सरकारका अनेकौैं काम आलोचनायोग्य तर नक्सा जारी गर्नु स्वागतयोग्य : गौतम

'पार्टीको सामूहिक निर्णयलाई सरकारले अनुमोदन गरेको हो, कसैको देवत्वकरण नगरौं'
कान्तिपुर संवाददाता

काठमाडौँ — नेकपाका सचिवालय सदस्य वामदेव गौतमले वर्तमान सरकारले गरेका अनेकौं कदम आलोचनायोग्य भए पनि अतिक्रमित भूभाग समेटेर नयाँ नक्सा जारी गर्ने काम स्वागतयोग्य भएको बताएका छन् । 

बुधबार बिहान समाजिक सञ्जाल फेसबुकमार्फत नेता गौतमले सिमाना व्यवस्थापनकसँ सम्बन्धित ऐतिहासिक अभिलेखलाई नयाँ नक्साले बलियो बनाएको उल्लेख गर्दै गौतमले आगामी पुस्तालाई सीमा रक्षाका निमित्त प्रेरणा, उत्साह र ऊर्जा दिएको बताएका छन् ।

नेता गौतमले नेपालका अतिक्रमित भूमिलाई समेटेर मुलुकको नयाँ नक्सा जारी गर्न सुरुदेखि नै आफूले माग गर्दै आएको बताएका छन् ।

‘नक्सा जारी हुनु सामूहिक प्रयास’

त्यस्तै नेता गौतमले कोही निश्चित व्यक्तिको प्रयासबाट नभएर सामूहिक प्रयासबाट नयाँ नक्सा जारी गर्ने निर्णय भएको बताए । उनले भनेका छन्, अनुयायीहरु व्यक्ति केन्द्रित हुन्छन् र निश्चित व्यक्तिका नामलाई देवत्वकरण गर्न व्यस्त हुने प्रचलन छ । तर, 'यो निर्णय पार्टीको सामूहिक निर्णयप्रक्रिया अनुसार भएर, नेपाल सरकारबाट पनि त्यहीअनुरुप अनुमोदन भएको वास्तविकतालाई सबैले स्वीकार गर्नुपर्छ । हामीले राम्रोलाई राम्रो र नराम्रोलाई नराम्रो भन्न सक्नुर्छ ।'

नक्सा बुधबार सार्वजनिक गरिने

यसैबीच मुख्य सचिव लोकदर्शन रेग्मीले कालापानी, लिम्पियाधुरा र लिपुलेक समेटिएको नेपालको नयाँ राजनीतिक नक्सा प्रमाणीकरण गरेका छन् । भूमि व्यवस्था, सहकारी तथा गरिबी निवारण मन्त्रालयका सचिव केदार न्यौपानेको प्रस्तावअनुसार मुख्य सचिव रेग्मी मंगलबार लिपुलेक, लिम्पियाधुरा र कालापानीलाई दार्चुला जिल्लाको व्यास गाउँपालिकामा समेटेर नक्सा प्रमाणीकरण गरेका हुन् ।

प्रमाणित नयाँ नक्सा बुधबार भूमि व्यवस्था मन्त्रालयले सार्वजनिक गर्न लागेको उच्च स्रोतले कान्तिपुरलाई बतायो । नयाँ नक्साअनुसार नेपालको कुल क्षेत्रफल १ लाख ४७ हजार ५ सय १६ वर्ग किलोमिटर कायम हुनेछ । अतिक्रमित भूभागको क्षेत्रफल ३३५ वर्गकिलोमिटर छ । अतिक्रमित भूभागबाहेकको नेपालको क्षेत्रफल १ लाख ४७ हजार १ सय ८१ वर्गकिलोमिटर छ ।

प्रकाशित : जेष्ठ ७, २०७७ ११:०६
ADVERTISEMENT
प्रतिक्रिया
पठाउनुहोस्

अस्पतालले रिफर नगर्दा संक्रमितकाे परिवार रातभर अलपत्र   

सुवास विडारी

मकवानपुर — मकवानपुरका कोरोना संक्रमित भनिएका २८ वर्षीय युवाको परिवारलाई स्वाब परीक्षणका लागि हेटौंडा ल्याइएको छ । 


मकवानपुरको थाहा नगरपालिका–११, देउरालीबाट कोरोना परीक्षणका लागि उनको परिवारलाई मंगलबार बिहान १ बजे स्वाब संकलनका लागि हेटौंडा ल्याएको हो । मध्यरातमा हेटौंडा ल्याइएको उनलाई बिहान ८ बजेमात्र स्वाब संकलन र परीक्षणका लागि हेटौंडा–४ स्थित कर्रामा रहेको आइसोलेसन वार्डमा पुर्‍याइएको छ ।

‘आइसोलेसन वार्डमा भर्ना हुनु अगाडि हेटौंडा अस्पतालमा रहेको फिभर क्लिनिकमा जाँच गर्नुपर्ने हुन्छ । अस्पतालको फिभर क्लिनिकले रातिको समयमा परीक्षण नगर्दा आइसोलेसनमा राति नै राख्न सकिएन उनीहरु हेटौंडा अस्पतालमै रहे ।’, आइसोलेसन वार्ड इञ्चार्ज भोला चौलागाईंले भने, ‘हेटौंडा अस्पतालमा मध्यरातमा ल्याइएको रहेछ । फिभर क्लिनिकले आइसोलेसनका लागि रिफर नगरिदिँदा दुईवटा छोरी र आमा रातभर हेटौंडा अस्पतालमै अलपत्र अवस्थामा बस्न बाध्य भए । लामो समयको प्रयासपछि अहिले बिहानमात्र आइसोलेसनमा ल्याइएको छ ।’

संक्रमितका परिवारलाई थाहा नगरबाट एम्बुलेन्समार्फत् हेटौंडा ल्याइएको थियो । ‘ हेटौंडा अस्पतालमा फिभर क्लिनिकमा परीक्षणका लागि उनीहरुलाई छाडिएको थियो । तर, उनीहरुको परीक्षण राति नै नहुँदा आज बिहानै गर्नुपर्ने स्वाब संकलन नै ढिला हुनपुग्यो ।’, चौलागाईंका अनुसार उनीहरुको स्वाब बुधवारै पीसीआर परीक्षण गरिनेछ ।

संक्रमित युवा ट्रक ड्राइभर हुन् । उनी वैशाख २७ गते टिस्टुङबाट काठमाडौं गएको र उनी काठमाडौंको बाफलस्थित डेरामा बस्दै आएका थिए । लकडाउनको समयमा उनी कहाँ–कहाँ गएका थिए भन्ने विषयमा कन्ट्याक्ट ट्रेसिङ सुरु भएको थाहानगरपालिकाका मेयर लवशेर विष्टले जानकारी दिए ।

प्रकाशित : जेष्ठ ७, २०७७ ११:०२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×