स्वास्थ्य मन्त्रालयको कोरोना संक्रमित विवरणमा त्रुटि नै त्रुटि- समाचार - कान्तिपुर समाचार
कान्तिपुर वेबसाईट
AdvertisementAdvertisement

स्वास्थ्य मन्त्रालयको कोरोना संक्रमित विवरणमा त्रुटि नै त्रुटि

मन्त्रालयले उल्लेख गरेको पालिका र वार्ड नम्बर समेत फरक पर्दा प्रहरी र स्थानीय बासिन्दा अन्योलमा परेका छन् ।
लक्ष्मी साह

बारा — कोरोना संक्रमितको आधिकारिक विवरण सार्वननिक गर्दै आएको स्वास्थ्य तथा जनसंख्या मन्त्रालयले संक्रमितहरुको ठेगाना उल्लेख गर्दा त्रुटि गरिरहेको पाइएको छ । विभिन्न प्रयोगशालामा स्वाब परीक्षण भएका रिपोर्ट सार्वजनिक गर्ने क्रममा बाराका संक्रमितको ठेगाना मन्त्रालयले फरक-फरक प्रवाह गरेको हो । यस्तो त्रुटिले स्थानीय प्रशासन र प्रहरी, सञ्चारकर्मी, जनप्रतिनिधि लगायतमा अन्योल भइरहेको छ ।

स्वाब संकलनको रिपोर्टसमेत ढिला गरी सार्वजनिक गरिँदा सरोकारवालामा अन्योल पैदा गरेको छ । सोमबारमात्र मन्त्रालयले जारी गरेको दुई वटा प्रेस विज्ञप्तिमा संक्रमितको ठेगाना फरक उल्लेख गरिएको छ । यस्तो विवरण तत्कालै सामाजिक सञ्जालमा पोस्ट हुँदा झनै समस्या भइरहेको सरोकारवालाहरु बताउँछन् ।

राष्ट्रिय जनस्वास्थ्य प्रयोगशाला काठमाडौंबाट परीक्षण भई कोरोना पोजेटिभ रिपोर्टबारे मन्त्रालयले सोमबार जारी गरेको विज्ञप्तिमा बाराको कलैया नगरपालिका र कोटवाली–१ का २५ र ३२ वर्षीय संक्रमित भएको उल्लेख छ । तर यो ठेगाना बारामा कतै छैन । ‘मन्त्रालयले उल्लेख गरेको ठाउँ बारामा कतै छैन, सम्बन्धित ठाउँमा प्रहरी परिचालन गरेर बुझ्दासमेत हैरानी खेप्नुपरिरहेको छ,’ जिल्ला प्रहरी कार्यालयका प्रवक्ता डीएसपी गौतम मिश्रले भने, ‘रिपोर्ट सार्वजनिक भएलगत्तै ती ठाउँबारे पत्ता लगाउने प्रयास गर्‍यौं तर भेटिएन ।’

कोतवाली भन्ने ठाउँ रहे पनि त्यो आदर्शकोतवाल गाउँपालिकाअन्तर्गत पर्छ । उल्लेख गरिएको वडामा संक्रमित नै नरहेको उनले बताए । यसैगरी मन्त्रालयको विवरणमा बारा गढीमाई नगरपालिकाकामा २१ जना संक्रमित भनेर उल्लेख गरिएको छ । तर जिल्लामा गढीमाई नभएर महागढीमाई नगरपालिका रहेको छ । गढीमाई रौतहटमा पर्छ ।

‘मन्त्रालयको विवरणले हामी अन्योलमा पर्‍यौं,' महागढीमाई नगरपालिकाका निमित्त प्रशासकीय अधिकृत विजय कुसवाहाले भने, ‘पछि प्रयोगशालामा फोन गरेर परीक्षणका लागि स्वाब दिएका व्यक्तिहरुको नाम भिडाउँदा बाराको हाम्रै महागढीमाई नगरपालिका रहेछ । केहीबेर सबैमा तनाव भयो, ‘भेरीफाई’पछि मात्रै अन्योल हट्यो ।’

यस्तै, मन्त्रालयले सोमबार नै विज्ञप्ति जारी गरी कोरोना संक्रमणले मृत्यु भएका बाराका ७० वर्षीय वृद्धको ठेगानामा कलैया–७ उल्लेख गरेको छ । तर मृतकको वास्तविक ठेगाना त्यो होइन । मृतकको वास्तविक ठेगाना बाराको करैयामाई गाउँपालिका–७ उम्जन हो । जसलाई प्रहरीले सोमबार सिल गरिसकेको छ ।

गत जेठ २ गते नै परीक्षणका लागि उनको स्वाब लिइएको थियो । उनको मृत्यु भएको ८ दिनपछि रिपोर्ट सार्वजनिक भएको हो । गत जेठ ४ गते वीरगन्जको नेसनल मेडिकल कलेजमा उनको मृत्यु भएको थियो ।

मन्त्रालयको विज्ञप्ति


प्रकाशित : जेष्ठ १२, २०७७ १८:३९
प्रतिक्रिया
पठाउनुहोस्

बारामा प्रहरी निरीक्षकसहित २४ जनालाई कोरोना संक्रमण

लक्ष्मी साह

बारा — बारामा सोमबार एकैदिन इन्सपेक्टर (प्रहरी निरीक्षक)सहित २४ जनालाई कोरोना संक्रमण देखिएको छ ।

जिल्ला प्रहरी कार्यालय बारामा कार्यरत एक प्रहरी निरीक्षक,प्रहरी जवान र मुद्दा फाँटमा कार्यरत एक प्रहरी जवानलाई कोरोना संक्रमण देखिएको कार्यालयका प्रवक्ता प्रहरी नायब उपरीक्षक गौतम मिश्रले बताए ।

संक्रमित ती प्रहरी निरीक्षकको कलैया अस्पतालमा गत जेठ ७ मा स्बाब संकलन भएको थियो । नारायणी अस्पतालमा परीक्षणमा शंकास्पद देखिएपछि थप परीक्षणका लागि टेकु अस्पताल पठाइएको थियो । जवानको भने वैशाख ३१ मा कलैया अस्पतालमा स्वाब संकलन भएको थियो ।

सोमबारै स्वास्थ्य मन्त्रालयले बाराकै थप एक जना ३२ वर्षीयमा संक्रमण देखिएको जनाएको थियो । ती संक्रमितको ठेगाना स्पष्ट हुन नसकेको डीएसपी मिश्रले बताए ।

यसैगरी चार दिन अघि महागढीमाई नगरपालिकाको बबुआइन विद्यालयको क्‍वारेन्टाइनमा रहेका ४२ मध्ये ३० जनाको स्वाब परीक्षण गर्दा २१ जनाको रिपोर्ट पोजिटिभ देखिएको छ । १८ वर्षदेखि ५० वर्ष उमेरका ती सबै संक्रमित एक साता अघि भारतको विभिन्न ठाउँबाट आएका हुन् ।

‘सबैलाई सीमाबाटै एम्बुलेन्समा ल्याएर सिधैं क्‍वारेन्टाइनमा पुर्याइएको थियो,’ महागढीमाई नगरपालिकाका निमित्त प्रमुख प्रशासकीय अधिकृत वीजय कुसवाहाले भने, ‘सबै जनाको हेटौंडास्थित कीटजन्य अनुसन्धान तथा प्रयोगशालामा परिक्षण भएको थियो ।’

जिल्लामा एक प्रहरी निरीक्षक, एक प्रहरी नायब निरीक्षक, हवल्दार र जवान गरी ७ जना प्रहरी, एक जना रेडियोकर्मी र सर्वसाधारण गरी ४० जना संक्रमित भइसकेका छन् । जसमध्ये २ जना संक्रमित नारायणी अस्पताल वीरगन्जबाट निको भएर घर फर्किसकेका छन् ।

प्रकाशित : जेष्ठ १२, २०७७ १६:१९
पूरा पढ्नुहोस्
प्रतिक्रिया
पठाउनुहोस्
×