सेती अस्पतालको आइसोलेसनमा एक जनाको मृत्यु 

सेती प्रादेशिक अस्पतालका सूचना अधिकारी दिलिपकुमार श्रेष्ठका अनुसार सीमा नाकामा बेहोस अवस्थामा उद्धार गरिएका उनलाई सेती अस्पतालको आइसोलेसन कक्षमा भर्ना गरिएको थियो । ‘बेहोस अवस्थामै अस्पताल पुर्‍याइएका उनलाई सुरुमा इमर्जेन्सी वार्डमा भर्ना लिइएको थियो,’ उनले भने, ‘उनमा मृगीको समस्या देखिएको जस्तो थियो । भारतबाट फर्किएको भएकाले मात्रै कोरोनाको आशंकामा आइसोलेसनमा भर्ना गरिएको हो ।’

ती व्यक्ति भारतको महाराष्ट्रबाट गौरीफन्टा नाकासम्म बसमा चढेर आएको बताइएको छ । बसबाट उत्रिँदै गर्दा सिमानामा बेहोस भएर ढलेपछि सीमामा रहेको नेपाली एम्बुलेन्समा राखेर अस्पताल पुऱ्याइएको थियो ।

सूचना अधिकारी श्रेष्ठले मृतकको कोरोना परीक्षणका लागि थ्रोट स्वाब पनि लिएको बताए । उनले भने, ‘यसअघि इमर्जेन्सी वार्डमा गरिएको आरडीटी परीक्षणमा एन्टिबडी नेगिटेभ देखिएको छ । पीसीआरको रिपोर्ट आउन बाँकी छ ।’