरिया टोलका ४९ वर्षीय र जमुनियाका २५ वर्षीय पुरुषमा कोरोना संक्रमण पुष्टि भएको हो,’ उनले भने, ‘गत सोमबार देउरवानाको क्वारेन्टाइनमा रहेका २४ जनाको स्वाब संकलन गरिएको थियो, जसमध्ये दुई जनामा पोजेटिभ आएको हो ।’

यसैगरी मंगलबार साँझ विन्दवासनी गाउँपालिकाको झौवास्थित क्वारेन्टाइनमा रहेका ३४ वर्षीय पुरुषमा कोरोना संक्रमण पुष्टि भएको थियो ।

प्रकाशित : जेष्ठ २१, २०७७ १२:२०
पूरा पढ्नुहोस्
प्रतिक्रिया
पठाउनुहोस्
×