आर्थिक अनियमितता गरेको आरोपमा जर्नेल र कर्नेल सैनिक हिरासतमा

जगदीश्वर पाण्डे

काठमाडौँ — आर्थिक अनियमितता गरेको अरोपमा नेपाली सेनाका एक जर्नेल र एक कर्नेललाई सैनिक हिरासतमा राखिएको छ । सैनिक उच्च स्रोतका अनुसार सैनिक कल्याणकारी निर्देशनालयका प्रमुख सहायक रथी प्रयोगजंग राणा र सोही निर्देशनालयका महासेनानी नवीन सिलवाललाई छानबिनको लागि सैनिक हिरासतमा राखिएको हो ।

उनीहरु दुवैलाई जेठ ८ गते देखि सुन्धरास्थित राष्ट्रिय सेवा दलस्थित कार्यालय परिसरमा हिरासतमा राखिएको छ ।

‘प्रमाण नष्ट नहोस् र छानबिनमा सहज होस् भनेर उनीहरुलाई सैनिक हिरासतमा राखिएको हो,’ सैनिक स्रोतले भन्यो ।

राणा र सिलवालले दुई वर्ष अघि वीरेन्द्र शान्ति तालिम केन्द्र (संयुक्त राष्ट्र संघको शान्ति स्थापनार्थ जानुअघि प्रशिक्षण गर्ने स्थान) काभ्रेको पाँचखालमा अनियमितता गरेको अरोप लागेको हो । त्यस बेला महासेनानी रहेका राणा तालिम केन्द्रका प्रमुख थिए भने सिलवाल उनको मातहतमा काम गर्थे ।

सेनाले आर्थिक अनियमितता भएको संकेत पाएपछि सैनिक ऐन–२०६३ अनुसार उपरथीको नेतृत्वमा कोर्ट अफ् इन्क्वायरी गठन गरी छानबिन भइरहेको छ । उनीहरुको छानबिन अन्तिम चरणमा पुगेको र केही दिनमा सैनिक समरी अदालतले फैसला गर्ने सैनिक स्रोतले बतायो ।

उक्त आर्थिक अनियमितताको छानबिनका क्रममा कोर्ट अफ् इन्क्वायरी १२ जना अधिकृतसँग पनि बयान लिएको छ । एक जना सुवेदार मेजरलाई पनि थुनामा राखिएको छ ।

सेनाले शुक्रबारमात्र सैनिकले भक्तपुरस्थित सैनिक आवासीय महाविद्यालयमा आर्थिक अनियमितता गरेको ठहर भएपछि महासेनानी भुपालमान अधिकारीसहित तीन सैनिक अधिकृत र दुई अन्य दर्जालाई कारबाही गरेको थियो । जसमा महासेनानी भुपालमान अधिकारीसँग बिगो रकम एक करोड ८५ लाख ४० हजार एक सय आठ रुपैयाँ ११ पैसा असुल उपर गर्ने फैसला गरेको थियो ।

प्रकाशित : जेष्ठ १०, २०७७ १२:१८
ADVERTISEMENT
प्रतिक्रिया
पठाउनुहोस्
ADVERTISEMENT

आफ्‍नाले छाडेपछि सडकमा

दुर्गालाल केसी

दाङ — पाखुरामा तागत हुँदासम्म उनले मजदुरी गरेर जीविका चलाए । त्यसपछि रिक्सा चलाएर पनि परिवार पाले । उमेर बित्दै गएपछि शरीरको जोश जाँगर मर्दै गयो । काम गरी खाने जोश सकिएपछि आफ्नो भन्ने केही भएन ।

घोराही उपमहानगरपालिका–१४ बसपार्क नजिक सरकारी खाली जग्गामा उनी झुप्रो बनाएर बसेका थिए । छोरी विवाह गरेर गइन् । छोरा पनि कता गए, सम्पर्कमै आएनन् । श्रीमतीको पनि गत वर्ष निधन भयो । त्यसपछि उनी एक्ला भए । भएको सानो झुप्रोमा साथ दिने कोही नभएपछि उनी मागी खान थाले । माग्दै खाँदै गर्दा पनि शरीर कमजोर भयो । कमजोर भएका कारण उनलाई बजारभरि घुमेर मागिसकेपछि बास बस्ने ठाउँसम्म पुग्न कठिन हुन थाल्यो ।

लकडाउन भएपछि उनलाई मागेर खान पनि समस्या भयो । खानेकुरा खोज्दै हिँड्ने क्रममा उनी केही दिनअघि सडकमा लडेर घाइते भए । त्यसपछि उनी हिँड्न पनि नसक्ने भए । शुक्रबारदेखि उनी घोराही उपमहानगरपालिका–१५ भृकृटीनगर टोलमा सडकमा अलपत्र परेका छन् । अशक्त अवस्थामा भएकाले उठ्न सकिरहेका छैनन् । राम्रोसँग बोल्न पनि सक्दैनन् । स्थानीयले दिएका खानेकुरा पनि खान सकेका छैनन् ।

अन्दाजी ७० वर्षीय उनले नाम पवलसिं विक रहेको बताएका छन् । घोराही उपमहानगरलाई सडक मानवमुक्त घोषणा गरिएकाले यस्ता अलपत्र मानिसको उद्धार गर्न स्थानीयले जनप्रतिनिधि र प्रहरीलाई पटकपटक खबर गर्दा पनि कुनै वास्ता नगरिएको स्थानीय युवा विवेक न्यौपानेले बताए । ‘सबै जनप्रतिनिधि र प्रहरी आउने, हेर्ने र जाने गरेका छन् । उद्धारको पहल गर्छौं भनेको दुई दिन भइसक्यो । ती वृद्ध अहिले पनि त्यही अवस्थामा सडकमै छन्,’ उनले भने, ‘खानेकुरा दिँदा पनि खान सकेका छैनन् । अशक्त भएकाले उठ्न, हिँड्न सकेका छैनन् । हामी सबैलाई अनुरोध गर्दा गर्दा थाकिसक्यौं । कसैले केही गर्दैन ।’

कोरोना संक्रमणको जोखिम भएका कारण पनि कसैले बास दिने स्थिति छैन । सबैले स्थानीय सरकार र प्रहरीलाई उद्धारका लागि गुहार मागिरहेका छन् । घोराही–१४ का अध्यक्ष शक्तिराम डाँगी र १५ का अध्यक्ष रमेशकुमार पाण्डेका साथै प्रहरी आएर हेर्ने र फर्कने मात्रै गरेको न्यौपानेले बताए । उनीहरुले उद्धारको पहल गर्छौं भने पनि अहिलेसम्म केही नभएको उनले बताए ।

अलपत्र वृद्धबारे बुझेर वडा कार्यालयमार्फत उद्धारको व्यवस्था गरिने घोराही उपमहानगरपालिकाका मेयर नरुलाल चौधरीले बताए । ‘ती वृद्धको अवस्थाबारे बुझेर उद्धारका लागि पहल गर्छौं,’ उनले भने, ‘कताबाट आएका हुन् । कुन अवस्थामा छन् । कोरोना परीक्षण गर्नुपर्ने पनि हुनसक्छ । हामी सबै बुझेर त्यहीअनुसार काम गर्छौं ।’ घोराही उपमहानगरले यसअघि सडकमा भएका सबै मानिसहरुको उद्धार गरी राप्ती गाउँपालिकाको सुनडबरीस्थित मानव सेवा आश्रममा राखेको थियो । सडकमा कोही मानिसहरु नभएको भन्दै गत फागुन १६ मा ‘सडक मानवमुक्त नगर’ घोषणा गरिएको थियो ।

प्रकाशित : जेष्ठ १०, २०७७ १२:०७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×