निजी विद्यालयले सहुलियत मागे- समाचार - कान्तिपुर समाचार

निजी विद्यालयले सहुलियत मागे

कान्तिपुर संवाददाता

काठमाडौँ — निजी विद्यालयले सरकारसँग सहुलियत मागेका छन् । प्याब्सन र नेशनल प्याब्सनले शुक्रबार विज्ञप्ति जारी गरेर निजी विद्यालयको नियमित खर्च धान्न बिना धितो न्यून ब्याजदरमा ऋण उपलब्ध गराउने व्यवस्था गर्न माग गरेका हुन् । 

शिक्षक, कर्मचारी तबलभत्ता, घरभाडा लगायत खर्चका लागि २ प्रतिशत व्याजमा कम्तिमा ३ वर्षका लागि ऋण आवश्यक रहेको नेशनल प्याब्सनका अध्यक्ष ऋतुराज सापकोटाले जनाए । प्याब्सन र एनप्याब्सनले यसअघि नै लकडाउनको अवधीमा विद्यार्थी अभिभावकसँग कुनै पनि शुल्क नलिन विद्यालयहरुलाई निर्देशन दिएका छन् ।

लकडाउन खुकुलो भएपनि विद्यालय सञ्चालनमा आउन समय लाग्‍ने उनीहरुले बताएका छन् । निजी विद्यालयले लिएको ऋणको ब्याजदरमा समेत सहुलियत दिन सरकारसँग आग्रह गरिएको छ । ‘बैंक ऋणको साँवा–ब्याज, घरभाडा, बिजुली– टेलिफोन बिल आदि तिर्न सक्ने क्षमता छैन,’ विज्ञप्तिमा भनिएको छ । विद्यालय बन्द भएको अवधिको विद्युत, टेलिफोन र इन्टरनेट महसुलमा समेत छुट गराउन माग गरिएको हो । इन्टरनेटमा छुट भए विद्यार्थीको छुटको पढाई पुरा गर्न सहज हुने निजी विद्यार्थीहरुको तर्क छ । प्याब्सन अध्यक्ष टिकाराम पुरी र एनप्याब्सन अध्यक्ष सापकोटाले संयुक्त विज्ञप्ति जारी गरेका हुन् ।

शिक्षाको करिब २० प्रतिशत हिस्सा निजी क्षेत्रका शिक्षण संस्थाले ओगटेका छन् । कोरोना महामारी पछि पनि यसलाई निरन्तरता दिन राहत प्याकेज आवश्यक रहेको पुरीले बताए । अर्थमन्त्री र शिक्षामन्त्रीलाई निजी विद्यालयहरुको समस्या राखेर आगामी बजेटमा सम्बोधन गर्न आग्रह गरिएको उनले जनाए ।

प्रकाशित : जेष्ठ ९, २०७७ १९:१८
प्रतिक्रिया
पठाउनुहोस्

पाँच जनाविरुद्ध भ्रष्टाचार मुद्दा

कान्तिपुर संवाददाता

काठमाडौँ — अख्तियार दुरुपयोग अनुसन्धान आयोगले शुक्रबार पाँच जनाविरुद्ध भ्रष्टाचार मुद्दा दायर गरेको छ । अख्तियारले तीन जना विरुद्ध मालपोतबाट राजस्व चुहावट, एक जनामाथि घूस र अर्का एक जनामाथि नक्कली प्रमाणपत्रका आधारमा बढुवा भएको आरोपमा भ्रष्टाचार मुद्दा दायर गरेको हो ।

अख्तियारले घरबाटोको गलत सिफारिस गरेको र त्यसकारणले राजस्व तथा पूँजीगत लाभकर नोक्सान भएको भन्दै वीरगन्ज महानगपालिकाको १६ नम्बर वडाका अध्यक्ष श्याम बाबुप्रसाद चौरसियासहित तीन जनाविरुद्ध मुद्दा दायर गरेको जनाएको छ । निर्णयका कारण १ लाख ७७ हजार रुपैयाँ राजस्व नोक्सान भएको अख्तियारको दाबी छ । अख्तियारले वडाध्यक्ष चौरसियासहित जग्गा बेच्ने जहराती मिया धुनिया र किन्ने ग्यान्तीदेवीविरुद्ध पनि मुद्दा चलाएको छ ।

अख्तियारले पुनर्निर्माण प्राधिकरणको जिल्ला आयोजना कार्यान्वयन इकाई कास्कीका सव इञ्जिनियर नवलेशकुमार रौनियारविरुद्ध ४० हजार ५ सय रुपैयाँ घूस आएको आरोपमा भ्रष्टाचार मुद्दा दायर गरेको छ । भूकम्पले घर भत्किएपछि नयाँ बनाएका भूकम्पपीडितलाई भुक्तानी दिएबापत उनले घूस मागेको आरोप छ । अख्तियारले उनलाई पक्राउसमेत गरेर मुद्दा चलाएको हो ।

अख्तियारले जिल्ला शिक्षा कार्यालय कैलालीमा विद्यालय निरीक्षकको रुपमा कार्यरत चक्रबहादुर कुँवरमाथि नक्कली प्रमाणपत्रका आधारमा बढुवा भएको आरोपमा मुद्दा दायर गरेको छ । अनुसन्धान हुँदा उनले प्रमाणपत्र तहको प्रमाणपत्र भारतबाट किनेर ल्याएको पुष्टि भएको अख्तियारको दाबी छ ।

प्रकाशित : जेष्ठ ९, २०७७ १९:१२
पूरा पढ्नुहोस्
प्रतिक्रिया
पठाउनुहोस्
×